ՌՈՒՍԻԱ Կ’ԸՍԷ ԹԷ ԱՐԵՒՄՈՒՏՔԸ ՊԱՐԶԱՊԷՍ Կ’ՈՒԶԷ ՌԱԶՄԱԿԱՆ ՀԱԿԱՄԱՐՏՈՒԹԵԱՆ ՄԷՋ ՄՏՆԵԼ ՍՈՒՐԻՈՅ ԴԷՄ

0
240

Արեւմուտքի  եւ  Միացեալ Նահանգներու կողմէ Սուրիոյ  վրայ   յարձակումի մը  ժամերը սկսած են  մօտենալ, այս՝  հակառակ, Ռուսիոյ, Չինաստանի, Իրանի եւ այլ պետութիւններու  նախազգուշացումներուն:  Ռուսիա պաշտօնապէս  յայտարարեց, թէ Արեւմուտքը ոչ մէկ ապացոյց ունի՝ թէ նախագահ Պաշշար Ասատ   քիմիական  զէնք օգտագործած է   քաղաքացիներու դէմ:  Ռուսիա նշեց, թէ  Արեւմուտքը պարզապէս կ’ուզէ ռազմական  հակամարտութեան մէջ մտնել  Սուրիոյ դէմ: Իր  կարգին,  Թեհրան  յայտարարեց, թէ  Միացեալ Նահանգներ  եւ  արաբական կարգ մը պետութիւններ համաձայնութիւն  գոյացուցած են հարուածելու Սուրիան:

ՄԱԿ-ի ընդհանուր քարտուղար  Պան Քի Մուն յայտնեց, թէ սուրիական իշխանութիւնները  սերտօրէն կը  գործակցին   միջազգային   փորձագէտներուն հետ:  ՄԱԿ-ի մօտ Միացեալ Նահանգներու  դեսպան Սամանթա  Փաուըր յայտարարեց, թէ  նախագահ Պաշշար Ասատ  քիմիական զէնք  օգտագործած է  քաղաքացիներու դէմ: CBS  հեռատեսիլի ալիքը հաղորդեց, թէ  ամերիկեան իշխանութիւնները  մտադրած են  յառաջիկայ  24 ժամերուն ընթացքին  հանրութիւնը  իրազեկել Սուրիոյ մէջ քիմիական զէնքի կիրառման մանրամասնութիւններուն:  Ըստ CBS-ի,  նախագահ  Պարաք Օպամա  կը սերտէ առանց  ՄԱԿ-ի հաւանութեան զինուորական գործողութիւններ իրականացնելու հետեւանքները:  Ներկայացուցիչներու  Տան  խօսնակի մամլոյ քարտուղարը  դիտել տուաւ, թէ  նախագահ Օպամա պէտք է  խորհրդակցի  Գոնկրէսին հետ, ՝ մինչեւ Սուրիոյ  դէմ ռազմական գործողութիւններ  ձեռնարկելը:  Իսկ  Սպիտակ Տան   պաշտօնական  խօսնակ  Ճէյ Գառնի  նշեց, թէ  Սուրիոյ հակամարտութիւնը  պիտի չունենայ զինուորական լուծում, այլ միայն՝  քաղաքական: Ռուսիա անգամ մը եւս զգուշացուց  Ուաշինկթընը,  Սուրիոյ  վրայ ինքնագլուխ՝ առանց ՄԱԿ-ի հաւանութեան  յարձակումի մը   հետեւանքներէն:  Մոսկուա  նաեւ պահանջեց  յարգել   Սուրիոյ վերաբերեալ  միջազգային  օրէնսդրութիւնը:

Առ ի հակադարձութիւն սուրիական  իշխանութիւնները պաշտպանելու Մոսկուայի կեցուածքին, Ուաշինկթըն   ջնջեց Ռուսիոյ հետ  Լա Հէյի մէջ  նախատեսուած հանդիպումը:  Ռուսիոյ  փոխարտաքին գործոց  նախարար Կենատի Կաթիլով   ցաւ յայտնեց, որ  Միացեալ Նահանգներ յետաձգած է   Սուրիոյ   հակամարտութեան  վերաբերեալ Լա Հէյի մէջ Հինգշաբթի օր նախատեսուած հանդիպումը:

Թեհրանի մէջ, Իրանի արտաքին գործոց նախարար Մուհամմէտ Ճաուատ  Զարիֆ,  ՄԱԿ-ի  ընդհանուր քարտուղարի  պաշտօնակատար  Ճեֆրի Ֆելթմանին փոխանցած թէ  Սուրիոյ դէմ ռազմական գործուղութիւնները պիտի  ունենան  ծանր հետեւանքներ:

Ամերիկեան աղբիւրներ «Ուաշինկթըն Փոսթ»ին  յայտնած են, թէ  չորս  օդանաւակիրներ կը մօտնենան սուրիական  ջուրերու  ուղղութեամբ:  «Տը Կարտիըն» օրաթերթը կը գրէ, թէ  Բրիտանիա  սկսած է աւելցնել Կիպրոսի մէջ  տեղակայուած իր զօրախումբերը:  Իսրայէլ,  «Փաթրիոթ» տիպի  հրթիռներ տեղադրեց Սուրիոյ հետ իր սահմանագիծին  վրայ՝ հաւանական յարձակումի մը առաջքը առնելու  մտահոգութեամբ:

Սուրիոյ  քիւրտերու  խոշորագոյն կազմակերպութեան՝ Դեմոկրատական Միութիւն Կուսակցութեան  պետ Սալիհ  Մուսլիմ դիտել տուաւ, որ  նախագահ  Պաշշար Ասատ ապուշ չէր, որ Դամասկոսի  մօտ՝   քիմիական զէնքի կիրառման   հետաքննութիւն վարող  յանձնաժողովէն   հինգ քիլոմեթր հեռաւորութեան վրայ  քիմիական զէնք կիրառէր:   Մուսլիմ նաեւ   յայտնեց, թէ  նախագահ Ասատ գրեթէ  յաղթած է   քաղաքացիական պատերազմը:

Ռուսական  օդանաւ մը  քսան թոն մարդասիրական  օժանդակութիւն փոխադրեց Սուրիոյ  ժողովուրդին:

LEAVE A REPLY

Please enter your comment!
Please enter your name here