ՌՈՒՍԻԱ ԱՆԸՆԴՈՒՆԵԼԻ ԿԸ ՆԿԱՏԷ ՍՈՒՐԻՈՅ ԴԷՄ ՍՊԱՌՆԱԼԻՔՆԵՐԸ

0
127

ՄԱԿ-ի ընդհանուր քարտուղար Պան Քի Մուն յայտարարեց, թէ  Սուրիոյ մէջ  քիմիական զէնքի հարցերով ՄԱԿ-ի փորձագէտներուն հաւաքած  նիւթերուն  վերլուծութիւնը  կը պահանջէ երկու  շաբաթ  ժամանակ:  Քի Մուն  նաեւ յայտնեց, թէ ՄԱԿ-ը կը մերժէ  հովանաւորել Սուրիոյ վրայ  որեւէ  ձեւի  յարձակում: ՄԱԿ-ի    յանձնախումբը  երէկ ՝ Շաբաթ, Լիոբանանի ճանապարհով պաշտօնապէս հեռացաւ Սուրիայէն:

 Միւս կողմէ,  Միացեալ Նահանգներու նախագահ Պարաք Օպամա  աստիճանաբար  կը հրաժարի Սուրիոյ վրայ  լայնածաւալ յարձակումի ծրագիրէն, փոխարէնը կ’ուսումնասիրէ «ռազմական փոքր գործողութեան» մը կարելիութիւնները: Օպամա նաեւ նշեց, թէ  Ներկայացուցիչներու Տան հետ պիտի  խորհրդակցի Սուրիոյ հարցով:  Պաշտպանութեան նախարար Չաք  Հէյկըլ  հեռաձայնային հաղորդակցութիւն ունեցաւ Ֆրանսայի նախագահ  Ֆրանսուա Հոլանտի եւ Իսրայէլի վարչապետ  Պենիամին Նեթանիահուի  հետ՝ համադրելու Սուրիոյ վրայ  տեղի ունենալիք  յարձակումին քայլերը:  

Ռուսիոյ արտաքին  գործոց նախարարութիւնը Ուաշինկթընին թելադրեց հրաժարիլ «փոքր գործողութեան» ծրագիրէն:  Ռուսիոյ արտաքին գործոց նախարար Սերկէյ Լաւրով յայտնեց, թէ կասկածելի աղբիւրներու վրայ յենելով,   կարելի չէ    պատերազմի եւ խաղաղութեան   մասին որոշումներ կայացնել : Լաւրով յայտնեց, թէ  ժամանակն է, որ Միացեալ  Նահանգներ հրաժարի  արկածախնդրական քայլերէն:  

ՆԱԹՕ-ի  ընդհանուր քարտուղար Անտերս Ֆոկ Ռասմուսեն  մերժեց Սուրիոյ վրայ  յարձակելու   ծրագիրի  մը  գոյութեան մասին   տեղեկութիւնները: Ան ըսաւ, թէ ՆԱԹՕ  կը մերժէ  մասնակցիլ   Սուրիոյ վրայ  յարձակումին:

Յորդանանի զինեալ ուժերու ընդհանուր հրամանատար,զօրավար Ղալէպ Համայտա յայտարարեց, թէ   իր երկիրը անց պիտի  չծառայէ  Սուրիոյ դէմ յարձակումներու:

LEAVE A REPLY

Please enter your comment!
Please enter your name here