ՆԱԽԱԶԳՈՒՇԱՑՈՒՄՆԵՐ՝ ՍՈՒՐԻՈՅ ԿԱՌԱՎԱՐՈՒԹԵԱՆ ԴԷՄ ԵՆԹԱԴՐԵԱԼ ԱՄԲԱՍՏԱՆՈՒԹԻՒՆՆԵՐՈՒ ՀԵՏԵՒԱՆՔՆԵՐԷՆ

0
117

  Սուրիոյ նախագահ Պաշշար Ասատ   զգուշացուց, թէ  իր երկրին դէմ  զինուորական որեւէ  գործողութիւն պիտի դատապարտուի  ձախողութեան:  Ասատ  ըսաւ, թէ  Սուրիոյ մէջ  քիմիական զէնքի   գործածութեան վերաբերեալ  տեղեկութիւնները  կը հետապնդեն  քաղաքական  նպատակներ:

Ռուսիոյ արտաքին գործոց  նախարար Սերկէյ Լաւրով ՝ Արեւմուտքը եւ  Միացեալ Նահանգները զգուշացուց  Սուրիոյ  վրայ  յարձակելու  «Ծանր հետեւանքներէն»:  Լաւրով հեռախօսազրոյց մը ունեցաւ  Միացեալ Նահանգներու պետական  քարտուղար Ճոն Քերրիի հետ  եւ Ռուսիոյ մտահոգութիւնը արտայայտեց  քիմիական զէնքի ենթադրեալ կիրառմանը  համար Սուրիոյ դէմ բարձրացած սպառնալիքներէն:   Քերրի խոստացաւ ուշադրութեամբ ուսումնասիրել  Ռուսիոյ   փաստարկները:  Ֆրանսայի արտաքին գործոց նախարարութիւնը  յայտնեց, թէ ցարդ գոյութիւն  չունի  Սուրիոյ  դէմ զինուորական միջամտութիւն կատարելու  որոշում: Բրիտանիոյ արտաքին գործոց նախարար Ուիլիյըմ Հէյկ  յայտնեց, թէ  կարելի է   առանց ՄԱԿ-ի  հաւանութեան՝ զինուորական գործողութիւն իրականացնել Սուրիոյ դէմ:  Թուրքիոյ արտաքին գործոց նախարար Ահմէտ Տաւուտօղլու պատրաստակամութիւն  յայտնեց  մաս կազմելու Սուրիոյ դէմ որեւէ  զինակցութեան, նոյնիսկ  առանց հաշուի առնելու  ՄԱԿ-ի Ապահովութեան Խորհուրդին   տեսակէտը: Իսրայէլի փոխարտաքին գործոց նախարար Զայիֆ  Իլիքին ըսաւ, թէ  ամէն տեսակ սենարիօներուն պատրաստ են՝  Սուրիան  հարուածելու պարագային:  Ճափոնի արտաքին գործոց նախարարութիւնը   մաղթեց իրականութիւնը բացայայտել՝ որեւէ քայլի դիմելէ առաջ:  Չինաստան՝ միջազգային անկախ հետաքննութիւն մը պահանջեց:

«Սքայ Նիուզ» հաղորդեց, թէ երկու  հրթիռներ հարուածած են   քիմիական զէնքի գործածութեան ուսումնասիրութիւններուն համար Դամասկոս  ժամանած  ՄԱԿ-ի ներկայացուցիչներուն  գտնուած    պանդոկին  մօտակայ շրջանները:  Մինչ այդ , ՄԱԿ-ի քննիչները փորձեցին  այցելել  քիմիական զէնք   կիրառուած  Ղաոթայի շրջանը: Սակայն արձակազէններ  կրակ սկսան բանալ  միջազգային քննիչներուն ուղղութեամբ: Այսուհանդերձ, անոնք մուտք գործեցին  Ղաոթա եւ տեսակաւոր ստուգումներու ենթարկեցին  վիրաւորները: 

Այլ  գետնի վրայ,  ծայրայեղականները ազատ արձակեցին  Պէյրութ – Հալէպ ճանապարհին վրայ առեւանգուած  Վարդան  Գազանճեանը:

LEAVE A REPLY

Please enter your comment!
Please enter your name here