ՄԻԱՑԵԱԼ ՆԱՀԱՆԳՆԵՐ ԴԱՇՆԱԿԻՑՆԵՐ ԿԸ ՓՆՏՌԷ ՍՈՒՐԻՈՅ ՎՐԱՅ ՅԱՐՁԱԿԵԼՈՒ ՀԱՄԱՐ

0
116

  Բրիտանիոյ խորհրդարանը  Սուրիոյ վրայ յարձակելու վարչապետ  Տէյվիտ Գամերոնի  ծրագիրը  մերժել ետք,  Միացեալ Նահանգներ կը գտնուի  Սուրիոյ դէմ  առանձին  գործողութիւններ  իրականացնելու  մարտահրաւէրին առջեւ: 

ՆԱԹՕ-ի  անդամ  12   երկիրներ  հրաժարեցան  Սուրիոյ վրայ  յարձակելու  ամերիկեան  նոր խաչակրութենէն: Միացեալ Նահանգներու պաշտպանութեան նախարար  Չաք Հէյկըլ դիտել տուաւ, թէ Ուաշինկթըն  պիտի  փորձէ    դաշնակիցներ  փնտռել, որպէսզի իրկանացնէ   յարձակումը:  Սպիտակ  Տան մօտիկ աղբիւրներ  յայտնեցին, թէ Ուաշինկթըն  չի  փափաքիր առանձին  ճակատ բանալ  Սուրիոյ դէմ:  Միւս կողմէ,  հարիւրաւոր ամերիկացիներ Նիւ Եորքի  եւ Ուաշինկթընի մէջ հաւաքներ կազմակերպեցին, մերժելով Սուրիոյ վրայ յարձակումը:    Այս կացութեան լոյսին տակ, Բրիտանիոյ վարչապետ Տէյվիտ Գամերոն  հեռաձայնային հաղորդակցութիւն մը ունեցաւ  նախագահ Պարաք Օպամայի հետ:

Ֆրանսայի նախագահ  Ֆրանսուա  Հոլանտ յայտարարեց, թէ  իր երկիրը  Բրիտանիոյ բացակայութեան ալ,  պատրաստ է   մասնակցելու  Սուրիոյ դէմ յարձակումին:  Հոլանտ  շեշտեց,թէ  քիմիական զէնք օգտագործողները պէտք է կրեն իրենց պատիժը: Ֆրանսայի  նախագահին կարծիքով,   Սուրիոյ  վրայ յարձակումը իրագործուած պիտի  ըլլայ մինչեւ  յառաջիկայ Չորեքշաբթի:  Գերմանիոյ վարչապետ Անկելա  Մերքէլ նոյնպէս  հրաժարեցաւ   զինուորական գործողութեան տարբերակէն:

Իրանի  խորհրդարանի նախագահ Ալի Լարիճանի ըսաւ, թէ Միացեալ Նահանգներ  նախապէս պատրաստած է Սուիոյ վրայ յարձակելու ծրագիրը, իսկ  քիմիական զէնք օգտագործելու մասին  սուրիական իշխանութիւններուն  դէմ բարձրացած  աղմուկը,   միջոց պիտի ծառայէ  յարձակումին:

Սուրիոյ  իրավիճակը  քննարկելու նպատակով ՄԱԿ-ի Անվտանգութեան Խորհուրդի մնայուն անդամներ չկրցին  որոշում կայացնել իրենց  դիմելիք քայլերուն առնչութեամբ:   Հանդիպումը  տեղի ունեցաւ Ռուսիոյ առաջարկով եւ  տեւեց  45 վայրկեան:  Մնայուն  Հնգեակի  դեսպանները ՄԱԿ-ի  ժողովասրահէն հեռացան, առանց որեւէ յայտարարութեան:

 Ռուսիոյ արտաքին գործոց նախարար Սերկէյ Լաւրով յայտարարեց, թէ  զինուորական որեւէ յարձակում ծանր հարուած մը հասցուցած  պիտի ըլլայ  միջազգային  համակարգին:  Քրեմլին  ողջունեց Սուրիոյ վրայ  յարձակելու ծրագիրը  դատապարտող  Եւրոպական Խորհրդարանին կեցուածքը:

Քիմիական զէնքի  գործածութեան հետաքննութիւնները վարող ՄԱԿ-ի յանձնախումբի անդամները երէկ  այցելեցին Դամասկոսի  զինուորական  հիւանդանոցը: Յանձնախումբի անդամները  հրաժարեցան  Ղութա կատարելիք այցելութենէն՝ ծայրայեղականներու կողմէ  արձակուող  կրակոցներուն պատճառով: ՄԱԿ-ի հետաքննիչները  սկզբունքով այսօր՝ Շաբաթ  պիտի աւարտեն իրենց   ուսումնասիրութիւնները  եւ վերադառնան Ժընեւ:

LEAVE A REPLY

Please enter your comment!
Please enter your name here