ՄԱՐԶԱԿԱՆ – ԵՈՒՎԵՆԹՈՒՍ ՅԱՂԹԱՆԱԿՈՎ ՍԿՍԱՒ ԱՐՇԱՒԸ

0
135

Անգլիոյ ֆութպոլի ախոյեանութեան երկրորդ  հանգրուանի  մրցումներուն, Լիվըրփուլի կազմը  մրցակիցի  դաշտին մէջ 1-0 արդիւնքով  պարտութեան մատնեց  Ասթոն Վիլան:  Տին Սթարիճ նշանակեց  մրցումին եւ «Կարմիրներ»ուն  յաղթանակի  կոլը: Էվըրթըն սեփական դաշտին մէջ  0-0 արդիւնքով սպիտակ  հաւասարութիւն մը արձանագրեց  Ուեսթ Պրոմուիչ Ալպիոնի դէմ: Միեւնոյն արդիւնքով վերջ գտաւ  Նիուքասլ – Ուեսթ Համ Եունայթըտ հանդիպումը:   Սաութեմթըն  –  Սանտերլանտ  ճակատումը  վերջ  գտաւ 1-1 հաւասարութեամբ:  Հոլ  Սիթի՝ 1-0  արդիւնքով  յաղթեց  Նորուիչին:  Սթոք Սիթի`  2-1  արդիւնքով յաղթեց Գրիսթալ Փալասին:

Արսենալ  Լոնտոնի մէջ 3-1  արդիւնքով պարտութեան մատնեց  Ֆուլամը:   Օլիվիյէ Ժիրու եւ  Լուքաս Փոտոլսքի ( 2)  նշանակեցին «Կանըրզ»ներուն կոլերը:

Սպանիոյ  ֆութպոլի ախոյեանութեան երրորդ հանգրուանի մրցումներուն, Վիլառէալ՝ 2-1 արդիւնքով պարտութեան մատնեց Վալատոլիտը: Ճովանի Տոս Սանթոս եւ  Քանի նշանակեցին Վիլառէալի կոլերը:  Էսպանիոլ՝ 3-1 արդիւնքով  պարտութեան մատնեց Վալենսիան:  Լոփէզ, Սթուանի եւ Թիեւի նշանակեցին  Էսպանիոլի կոլերը: Հելտէր  Փոշթիկա՝  Վալենսիայի:

Եուվենթուս յաղթանակով սկսաւ Իտալիոյ 2013-14 տարեշրջանի ախոյեանութիւնը, երբ 1-0  արդիւնքով  պարտութեան մատնեց Սամփտորիան:   Եուվէ-ին նոր  միացած  Գարլոս  Թեվէզ նշանակեց  մրցումին միակ եւ յաղթանակի կոլը:  Ա.Սէ.  Միլան 2-1 արդիւնքով  պարտութիւն մը կրեց առաջին դասակարգ  նոր բարձրացած Վերոնայի համեստ խումբէն:  Վերոնայի  զոյգ կոլերը նշանակեց  36-ամեայ  Լուքա  Թոնին: Անտրէա   Փոլի՝  Միլանի:Մրցումէն ետք, Մարիօ Պալոթելի յայտարարեց, թէ ինք կը կրէ  Վերոնայի առջեւ Միլանի պարտութեան պատասխանատուութիւնը:

Ֆրանսայի  ախոյեանութեան երրորդ  հանգրուանի  մրցումներուն, Մարսէյ  արձանագրեց յաջորդական երրորդ  յաղթանակը, երբ  մրցակիցի դաշտին մէջ 1-0 արդիւնքով պարտութեան մատնեց   Վալենսիյէնը:   Փիեռ Անտրէ  Ժինիաք  նշանակեց  Մարսէյի  եւ մրցումին  միակ կոլը:   Լիոն, սեփական դաշտին մէջ  0-1  արդիւնքով պարտութիւն մը կրեց  Ռիմէն: Մոնփելիյէ  2-1  արդիւնքով պարտութեան մատնեց  Սոշօն:  Պորտօ, նուազագոյն՝ 1-0  արդիւնքով յաղթեց  Պասթիային:

Գերմանիոյ ախոյեանութեան  երրորդ հանգրուանի մրցումներուն, Համպուրկ  կրեց  եղանակի  երկրորդ պարտութիւնը, երբ 1-0 արդիւնքով  պարտութիւն մը կրեց   Հերթա  Պերլինէն:   Հերթա, ներկայիս ունի  եօթը կէտ: Համպուրկ՝մէկ: Պորուսիա  Տորթմունտ 1-0  արդիւնքով  պարտութեան մատնեց Վերտէր  Պրեմէնը:  Պայերն  Միւնիխ արձանագրեց  յաջորդական երրորդ  յաղթանակը, երբ 2-0 արդիւնքով պարտութեան մատնեց   Նիւրենպերկը: Ֆրանք Ռիպերի եւ Արիան Ռոպէն նշանակեցին պաւարիական  խումին կոլերը:  Պայեր  Լեվերքուզեն եւ Մայնց նոյնպէս,  երեք մրցումներէ  ետք արձանագրած են երեք յաղթանակ: Լեվերքուզեն՝ 4-2 արդիւնքով պարտութեան մատնեց   Պորուսիա Մէօնշենկլատպախը:  Մայնց՝ 2-0 արդիւնքով յաղթեց   Վոլֆսպուրկին:

Ռուսիոյ ախոյեանութեան  վեցերորդ  հանգրուանի մրցումներուն,  Մոսկուայի բանակայինները՝ ԲԿՄԱ,  2-1 արդիւնքով  պարտութեան մատնեցին  Թոմիին:  Վերջինս կրեց վեցերորդ անընդմէջ պարտութիւնը:  ԲԿՄԱ հաւաքած է 14  կէտ:  Մոսկուայի Տինամոյին եւ Սան Փեթերսպուրկի  Զենիթին միջեւ   հետաքրքրական  ճակատումը վերջ գտաւ 1-1  հաւասարութեամբ:  Զենիթ՝ մրցումին վերջին վայրկեանին նշանակեց հաւասարութեան կոլը:  Տինամոյի  բերդը կը պաշտպանէր Հայաստանի հաւաքականի  բերդապահ Ռոման  Փերեզովսքին:

Հայաստանի  ֆութպոլի ախոյեանութեան երկրորդ  հանգրուանի մրցումներուն,  Փիւնիկ 3-1 արդիւնքով պարտութեան մատնեց Ալաշկերտը:  Երեւանի Արարատը՝ 1-0 արդիւնքով  յաղթեց  Ուլիսին:

ԱՐԹՈՒՐ ԱԲՐԱՀԱՄ  ՊԱՐՏՈՒԹԵԱՆ ՄԱՏՆԵՑ ՇԻՀԵՊՈՅԻՆ

Հայազգի  Արթուր Աբրահամ  արհեստավարժ  դառնալէ ետք   նշեց իր 37-րդ յաղթանակը, երբ  Գերմանիոյ  Շվերին  քաղաքին մէջ պարտութեան մատնեց աշխարհի նախկին ախոյեան, նամիպիացի  Վիլպեֆորս  Շիհեպօն: Մրցումին տասը ռաունտերը  վերջ գտան  հաւասարութեամբ, սակայն   գլխաւոր  երեք իրաւարարները  միաձայնութեամբ Աբրահամին շնորհեցին  յաղթանակը:

Շնորհիւ այս յաղթանակին, Արթուր Աբրահամ իրաւունքս ստացաւ իրաւասութիւն ձեռք բերաւ  WBO վարկածով պայքարի աշխարհի ախոյեան Ռոպերթ  Շթիկլիցի դէմ:

 

ՄԱՐԶԱԿԱՆ ԿԱՐՃ ԼՈՒՐԵՐ

– Լոնտոնի Չելսին եւ Մախաչկալայի  Անչին  փոխհամաձայնութեան եկան Գամերոնի հաւաքականի  յարձակող Սամուէլ Էթոյի  փոխանցման հարցով: Անժիի մէկ այլ  ֆութպոլիստ՝  Վիլիանը նոյնպէս պիտի  միանայ լոնտոնեան ակումբին: Բրիտանական  մամուլին համաձայն, Վիլիան  հինգ  տարուան    համաձայնութիւն մը  կնքած  է  Չելսիի հետ:  Վերջինիս փոխանցումը  անգլիական ակումբին պիտի արժէ 38 միլիոն եուրօ:

– Նիուքասլ Եունայթըտ խումբի ֆրանսացի միջնապահ  Եոան Գապայ կը  մերժէ դաշտ ներկայանալ անգլիական ակումբին շապիկով:  Բրիտանական  մամուլին համաձայն, Արսենալ  հետաքրքրուած է 27-ամեայ միջնապահին  ծառայութիւններով:

– Պարչելոնայի  մարզիչ  Ճերարտօ  Մարթինօ՝ փոխանցումի օրէնքներու  յարգանքի  բացակայութիւն, որակեց փոխան  99  միլիոն եուրօ գումարի,   Թոթենհամի միջնապահ Կարէթ Պէյլի փոխանցումը Ռէալ Մատրիտին:« Նման գործառքը յարգանքի բացակայութեան  փաստ է աշխարհի մէջ տիրող վիճակի նկատմամբ:  Ոչ, ես  չեմ խօսիր սովեալներու եւ կարիքաւորներու մասին, բայց ես կը փափաքիմ խօսիլ առեւտուրի օրէնքներուն մասին: Չեմ կարծեր, թէ  Ռէալը յոյս ունի, որ Պէյլի  գնումը պիտի արդարացուի   ֆինանսական առումով»  ըսաւՄարթինօ:

– Անգլիական Թոթենհամ ակումբը կը  փափաքի իր կազմին հրաւիրել   Զենիթի  յարձակող Հալքը:  Լոնտոնեան ակումբը պատրաստ է  երեսուն միլիոն սթերլին վճարել  պրազիլիացի  յարձակողին  փոխանցումին համար: Զենիթ կը պահանջէ  քառասուն  միլիոն:

-Ռէալ Մատրիտի փորթուգալացի յարձակող Քրիսթիանօ Ռոնալտօ, Մանչեսթըր Եունայթըտ վերադառնալու ցանկութիւն յայտնեց: 28-ամեայ  ֆութպոլիստը ըսաւ, թէ յաջորդ Ամառը ճակատագրական պիտի  ըլլայ  իրեն համար: Ռոնալտօ,  2003-2009-ի միջեւ  196 անգամ կրած է Մանչեսթըր Եունայթըտի  շապիկը, նշանակելով  84  կոլ:

LEAVE A REPLY

Please enter your comment!
Please enter your name here