ԸՍՏ «ԹԱՅՄԶ»Ի՝ ՔԻՒՐՏԵՐԸ ԿԸ ԳՏՆՈՒԻՆ ԻՐԵՆՑ ՀԱՐԻՒՐԱՄԵԱՅ ԵՐԱԶԸ ԻՐԱԿԱՆԱՑՆԵԼՈՒ ՃԱՄԲՈՒՆ ՎՐԱՅ

0
122

Անգլիական «Թայմզ» թերթը Սուրիայէն դէպի Իրաք կատարուած գաղթին կապակցութեամբ յօդուածի մը մէջ գրած է, թէ քիւրտերը 100 տարիէ ի վեր պետութիւն հիմնելու իրենց երազը մասամբ իրականացուցած են արդէն։ Թերթը կը նշէ, որ տասնեակ հազարաւոր սուրիացի քիւրտերուն Հիւսիսային Իրաք գաղթը ցոյց կու տայ, թէ քիւրտերուն հողերը անկախ պետութիւն մը հաստատելու յարմար են եւ ապահովութիւն ու բարօրութիւն կը խոստանան։
«Սուրիացի քիւրտերը, որոնք մեծամասնութեամբ « Ալ Քայիտա»ի կապուած ընդդիմադիր խմբակներու դէմ բախումներու սաստկացումէն ետք Տիգրիս գետը անցնելով խուժեցին դէպի Հիւսիսային Իրաք, կ՛ապրին 22 տարի առաջ պատահած տեղափոխութեան ճիշդ հակառակ կեանքը։ Այդ շրջանին, Սատտամ Հիւսէյնի հրամանով, Իրաքի բանակին կողմէ կատարուած ռմբակոծութեան հետեւանքով, հազարաւոր քիւրտեր սահմանէն դէպի արեւմուտք խոյս տուած էին։ Արեւմուտքը, նշեալ տեղափոխութենէն ետք, Հիւսիսային Իրաքի վերեւը թռիչքի արգիլեալ գօտի հռչակեց։ Ասիկա պատճառ դարձաւ, որ քիւրտերը, որոնք Համաշխարհային Ա. պատերազմէն ի վեր իրենց պետութիւնը հիմնել կը ջանան, հաստատեն քրտական առաջին անկախ կառավարութեան մը հիմերը։ Սատտամ Հիւսէյնի տապալումէն ետք, երեք քրտական քաղաքներ, որոնք Պաղտատի հետ թոյլ կապեր ունէին, ինքնավար կառավարութիւն մը հիմնեցին», կը գրէ թերթը՝ աւելցնելով, որ Իրաքի Քիւրտիստան շրջանին մէջ բարօրութիւն ապահովուած է՝ քարիւղի ճարտարարուեստի վերակենդանացումով, Թուրքիոյ հետ յարաբերութիւններու բարելաւումով եւ օտար ներդրումներու շնորհիւ:

 

LEAVE A REPLY

Please enter your comment!
Please enter your name here