ԼԻԲԱՆԱՆԵԱՆ ԿԱՐՃ ԼՈՒՐԵՐ

0
115

– Հանրապետութեան  միւֆթի շէյխ Մուհամմէտ Ռաշիտ Քապպանի պատուիրակութեան մը գլխաւորութեամբ,  ցաւակցական այցելութիւն մը տուաւ Թրիփոլի: Քապպանի  ըսաւ, թէ  Լիբանանը   խաւարի մէջ մխրճող ուժերը պիտի  ձախողին իրենց ծրագիրներուն մէջ: Հանրապետութեան  միւֆթին ցաւ յայտնեց, որ  յառաջիկայ օրերը աւելի ծանր սպառնալիքներ կը խոստանան Լիբանանին, որովհետեւ մեծ պետութիւնները մտադրած են իրենց ձեռքը դնել  Միջին Արեւելքի վրայ:

– Լիբանանի մօտ Ռուսիոյ դեսպան Ալեքսանտր Զասպիքին  յայտնեց, թէ  Ղաոթայի կոտորածը  «Ժընեւ -2» ն խանգարելու փորձ մըն է:

– Մարոնիներու Պշարա Ռայի գարտինալը  ըսաւ, թէ երկխօսութիւնը  խանգարողները եւ  մերժողներն են  Լիբանանի ապահովական անիշխանականութեան  պատասխանատուները:

– Ապահովական մարմիններ Սաատնայէլի մէջ դարձեալ  գրաւեցին Սուրիոյ ուղղութեամբ արգիլուած  նիւթեր փոխադրող  բեռնակառք  մը:

– Պէյրութի շրջանի  երեսփոխանները  քննարկեցին  մայրաքաղաքին մէջ ապահովութեան  ծրագիր մը  իրականացնելու կարելիութիւնները:  Անոնք պահանջեցին   տեսախցիկներ զետեղել  մայրաքաղաքի արուարձաններուն մէջ եւ  այս  հարցին առնչութեամբ  վերահաստատել 2006-ին  առնուած որոշումը:  

– Ընկերվար  Յառաջդիմական Կուսակցութեան պետ Ուալիտ Ճոմպլաթ դիտել տուաւ, որ  կը սխալին բոլոր անոնք,որոնք կը խորհին թէ իրենց  սեփական ուժերուն  ապաւինելով,  երաշխաւորուած  պիտի  մնան  ահաբեկչական  գործողութիւններէն: Ան ընդգծեց , թէ  սերտուած եւ  ծրագրաւորուած  կերպով  գործադրուող ահաբեկչութեան հիմնական նպատակը,  լիբանանեան բեմի դերակատարներուն  յիշեցնել է, թէ անոնք միայն խաղալիքներ են շրջանային եւ  միջազգային ուժերու  ձեռքին տակ:  Ճոմպլաթ  յայտնեց, թէ լիբանանցին   ներկայիս միայն կը  փնտռէ   ապահովական կայունութիւն եւ օրապահիկը ապահովելու  պայմաններ:

-Երեսփոխան  Սամիր Ճըսր նշեց, թէ առաջնայնութիւնը պէտք է տալ  կառավարութեան կազմութեան: Ճըսր՝  փոխադարձ զիջողութեան կոչ  ուղղեց քաղաքական բոլոր  կողմերուն, ինչպէս նաեւ պահանջեց վերջ դնել անտեղի  քաշքշուքներուն:

-Ներքին գործոց նախարար  Մարուան Շարպէլ  հաստատեց, թէ   ապահովական միաւորներ յաջողած են բացայայտել  Սալամ  մզկիթին առջեւ պայթած  ինքնաշարժին տիրոջ  ինքնութիւնը: Ան նշեց,թէ ներկայիս աշխատանք կը կատարուի բացայայտելու  ինքնաշարժը վերջին անգամ  գնող անձին  ինքնութիւնը:

LEAVE A REPLY

Please enter your comment!
Please enter your name here