ԻՐԱՆ ՕԳՆՈՒԹԻՒՆ ԿԸ ԽՈՍՏԱՆԱՅ ՍՈՒՐԻՈՅ ՔԻՒՐՏԵՐՈՒՆ

0
117

Սուրիոյ քրտական Ժողովրդավարական Միութիւն Կուսակցութեան ղեկավար Սալեհ Մուսլիմ նշեց, որ Թուրքիոյ մէջ քննարկումներէն ետք, ան խորհրդակցութիւնները շարունակած է Իրանի մէջ: «Պէտք է սպասենք տեսնելու համար, թէ այդ խոստումները գործնական ի՛նչ արդիւնք պիտի ունենան, մանաւանդ՝ այն խոստումները, զորս թրքական ու իրանեան կողմերը տուին՝ իսլամ ծայրայեղականներու, մասնաւորաբար «Ճապհաթ Նուսրա»ի դէմ պայքարելու համար»:
Մուսլիմ մերժեց Իրանի մէջ իրեն հետ հանդիպում ունեցած պաշտօնատարներուն ինքնութիւնը բացայայտել եւ բաւարարուեցաւ նշելով, որ «հրաւէրը արտաքին գործոց նախարարութենէն եկած էր: Անոնց պահանջ չներկայացուցինք, անոնք ալ մեզի պահանջ չներկայացուցին, սակայն հաստատեցին, որ իրաւունք ունինք մեր հողն ու դատը պաշտպանելու եւ աշխատանք տանելու՝ արգելք հանդիսանալու համար իսլամ ծայրայեղական խմբաւորումներուն, որոնք բոլոր ժողովուրդներու թշնամիին վերածուեցան: Անոնք պատրաստակամութիւն յայտնեցին այդ խմբաւորումներուն դէմ պայքարին մէջ մեզի աջակցելու, սակայն այդ աջակցութեան ձեւն ու բնոյթը չբացայայտեցին: Սակայն հաստատ է, որ մեր միջեւ կապերը պիտի շարունակուին»:
Մուսլիմ նշեց, որ Թուրքիա այցը աւելի կարեւոր էր Իրան այցելութենէն, նկատի ունենալով, որ Թուրքիա սուրիական ընդդիմութեան կ՛աջակցի:
Քիւրտ այլ ղեկավարներ «Հայաթ» թերթին յայտնած են. «Զինեալներու պակաս չկայ, որովհետեւ հազարաւորներ պատրաստ են իսլամ ծայրայեղականներու դէմ կռուելու: Անոնք քանի մը ամսուան ընթացքին արդէն իսկ հազար զոհ պատճառեցին, սակայն Արեւմտեան Քիւրտիստանի շրջանը տնտեսական աջակցութեան կարիքն ունի»:

LEAVE A REPLY

Please enter your comment!
Please enter your name here