ՄՈԱԼԼԷՄ՝ ՍՈՒՐԻԱՆ ՀԱՐՈՒԱԾԵԼԸ ԿԸ ՆՊԱՍՏԷ ԻՍՐԱՅԷԼԻ ԵՒ ՃԵՊՀԷԹ ԱԼ ՆՈՒՍՐԱՅԻ ՇԱՀԵՐՈՒՆ – ՔԻՄԻԱԿԱՆ ԶԷՆՔԻ ՄԱՍԻՆ ՏԵՂԵԿՈՒԹԻՒՆՆԵՐԸ ԱՆՀԻՄՆ ԵՆ

0
117

 Սուրիոյ արտաքին գործոց նախարար Ուալիտ Մոալլէմ  կնքեց մամլոյ ասուլիս մը, ուր երկրին դիմագրաւած քաղաքական եւ ապահովական իրավիճակը  վերլուծելէ ետք, յայտնեց թէ  Սուրիոյ ազգային շահերը կը պահանջեն Ղոթայի միջադէպին վերաբերեալ ճշմարտութեան  բացայայտումը:

Մոալլէմ նշեց, թէ  ՄԱԿ-ի  քննչական յանձնախումբը  պահանջած է  չորս վայրերու մէջ  իրականացնել  իր  ուսումնասիրութիւնները: Ան ցաւ յայտնեց,  որ ծայրայեղականները կրակ  բացած  են  քննիչներուն վրայ:  Մոալլէմ   ըսաւ, թէ  իշխանութիւնները ամէն տեսակի դիւրութիւն կ’ընծայեն   ՄԱԿ-ի քննիչներուն,որպէսզի ազատօրէն  ամբողջացնեն իրենց  ուսումնասիրութիւնները:  Մոալլէմ  ընդցծեց,թէ   հիմնականը   տեղեկագիրը  չէ, այլ՝    Միացեալ Նահանգներու կողմէ զայն շահագործելու միտումը: Ան  յայտնեց, թէ   Միացեալ Նահանգներ եւ արեւմտեան պետութիւններ  թշնամանք  կը սերմանեն  Սուրիոյ դէմ, իսկ  քիմիական  զէնքի  գործածութեան մասին   ամբաստանութիւնները  չեն համապատասխաներ իրականութեան:

Մոալլէմ  ըսաւ, թէ Սուրիոյ  վրայ որեւէ    յարձակում, ծառայութիւն մը  եղած պիտի  ըլլայ  Իսրայէլին եւ Ճեպհէթ Ալ Նուսրային:   Արտաքին գործոց նախարարը   դիտել տուաւ, որ  Թուրքիոյ  ճանապարհով  83  երկիրներէ  զինեալներ կը    խուժեն Սուրիա եւ բացի Ճիպութիյէն  բոլոր արաբական երկիրներէն  զինեալներ թափանցած են Սուրիա: Մոալլէմ ըսաւ, թէ կը  սխալին բոլոր անոնք, որոնք կը խորհին թէ պարտութեան կրնան  մատնել սուրիական բանակը:

Ասուլիսին վերջաւորութեան Մոալլէմ յայտնեց, թէ  Սուրիա լիարժէք  եղանակներով   պիտի  պաշտպանուի՝ յարձակումի մը պարագային:

LEAVE A REPLY

Please enter your comment!
Please enter your name here