ՄԱՐԶԱԿԱՆ – ՊԱՅԵՐՆ ՄԻՒՆԻԽ ՇԱՀԵՑԱՒ ԵՒՐՈՊԱՅԻ ՍՈՒՓԸՐ ԳԱՓ-Ը

0
147

Պայերն Միւնիխ, Խօսեպ Կուարտիոլայի  գլխաւորութեամբ  շահեցաւ  առաջին տիտղոսը՝ Եւրոպայի «Սուփըր Գափ»ը: Արդարեւ,  Փրակայի  «Էտեն Արենա» մարզադաշտին մէջ  տեղի ունեցող  Պայերն Միւնիխ – Չելսի   հանդիպումին  իննիսուն վայրկեանները  վերջ գտան  1-1 հաւասարութեամբ (կիսախաղ 1-0, յօգուտ՝ Չելսիի):   Մրցումի 8-րդ  վայրկեանին,  Ֆեռնանտօ Թորէզ  նշանակեց անգլիական կազմին  առաջին կոլը: Ա.կիսախաղը անգլիացիներու առաւելութեամբ աւարտելէ ետք, Բ. կիսախաղի երկրորդ վայրկեանին,  Ֆրանք Ռիպերի   հաւասարեցուց հաշիւը:  Հանդիպումը վերջ գտաւ  1-1  հաւասարութեամբ:  Յետ երկարաձգումի,   Էտեն Հազարտ,  93-րդ վայրկեանին դարձեալ յառաջ մղեց Չելսին:  Մրցումին հաշուած  վայրկեաններուն,  Խաւիյէ Մարթինէզ, Պայերնը փրկեց պարտութենէն, նշանակելով  անոր հաւասարութեան կոլը:

Մրցումին   120 վայրկեանները  2-2 հաւասարութեամբ  աւարտելէ ետք, «Սուփր Գափ»ի 38-ամեայ պատմութեան մէջ առաջին անգամ ըլլալով,  յաղթողը  որոշուեցաւ  փենալթի հարուածներու շնորհիւ:

 Պայերն Միւնիխ աւելի դիպուկ դուրս եկաւ, իրականացնելով  բոլոր  հինգ  հարուածները,  Չելսի՝ չորսը: Այսպիսով  գերմանական կազմը  Խօսեպ Կուարտիոլային շնորհեց առաջին   մրցանակը:  Յատկանշական է, որ  Կուարտիոլա՝ Պարչելոնան գլխաւորած տարիներուն,  15  պաշտօնական հանդիպում ունեցած է   Ժոզէ Մուրինիոյի  Ռէալ Մատրիտին դէմ,  արձանագրելով  եօթ  յաղթանակ,  հինգ հաւասարութիւն եւ երեք պարտութիւն:

 Մրցումէն ետք,  Ժոզէ  Մուրինիօ  յայտարարեց, թէ  իր խումբը աւելի արժանի էր յաղթանակին: Անոր կարծիքով՝  լաւագոյն խումբը  պարտութեամբ հեռացաւ դաշտէն:  Կուարտիոլա  յայտնեց, թէ բաւական դժուար եղած  էր յաղթել Չելսիին եւ Մուրինիոյին:

LEAVE A REPLY

Please enter your comment!
Please enter your name here