ՔԻՒՐՏԻՍՏԱՆ ԱՆՈՒՆԸ ՕԳՏԱԳՈՐԾԵԼԸ ԱՐԳԻԼՈՒԱԾ Է ԹՈՒՐՔԻՈՅ ՄԷՋ …

0
117

Վերջերս Թուրքիոյ մէջ քրտական կազմակերպութիւններ եւ մասնաւորաբար Խաղաղութիւն եւ Ժողովրդավարութիւն կուսակցութեան ղեկավար դէմքեր սկսած են յաճախակի կերպով գործածելու «Քիւրտիստան» անունը։ Անոնք կը խօսին ո՛չ միայն Իրաքի կամ Սուրիոյ «Քիւրտիստան»ներուն մասին, այլ նաեւ Թուրքիոյ մէջ առկայ Քիւրտիստանի մը մասին՝ կեդրոն ունենալով Տիարպեքիրը։ Այդ քաղաքին մէջ նաեւ հիմնուեցաւ  նոր միութիւն մը, որ ինքզինք կոչեց  Քիւրտիստանի Երիտասարդական Շարժումի Միութիւն, եւ այս անունով քրտերէն ցուցատախտակ մըն ալ զետեղուեցաւ միութեան դրան վերեւը։ Ցուցատախտակին նկարը հրատարակուեցաւ  կարգ մը թերթերու կողմէ։
Թուրքիոյ ներքին գործոց նախարարութիւնը առարկեց  միութեան անուան դէմ եւ դիտել տուաւ, որ «Քիւրտիստան» անունին գործածութիւնը յանցագործութիւն է՝ սահմանադրական օրէնքին համաձայն։ Նախարարութիւնը պահանջեց, որ միութիւնը փոխէ իր անունը ու ջնջէ «Քիւրտիստան» անունը։
Միութեան վարչութեան փոխնախագահ Ռոժէ Չակեր աւելի ուշ յայտարարեց, թէ միութիւնը ներքին գործոց նախարարութեան այս հրահանգին դէմ պիտի դնէ ու անունը պիտի չփոխէ՝ աւելցնելով, թէ պատրաստ է հարցը դատավարութեան նիւթ դարձնելու։ «Եթէ Թուրքիոյ մէջ արդիւնք չստացուի, ապա Մարդկային Իրաւունքներու եւրոպական ատեանին պիտի դիմենք», ըսաւ ան։

 

LEAVE A REPLY

Please enter your comment!
Please enter your name here