ՄԻՔԱԹԻ՝ ԹՐԻՓՈԼԻԻ ՊԱՏԱՀԱԾԸ ՈՂԲԵՐԳՈՒԹԻՒՆ ՄԸՆ Է – ԲԱՆԱԿԸ ԽԻՍՏ ՀՍԿՈՂՈՒԹԻՒՆ ԿԸ ՀԱՍՏԱՏԷ ԹՐԻՓՈԼԻԻ ՄԷՋ

0
105

Հիւսիսի մայրաքաղաք Թրիփոլի կ’ապրի  սրտաճմլիկ օրեր:  Երկու  մզկիթներու պայթումին երկրորդ  օրը,  Թրիփոլի ցասումի եւ դատապարտումի արտայայտութիւններով  հրաժեշտ տուաւ  իր նահատակ  զաւակներուն: Համայն Լիբանանը  միօրեայ  սուգով  յարգեց  Թրիփոլիի  նահատակներուն յիշատակը: Պետական, սեփական  բոլոր  վայրերուն մէջ աշխատանքները դադրեցան  առաւօտեան ժամը 11-էն  12-ի միջեւ:     

 Լիբանանեան բանակի   հրամանատար, զօրավար Ժան Քահուաճի   յայտնեց, թէ  բանակը կանխամիջոցներու դիմած է  արգիլերու համար խռովութեան  փորձերը: Այսուհանդերձ, ականատեսներ կը վկայեն թէ  զինեալ երեւոյթները  սովորական դարձած են   հիւսիսի մայրաքաղաքին մէջ եւ  թաղային  հեղինակութիւններ  հետզհետէ իրենց  երաշխաւորութեան տակ  սկսած են վերցնել շրջաններու   հսկողութիւնը:

  Այս մասին ակնարկելով,  ներքին ապահովութեան ուժերու նախկին ընդհանուր տնօրէն,  հազարապետ Աշրաֆ Ռիֆի յայտնեց, թէ սեփական ապահովական կանխամիջոցները բաւարար չեն երաշխաւորելու քաղաքացիներու անվտանգութիւնը:  Ռիֆի  յայտնեց, թէ անհրաժեշտ է  տեսախցիկներ  զետեղել  թաղամասերու մէջ,ինչպէս նաեւ  անհրաժեշտ է աշխուժացնել տեղեկահաւաք բաժանմունքին աշխատանքները:

Հրաժարեալ վարչապետ  Նեժիպ Միքաթի  այցելեց  պայթումներուն վայրերը:  Ան ըսաւ, թէ նահատակներու  յուղարկաւորութենէն ետք,  բանակը  ապահովական ծրագիր  մը  գործադրութեան պիտի դնէ  Թրիփոլիի մէջ: Ապա ան  յաջորդական հանդիպումներ ունեցաւ Թրիփոլիի  քաղաքական,  հոգեւոր եւ կրօնական  ղեկավարներուն  հետ: Միքաթի ապահովական նիստ մը գումարեց, որուն  մասնակցեցան  նախարարներ Մարուան Շարպէլ, Ֆայսալ Քարամէ,  Մուհամմէտ Սաֆատի եւ այլ  դէմքեր:  Հրաժարեալ վարչապետը յայտնեց, թէ Թրիփոլիի մէջ պատահածը  մարդային ողբերգութիւն մըն էր:

Հանրապետութեան նախագահ  Միշէլ Սըլէյման երէկ կէսօրէ ետք   ընդունեց  հրաժարեալ վարչապետ  Նեժիպ Միքաթին եւ իրազեկ  դարձաւ Թրիփոլիի ապահովական  վիճակին:   Սըլէյման  գլխաւորեց  ապահովական նիստի մը, որուն մասնակցեցան  Նեժիպ Միքաթիի  եւ ապահովական կառոյցներու  ներկայացուցիչներ:

 

 Ընկերվար Յառաջդիմական Կուսակցութեան պետ Ուալիտ Ճոմպլաթ դիտել տուաւ, որ   քաղաքական բոլոր  հոսանքները՝ անխտիր կը կրեն Լիբանանի զարգացումներուն  պատասխանատուութիւնը:   Ընկերային հարցերու նախարարի պաշտօնակատար  Ուայէլ Ապու Ֆաուր  դիտել տուաւ, որ միայն   քաղաքական  համաձայնութեամբ կարելի պիտի  ըլլայ լուծել Լիբանանը հարուածող տագնապը:    

 

LEAVE A REPLY

Please enter your comment!
Please enter your name here