Նոր հրատարակութիւններ

0
139

 

Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի օրհնութեամբ Մայր Աթոռ Սուրբ Էջմիածնի Հրատարակչական բաժինը լոյս է ընծայել Անահիտ Պարսամեանի «Աշոտ երկաթի խաչը» վիպակը, Վարագ Ներսիսեանի «Հայ հին գրականութիւն» ուսումնական ձեռնարկը, Երուանդ վարդապետ Տէր-Մինասեանցի «Ընդհանուր Եկեղեցու պատմութիւն» դասագրքի Ա հատորը եւ Վալերի Գ. Թունեանի «Խրիմեան Հայրիկի հայրապետութիւնը 1893-1907» ռուսերէն մենագրութիւնը:

Անահիտ Պարսամեանի «Աշոտ երկաթի խաչը» վիպակում ներկայացուած է Աշոտ Երկաթի կեանքը, յանուն հայրենիքի նրա մղած անձնուէր պայքարը, ժամանակի բախտորոշ պահերին Եկեղեցու եւ պետութեան միասնականութիւնը:

Վարագ Ներսիսեանի «Հայ հին գրականութիւն» ուսումնական ձեռնարկը վերջին տարիների հայագիտութեան հանգրուանային նուաճումներից մէկն է: Աշխատութիւնն իր անուրանալի լուման կարող է ներդնել ոչ միայն Հանրապետութեան բուհերի համապատասխան բաժինների ուսանողների մասնագիտական պատրաստման գործում, այլեւ կարող է օգտակար լինել հայագիտութեամբ հետաքրքրուող լայն շրջանակների համար:

Երուանդ վարդապետ Տէր-Մինասեանցի «Ընդհանուր Եկեղեցու պատմութիւն» դասագրքի Ա հատորում փաստական հարուստ նիւթի համակարգուած վերլուծութեամբ լուսաբանւում է Եկեղեցու հիմնարկման, քրիստոնէութեան առաջին դարերի պատմական ընթացքի, դոգմատիկ զարգացումների, ինչպէս նաեւ Եկեղեցու դաւանաբանական առաջին պառակտման համալիր հիմնահարցերը:

Վալերի Գ. Թունեանի «Խրիմեան Հայրիկի հայրապետութիւնը 1893-1907 թթ.» ռուսերէն մենագրութիւնն ամբողջական կերպով հետազօտում է Խրիմեան Ա Վանեցի Հայրապետի 1893-1907թթ. գործունէութիւնը: Արխիւային, պատմական ու աղբիւրագիտական լուրջ նշանակութիւն ունեցող այս գիրքը նախատեսուած է բոլոր նրանց համար, ովքեր հետաքրքրուած են 19-րդ դարի վերջի եւ 20-րդ դարի սկզբի հայ ժողովրդի եւ Եկեղեցու պատմութեամբ:

Վերոնշեալ աշխատութիւնները հրատարակուած են Մայր Աթոռի բարերար Գաբրիէլ Չեմպերճեանի մեկենասութեամբ:

LEAVE A REPLY

Please enter your comment!
Please enter your name here