ՔԻՒՐՏԵՐԸ ԿԸ ՍՊԱՌՆԱՆ ԱՐԺԱՆԻ ՊԱՏԱՍԽԱՆ ՏԱԼ ՀԱՄԱՁԱՅՆՈՒԹԵԱՆ ԸՆԹԱՑՔԸ ԽԱՆԳԱՐՈՂՆԵՐՈՒՆ

0
113

Քիւրտիստանի Աշխատաւորական  Կուսակցութեան Հիւսիսային Իրաքի մասնաճիւղը նկատուող Քիւրտիստանի ժողովրդային խորհուրդը շատ խիստ ազդարարութիւն մը ուղղեց Թուրքիոյ կառավարութեան՝ ըսելով, որ եթէ իշխող Արդարութիւն եւ Բարգաւաճում կուսակցութեան կառավարութիւնը իրմէ սպասուած քայլերը չառնէ ու հաշտութեան գործընթացը կասեցնէ, ապա իր զինեալները պատրաստ են դարձեալ պատերազմի ընտրանքը որդեգրելու եւ՝ «ազդու կերպով միջամտելու»։
Այս յայտարարութիւնը կատարուեցաւ կազմակերպութեան զինեալ թեւի ղեկավար Տելալ Ամէտի կողմէ։ Ամէտ ըսաւ. «Մենք բացայայտ կերպով կ՛ըսենք, որ այս խնդիրին մէջ մենք շատ անկեղծ վերաբերում ունեցանք եւ իսկապէս հաշտութեան կողմնակից եղանք։ Այս նպատակով ալ կարգ մը զոհողութիւններ ըրինք։ Բայց անոնք, որոնք անկեղծութեամբ չեն մօտենար լուծման այս գործընթացին, լուրջ չեն նկատեր պատմական քրտական հարցի լուծումը եւ կը ջանան անորոշութեան մէջ թողուլ մեր կազմակերպութեան ղեկավարութիւնը, պատմութեան առջեւ անպայման պիտի դատապարտուին եւ պիտի ստանան այն պատասխանը, որուն արժանի են։ Կառավարութիւնը մինչեւ այսօր որեւէ շօշափելի քայլ չառաւ բացի զինուորական ընդհանուր գործողութիւնները կասեցնելէ։ Կառավարութիւնը, ընդհակառակը, նոր ուժեր կը կուտակէ, նոր պահականոցներ կը բանայ։ Բայց ասիկա այսպէս պիտի չշարունակուի։ Եթէ կառավարութիւնը յառաջիկայ օրերուն շօշափելի քայլեր չառնէ, ապա մենք կրկին պիտի գտուինք պատերազմի դիրքորոշման մէջ։ Կ՛ուզեմ յայտնել, որ ի վիճակի ենք շատ ազդու կերպով փոխադարձելու»։
Սուրիոյ ու Եգիպտոսի իրադարձութիւնները որոշ չափով մոռացութեան մատնած են Թուրքիոյ մէջ Քիւրտիստանի Աշխատաւորական Կուսակցութեան հետ հաշտութեան գործընթացը։ Օտար լրատու գործակալութիւններ անցեալները արձագանգ հանդիսացած էին վարչապետ Էրտողանի այն պնդումին, թէ քիւրտերը տակաւին իրենց ուժերուն միայն քսան տոկոսը դուրս հանած են Թուրքիոյ սահմաններէն։
Քրտամէտ Խաղաղութիւն եւ ժողովրդավարութիւն կուսակցութեան շրջանակները եւս դժգոհ են գործընթացին դանդաղութենէն։ Այդ կուսակցութեան համանախագահ Սալահետտին Տեմիրթաշ ըսաւ, որ կառավարութիւնը մինչեւ Սեպտեմբեր 1 պէտք է տեսակցի իրենց հետ եւ լուսաբանութիւն ընէ ժողովուրդին՝ իր առնելիք քայլերուն մասին, իսկ մինչեւ 15  Հոկտեմբեր  պէտք է գործընթացը օրէնքի վերածուի։
Կառավարական շրջանակները դժգոհ են նմանօրինակ թուականներու արծարծումէն։ Փոխվարչապետ Պեշիր Աթալայ ըսաւ, որ քրտամէտ կուսակցութիւնը սխալ կ՛ընէ նմանօրինակ թուականներ հրապարակելով։
Միւս կողմէ, հակասական լուրեր կը հասնին քիւրտ զինեալները Թուրքիայէն դուրս հանելու գործընթացին մասին։ Տեմիրթաշ, որ մինչեւ որոշ թուական մը լաւատես արտայայտութիւններ կ՛ունենար, այս անգամ յուսալից պատկերի մը մասին չխօսեցաւ։ Ան անդրադարձաւ նաեւ Ապտուլլա Օճալանի հարցին եւ շեշտեց, որ անոր մեկուսացման պէտք է վերջ տրուի:
«Օճալան արտաքին աշխարհին հետ կապ չունի: Պայման է, որ փաստաբանները այցելեն իրեն, լրագրողներ այցելեն, «Իմաստուն Մարդոց» խումբեր այցելեն իրեն… Օճալան պէտք է կարենայ շփումներ հաստատել արտաքին աշխարհին հետ», ըսաւ Տեմիրթաշ՝ քննադատելով իշխող կուսակցութեան այն մօտեցումը, թէ բոլոր որոշումները ինք պէտք է տայ։ Ան աւելցուց. «Կառավարութիւնը տակաւին իր կողմէ որեւէ լուսաբանութիւն չէ ըրած գործընթացին մասին: «Սպասեցէք, նախ մենք մեր միջեւ համաձայնինք», կ՛ըսէ կառավարութիւնը, ուստի, ահաւասիկ, մենք դեռ կը շարունակենք սպասել։ Ամէնէն վերջը՝ 15 օր առաջ խօսած էինք իրենց հետ։ Տակաւին բնաւ խօսած չենք կառավարութեան կողմէ պատրաստուած ծրարին մասին։ Մենք այսքանը միայն գիտենք։ Այս ի՞նչ ծրար է, որուն չեն կրցած վերջնական ձեւ տալ, 8 ամիսէ ի վեր։ Ութ ամսուան մէջ կարելի էր ինը հատ սահմանադրական օրէնք պատրաստել։ Կառավարութիւնը այս բոլորը կը պատրաստէ՝ նայելով ներքին հանրային կարծիքին կամ արտաքին աշխարհի անցուդարձերուն, բայց ասիկա սխալ ռազմավարութիւն մըն է»։

 

LEAVE A REPLY

Please enter your comment!
Please enter your name here