ԲՐԻՏԱՆԱԿԱՆ «ԻՔՈՆՈՄԻՍԹ»Ը ԼՈՒՍԱՐՁԱԿԻ ՏԱԿ Կ’ԱՌՆԷ ՏԻԱՐՊԵՔԻՐԻ ՍՈՒՐԲ ԿԻՐԱԿՈՍ ԵԿԵՂԵՑԻՆ

0
139

 Այսօր՝  Շաբաթ,  24 Օգոստոս,  թուակիր իր նորագոյն թիւին մէջ, բրիտանական հեղինակաւոր «Իքոնոմիսթ» շաբաթաթերթը   լոյս ընծայած է  «Մոխիրներէն» խորագիրով եւ «Թուրք հայերը կը սկսին տօնելու եւ ոգեկոչելու իրենց անցեալը» ենթախորագիրով յօդուած մը՝ «Գիրեր եւ արուեստներ» բաժինին մէջ, որ նուիրուած է Տիարպեքիրի Ս. Կիրակոս Հայոց եկեղեցւոյ կից հայկական թանգարան մը հիմնելու ծրագիրին:
Յիշեցնենք, թէ Տիարպեքիրի քաղաքապետ Օսման Պայտեմիր եւ Ս. Կիրակոս եկեղեցւոյ Թաղային խորհուրդի ատենապետ Էրկիւն Այըք պայմանագիր մը ստորագրած էին Յուլիսի կիսուն, եկեղեցւոյ կից քաղաքային թանգարանի մը շինութեան ձեռնարկելու նպատակով։ Անոնք որոշած են այդ թանգարանին մէջ ցուցադրել հայոց վերաբերեալ հնութիւններ, քաղաքը աւելի լաւ ձեւով ծանօթացնելու համար օտարներուն։
Եկեղեցիէն բաժին մը անվճար կերպով տրամադրուած է քաղաքապետութեան, իսկ քաղաքապետութիւնը կ՛օգնէ Թաղային խորհուրդին, որպէսզի հին հայկական իրեր, փաստաթուղթեր եւ այլ հայապատկան տեղեկութիւններ ապահովուին եւ յանձնուին թանգարանին։ Քաղաքապետութիւնը յանձն պիտի առնէ թանգարանի մաքրութիւնը, ինչպէս նաեւ ջուրի եւ ելեկտրականութեան ծախսերը պիտի ապահովէ։
«Իքոնոմիսթ»ի յօդուածը կ՛անդրադառնայ նաեւ եկեղեցւոյ վերակառուցման՝ զայն նկատելով հայութիւնը սիրաշահելու Թուրքիոյ իշխանութեանց քաղաքականութեան մասնիկ մը, միաժամանակ յիշեցնելով, թէ Թուրքիա կը շարունակէ հերքել Հայկական Ցեղասպանութեան պատմական իրողութիւնը: Հոն նաեւ կը նշուի, թէ օրական հարիւրաւորներ կ՛այցելեն եկեղեցին. անոնց մէջ կան նաեւ իսլամացած հայեր. նաեւ կը խօսուի Հայկական Ցեղասպանութիւնը ճանչնալու եւ քիւրտերուն մեղսակցութեան համար ներողութիւն խնդրելու նպատակով որոշ քիւրտ ղեկավարներու կատարած կոչերուն մասին:
«1915-ի իրականութիւնը կարելի չէ պահել, բայց իբրեւ երիտասարդ հայ, ես նաեւ չեմ ուզեր իբրեւ զոհ ճանչցուիլ, որովհետեւ հպարտ ջահակիրն եմ հարուստ քաղաքակրթութեան մը, որ ոչ միայն վերապրած է, այլ կը շարունակէ աճիլ», ըսած է Թաղային խորհուրդի ատենապետ Էրկիւն Այըքի դուստրը՝ Փելինը:

 

LEAVE A REPLY

Please enter your comment!
Please enter your name here