ՊԱՆ ՔԻ ՄՈՒՆ ՕՊԱՄԱՅԻՆ ԴԻՏԵԼ ԿՈՒ ՏԱՅ, ՈՐ ԱՆՀՐԱԺԵՇՏ ԱՒԱՐՏԵԼ ՀԵՏԱԶՕՏՈԻԹԻՒՆՆԵՐԸ

0
106

ՄԱԿ-ի ընդհանուր  քարտուղար Պան Քի Մուն   նշեց, թէ  Սուրիոյ մէջ քիմիական զէնքի  գործածութիւնը   մարդկութեան դէմ ոճիր է:  Քի Մուն ըսաւ,թէ  հետաքննիչները  Շաբաթ օր պիտի աւարտեն իրենց աշխատանքը:  Լրագրողներուն  հետ ունեցած հանդիպումին ընթացքին,  ՄԱԿ-ի ընդհանուր  քարտուղարը յայտնեց,թէ հեռախօսային զրոյց մը ունեցած է  նախագահ Պարաք Օպամայի հետ  եւ պնդած է, որ  անհրաժեշտ է ժամանակ տալ ՄԱԿ-ի քննիչներուն, որպէսզի անկաշկանդօրէն  ամբողջացնեն իրենց   ուսումնասիրութիւնները:  Պան Քի Մուն  յայտնեց, թէ  ինք համոզուած է, որ   քաղաքական երկխօսութեամբ անհրաժեշտ է լուծել Սուրիոյ հակամարտութիւնը: .« Պէտք է   կարելիութիւն  ընձեռել դիւանագիտութեան»  ըսաւ ան: 

Սուրիոյ   վերաբերեալ ստեղծուած  համաշխարհային  քաոսին  լոյսին տակ,   Միացեալ Նահանգներու նախագահ Պարաք Օպամա յայտարարեց, թէ տակաւին  յստակ  որոշում  մը չունի   հակամարտութեան  միջամտելու վերաբերեալ:   Օպամա  յոյս  յայտնեց, որ  Սուրիոյ  մէջ  չկրկնուի Իրաքի  սենարիօն:

Բրիտանիոյ մէջ. Խորհրդարանը  յետաձգեց Սուրիոյ  դէմ  ռազմական  քայլի  դիմելու որոշումին  քննարկումը: Քրեմլինի  մամլոյ  ծառայութիւնը  հաղորդեց, թէ նախագահներ Վլատիմիր Փութին եւ Հասան  Ռոհանի  հեռախօսազրոյց մը ունենալով, քննարկած են Սուրիոյ իրավիճակը:  Երկու  նախագահները շեշտը դրած են  հակամարտութիւնը  բացառապէս   քաղաքական, դիւանագիտական ճանապարհով լուծելու անհրաժեշտութեան վրայ:

Ռուսիոյ արտաքին գործոց  նախարար Սերկէյ Լաւրով յայտարարեց, թէ   Սուրիոյ  ռազմական հարուած  հասցնելու ծրագիրը ՄԱԿ-ի կանոնագրութեան դրոյթներու դէմ ուղղուած  մարտահրաւէր մըն է: Լաւրով պահանջեց  սպասել Սուրիա գտնուող ՄԱԿ-ի   քննիչներուն առաքելութեան արդիւնքին, ապա դիմել քայլերու:  Ռուսիոյ ազգային անվտանգութեան խորհուրդը  մերժեց առանց ապացոյցներու ներկայութեան Սուրիոյ իշխանութիւնները դատապարտել քիմիական զէնքի  գործածութեան համար: Իրանի զինեալ ուժերու շտապի պետ Հասան Ֆէրուզ Ապատի   զգուշացուց, որ Սուրիոյ  վրայ որեւէ յարձակում, հակամարտութեան մէջ  ինքնաբերաբար պիտի ներգրաւէ  Իսրայէլը: Փաքիստան  մերժեց  Սուրիոյ դէմ արտաքին որեւէ միջամտութիւն:

Գերմանիոյ  վարչապետ Անկելա Մերքէլ  դիտել տուաւ, թէ   Սուրիոյ հակամարտութեան  բոլոր կողմերը անհրաժեշտ է հրաւիրել երկխօսութեան սեղանի շուրջ եւ  քաղաքական  լուծում  գտնել   տագնապին:  Եւրոպական Խորհրդարանի ղեկավար  Մարթին   Շուլց  յայտնեց, թէ  Սուրիոյ  հակամարտութեան ներկայ հանգրուանին մէջ կը տեսնէ բոլոր կողմերուն գոհացում  տուող դիւանագիտական  լուծում  մը:  Եգիպտոս  մերժեց մասնակցիլ Սուրիոյ դէմ որեւէ յարձակումի, ինչպէս նաեւ  մերժեց   ամէն տեսակի արտաքին միջամտութիւնները:

ՄԱԿ-ի քննիչները   երէկ երրորդ անգամ ըլլալով այցելեցին  Ղութայի շրջանը:

 «Ֆորէյն  Փոլիսի»   թերթը  կը գրէ, թէ  Ուաշինկթըն  խոստովանած է, թէ կ’անտեսէ   Սուրիոյ մէջ քիմիական զէնքի  գործածութեան  հրահանգը  տուող կողմին ինքնութիւնը: Ռազմական գետնի վրայ,  Միացեալ Նահանգներ կը  շարունակէ Սուրիոյ ափերուն մօտ  ռազմածովային ուժերու  կուտակումը: Թուրքիա  հակահրթիռային համակարգ մը  տեղակայեց  Սուրիոյ հետ  իր սահմանագիծին երկարութեան վրայ:  Բրիտանիա եւ Ֆրանսա  յայտարարեցին, թէ   իրենց  օդանաւակիրները  հետզհետէ   կը մօտենան  Սուրիոյ  ջուրերուն:  Ռուսիոյ  բանակի   միացեալ շտապը յայտարարեց, թէ  ռուսական  ռազմանաւեր կ’ուղղուին դէպի Միջերկրական:

Հալէպի մէջ  կենցաղային պայմանները  զգալապէս  ծանրագած են:  Քաղաքին սննդամթերք հասցնելու  ճանապարհները   գրեթէ կը մնան   փակ : Սակայն կեանքը  կը  շարունակուի՝ հակառակ   բիւր դժուարութիւններու:   Հայկական  վարժարանները կը  պատրաստուին ուսումնական նոր տարեշրջանին:

LEAVE A REPLY

Please enter your comment!
Please enter your name here