ԱՐԵՒՄՈՒՏՔԸ ՅԱՐՁԱԿՈՒՄԻ ԿԸ ՊԱՏՐԱՍՏՈՒԻ ՍՈՒՐԻՈՅ ՎՐԱՅ

0
120

Սուրիոյ վրայ ամերիկեան հաւանական յարձակումի մը հարցը շարունակեց մնալ միջազգային քննարկումի առարկայ, հակառակ ամերիկացի պաշտօնատարի մը այն պնդումին, թէ նախագահ Պարաք Օպամա տակաւին վերջնական որոշում մը չէ տուած յարձակումին կապակցութեամբ:
Նոյն օրը, ՄԱԿ-ի աղբիւրները հաղորդեցին, թէ ՄԱԿ-ի քննիչները որոշած են իրենց հետախուզութիւնները շարունակել այսօր՝ Չորեքշաբթի, որպէսզի կարելի ըլլայ ապահովական պայմանները բարելաւել՝ մէկ օր առաջ իրենց վրայ կատարուած յարձակումին լոյսին տակ:
Յիշեցնենք, որ սուրիական վարչակարգն ու Ռուսիան սուրիական ընդդիմութիւնը ամբաստանած էին միջազգային հետաքննիչներուն վրայ կատարուած յարձակումին համար:
Սուրիոյ նախագահ Պաշշար Ասատ ռուսական «Իզվեսթիա» թերթին հետ հարցազրոյցի մը ընթացքին զգուշացուց, որ Սուրիոյ դէմ զինուորական ծրագիրները «ձախողութեան պիտի մատնուին» եւ ըսաւ. «աշխարհին ուղղուած Սուրիոյ պատգամը այն է, որ եթէ գոյութիւն ունին ոմանք, որոնք կ՛երազեն, թէ Սուրիա Արեւմուտքի ձեռքին խամաճիկ մը պիտի ըլլայ, ապա այդ երազը պիտի չիրականանայ»: Ան շեշտեց, թէ Սուրիա անկախ պետութիւն մըն է, որ «ահաբեկչութեան դէմ պիտի պայքարի եւ իր յարաբերութիւնները պիտի հաստատէ իր ուզած պետութիւններուն հետ՝ ամենայն ազատութեամբ, ի շահ սուրիացի ժողովուրդին»:
Ասատ նաեւ ըսաւ, որ «անոնք, որոնց դէմ ներկայիս կը պայքարինք, մեծամասնութեամբ հաւատք դրժողներ են, որոնք «Քայիտա»ի գաղափարախօսութեան կը հետեւին»:
Ասատ շեշտեց, թէ քիմիական զէնքի հարցով Սուրիոյ ուղղուած ամբաստանութիւնները «քաղաքականացած են եւ ահաբեկչութեան դէմ պայքարին մէջ Սուրիոյ բանակին արձանագրած յառաջդիմութեան լոյսին տակ կատարուած են»:
Ասատ նաեւ Թուրքիան, Քաթարն ու Սէուտական Արաբիան մեղադրեց Սուրիոյ զինեալ ընդդիմութեան աջակցելու յանցանքով: «Կան նաեւ երկիրներ, որոնք անուղղակի կ՛աջակցին: Կան երկիրներ, որոնք բացայայտ կերպով կ՛աջակցին Սուրիոյ ահաբեկիչներուն. այդ երկիրներն են՝ Քաթարն ու Թուրքիան: Քաթար ահաբեկիչներու հովանաւորն է, իսկ Թուրքիան կը մարզէ զանոնք եւ միջանցքներ կ՛ապահովէ անոնց համար: Շատ ափսոս, որ Թուրքիոյ նման երկիր մը կարելի է քանի մը տոլարով կառավարել: Դժբախտաբար, այդ հսկայական երկիրը՝ ռազմավարական դիրքով ու յառաջադէմ հանրութեամբ, կը ղեկավարուի Ծոցի երկիրներէն մէկուն կողմէ: Այս բոլորին պատասխանատուն Թուրքիոյ վարչապետն է», նշեց է Ասատ:
Միւս կողմէ, Փենթակոնէն պաշտօնատարներ Երեքշաբթի օր «Ուաշինկթըն Փոսթ»ին յայտնած են, թէ Միջերկրականի վրայ գտնուող ամերիկեան չորս մարտանաւեր, Սուրիոյ հարցով որեւէ հրաման քանի մը ժամէն գործադրելու պատրաստ վիճակի մէջ են:
Նաեւ, արեւմտեան աղբիւրներ սուրիական ընդդիմութեան յայտնած են, որ կը նախատեսեն յառաջիկայ օրերուն Սուրիան հարուածել:
Մինչ Ռուսիոյ իշխանութիւնները անգամ մը եւս «աղէտալի հետեւանքներէ» զուգուշացուցին՝ Սուրիոյ վրայ արեւմտեան յարձակումի մը պարագային, Լիբանանի մօտ Ռուսիոյ դեսպան Ալեքսանտր Զասպիքին յայտնեց, որ «սուրիական վարչակարգը ապուշ չէ, որ քիմիական զէնքեր գործածէ»:
Իրանի արտաքին գործոց նախարարութիւնը եւս յայտարարեց, որ Սուրիոյ մէջ ռազմական միջոցներու օգտագործումը տարածաշրջանին համար ծանր հետեւանքներ պիտի ունենայ, իսկ Ամման յայտարարեց, թէ Յորդանան Սուրիոյ դէմ գործողութեան մը մեկնակէտը պիտի չըլլայ:
Իր կարգին, արեւմուտքցի բարձրաստիճան պաշտօնատար մը «Հայաթ» թերթին յայտնած է, թէ Սուրիոյ դէմ «ռազմական հակադարձութեան մը որոշումը տրուած է արդէն», իսկ այժմ քննարկումները՝ անոր տարողութեան, ժամկէտին եւ վերջնական նպատակներուն շուրջ են:
Քաղաքական գետնի վրայ, Մոսկուա ցաւ յայտնեց, որ Չորեքշաբթի օր Լա Հէյի մէջ նախատեսուած Սուրիոյ շուրջ հանդիպումը յետաձգուած է Ուաշինկթընի կողմէ: Միացեալ Նահանգներու արտաքին գործոց նախարարութիւնը յայտարարած էր, որ այդ հանդիպումը յետաձգուած է՝ «քիմիական զէնքի օգտագործման հակադարձելու շուրջ ընթացող խորհրդակցութեանց պատճառով»:
Իր կարգին, Բրիտանիոյ արտաքին գործոց նախարար Ուիլիըմ Հէյկ պնդեց, որ Սուրիոյ մէջ քիմիական զէնքի օգտագործման կարելի է հակադարձել առանց ՄԱԿ-ի Ապահովութեան խորհուրդի միաձայն հաւանութեան, որովհետեւ Ապահովութեան խորհուրդը Սուրիոյ նկատմամբ իր պարտաւորութեանց տէր չէ կանգնած:

 

LEAVE A REPLY

Please enter your comment!
Please enter your name here