ԴԵՍՊԱՆԻՆ ԼԱՐԱԽԱՂԱՑՈՒԹԻՒՆԸ ՕՊԱՄԱՅԻ ՅԱՅՏԱՐԱՐՈՒԹԵԱՆ ՇՈՒՐՋ

0
116

 

Միացեալ Նահանգներու նախագահ Պարաք Օպամայի տարեկան յայտարարութիւնը՝ կապուած 24 Ապրիլի Հայոց Ցեղասպանութեան զոհերու յիշատակման հետ, զօրաւոր յայտարարութիւն է, որ որեւէ փաստ չի հերքեր:
Այս մասին յայտարարած է Հայաստանի մօտ Միացեալ Նահանգներու դեսպան Ճոն Հեֆըրնը՝ Եէյլի համալսարանի «Տը Փոլիթիք» ամսագիրին տուած հարցազրոյցին ընթացքին:
«Հոն յստակօրէն կ՛ըսուի, որ Օսմանեան կայսրութեան վերջին օրերուն 1,5 միլիոն հայ սպաննուած է: Յայտարարութիւնը կը վկայակոչէ այդ գործողութիւնները՝ որպէս 20-րդ դարու ամէնէն վայրագ գազանութիւններէն մէկը: Յայտարարութեան մէջ կը ճանչցուին փաստեր եւ, մեր կարծիքով, անոր մէջ փաստերու վերաբերեալ վիճելի հարցեր չկան», դիտել տուած է դեսպանը:
Անոր համաձայն, այն բնորոշումը, զոր ամերիկեան կառավարութիւնը կու տայ այդ իրադարձութիւններուն, քաղաքական որոշում է, որ կը ներառէ շարք մը իրաւական եւ քաղաքական գործօններ, որոնցմէ մէկը Հայաստանի եւ Թուրքիոյ յարաբերութիւններու կարգաւորումն է: «Ի հարկէ Հայաստանին պէտք է Թուրքիոյ հետ բաց սահման: Մասնակի մեկուսացումը մեծ վնաս կը հասցնէ պետականութեան ու տնտեսութեան: Միացեալ Նահանգներու քաղաքականութիւնը ուղղուած է Հայաստանի եւ Թուրքիոյ հաշտեցման: Նախագահը եւ նախկին ու ներկայ արտաքին գործոց նախարարները կ՛ընտրեն եւ կ՛օգտագործեն այնպիսի բառեր, որոնք, իրենց կարծիքով, կը նպաստեն հաշտեցման», յայտնած է դեսպանը՝ մեկնաբանելով նախագահին 24  Ապրիլի վերաբերեալ կատարած յայտարարութեան մէջ ընտրուած բառերը։

 

LEAVE A REPLY

Please enter your comment!
Please enter your name here