«ՔԱՐԵՐՈՒ ՍԻՄՖՈՆԻԱ» ՊԱՍՏԱՌԸ ՅԱՂԹՈՂ ԴՈՒՐՍ ԵԿԱՒ ՄԱԿ-Ի ՄՐՑՈՒՄԷՆ

0
99

Հայաստան յաղթանակ ապահոված է ՄԱԿ-ի Զբօսաշրջային Համաշխարհային Կազմակերպութեան (UNWTO) 2013-ի «Վեթթօր Կիուսթի» զբօսաշրջային պաստառներու մրցումին՝ «Եւրոպա» բաժանմունքին մէջ: Հայաստանի ազգային մրցունակութեան հիմնադրամի հանրային կապերու գրասենեակին համաձայն՝ այս լուրը պաշտօնապէս յայտարարուած է Զամպիոյ եւ Զիմպապուէի մէջ 24-29 Օգոստոսին տեղի ունեցած Զբօսաշրջային Համաշխարհային Կազմակերպութեան 20-րդ Ընդհանուր ժողովի նստաշրջանին:
Հայաստանի ազգային մրցունակութեան հիմնադրամի եւ Հայաստանի տնտեսութեան նախարարութեան կողմէ ներկայացուած Հայաստանի «Քարերի Սիմֆոնիա» պաստառը լաւագոյնը նկատուած է Զբօսաշրջային Համաշխարհային Կազմակերպութեան Եւրոպայի յանձնաժողովի 44 անդամ-երկիրներու մէջ:
«Վեթթօր Կիուսթի» Զբօսաշրջային պաստառներու մրցումը տեղի կ՛ունենայ երկու տարին անգամ մը:
Եւրոպայի լաւագոյն զբօսաշրջային պաստառ տիտղոսը ապացոյցն է Հայաստանի բազմաբնոյթ եւ բազմաբովանդակ զբօսաշրջութեան խթանման նպատակով առնուած բազմաթիւ քայլերու: Անիկա յատկապէս կարեւոր է Հայաստանի պատմամշակութային եւ ազգային-հոգեւոր ժառանգութիւնը համաշխարհային մակարդակի վրայ ճանաչելի դարձնելու եւ ներգնայ զբօսաշրջային հոսքը խթանելու իմաստով:
Հայաստանի «Քարերի Սիմֆոնիա» պաստառը պիտի ցուցադրուի ՄԱԿ-ի Զբօսաշրջային Համաշխարհային Կազմակերպութեան մատրիտեան ղեկավարման մարմինի գրասենեակի նախասրահին մէջ եւ ելեկտրոնային տարբերակով տեղակայուած պիտի մնայ կազմակերպութեան պաշտօնական կայքին վրայ՝ մինչեւ 2015 թուականին կայանալիք մրցումը:

 

LEAVE A REPLY

Please enter your comment!
Please enter your name here