ՆԱԽԱԳԱՀ ՍԸԼԷՅՄԱՆ ԿԸ ՊԱՀԱՆՋԷ ՏԵՍՆԵԼ ԲՈԼՈՐ ԿՈՂՄԵՐԸ ՆԵՐԿԱՅԱՑՆՈՂ ԿԱՌԱՎԱՐՈՒԹԻՒՆ

0
103

Քաղաքական    դէտերու կարծիքով,  ներքին եւ  շրջանային զարգացումներու  հետեւանքով ,  չէզոք  տարազով  կառավարութիւն  կազմելու առաջարկները  պիտի մնան  ստուերի  տակ: Հանրապետութեան նախագահը  եւ նորանշանակ վարչապետը  լծուած են  «հաւաքող» կառավարութեան մը կազմութեան աշխատանքներուն:  Այս ծիրին մէջ,  նախագահ Միշէլ Սըլէյման ե  Թամամ Սալամ  կառչած կը մնան  «Երեք Ութ»երու ծանօթ  տարբերակին  վրայ:  Ճիշդ այս    մեկնակէտէն  ելլելով,  հանրապետութեան նախագահը իր այցելուներուն առջեւ  մաղթեց, որ  քաղաքական խմբաւորումները կը  դիւրացնեն կառավարութիւն կազմելու աշխատանքները եւ կը  հրաժարին իրենց նախապայմաններէն:

Նախագահ Միշէլ Սըլէյման Պէյթ Էլ Տինի իր ամարանոցին մէջ ընդունեց ելեւմտական հարցերու նախարարի պաշտօնակատար  Մուհամմէտ Սաֆատին եւ անոր հետ քննարկեց  երկրին  տնտեսական իրավիճակը:  Ապա, Սըլէման ընդունեց  երեսփոխան Իմէտ Հութը՝  Ժամաա Իսլամիյէ-ի պատուիրակութեան մը գլխաւորութեամբ: Նախագահը նաեւ ընդունեց Հիուար  Կուսակցութեան  պետ  Ֆուատ Մախզումին  եւ այլ անձնաւորութիւններ:

Նորանշանակ  վարչապետը  ընդունեց յոյն կաթողիկէ եկեղեցւոյ  Թրիփոլիի եւ  հիւսիսային Լիբանանի  Էտուար  Տահէր եպիսկոպոսը եւ այլ անձնաւորութիւններ:

Ներքին գործոց նախարարի պաշտօնակատար  Մարուան Շարպէլ նշեց,թէ  Լիբանան ի վիճակի պիտի  չըլլայ առանց  միջազգային ընտանիքի  օգնութեան, ընդունելու  յաւելեալ թիւով  սուրիացի փախստականներ:  Նախարարը  ըսաւ, թէ  հակառակ  Լիբանանի պատրաստակամութեան,  երկրին տնտեսական եւ ընկերային պայմանները չեն արտօներ ընդունիլ յաւելեալ գաղթականներ:  Շարպէլ նշեց, թէ հանրապետութեան նախագահը  Նիւ Եորքի մէջ, ՄԱԿ-ի ընդհանուր  նիստերու  ծիրին մէջ,  պիտի քննարկէ  սուրիացի  գաղթականներուն մարդասիրական օժանդակութիւն առաքելու  հարցը:

LEAVE A REPLY

Please enter your comment!
Please enter your name here