ԼԱՒՐՈՎ՝ ՍՈՒՐԻՈՅ ՎՐԱՅ ՈՐԵՒԷ ՅԱՐՁԱԿՈՒՄ ՁԱԽՈՂՈՒԹԵԱՆ ՊԻՏԻ ՄԱՏՆԷ «ԺԸՆԵՒ -2»Ն

0
123

Շաբաթ երեկոյեան նախագահ  Պարաք  Օպամայի  ելոյթէն ետք,  Սուրիոյ վրայ   յարձակումը   յետաձգուած է  ցնոր  տնօրինութիւն:  ՄԱԿ-ի ընդհանուր քարտուղար Պան Քի Մուն  շնորհակալութիւն յայտնեց սուրիական կառավարութեան,  քիմիական զէնքի  գործածութեան ուսումնասիրութիւնները կատարող ՄԱԿ-ի  յանձնախումբին ցուցաբերած  լիարժէք   համագործակցութեան համար:

 Իրանի  ազգային անվտանգութեան եւ արտաքին  քաղաքականութեան պետ  Ալլէ Էլտտին Պրուճարտի այցելեց Դամասկոս եւ   խորհրդակցութիւն մը  ունեցաւ  նախագահ Պաշշար Ասատի հետ: Իրանցի դիւանագէտը  զգուշացուց  Սուրիոյ վրայ յարձակումի փորձերէն:  Արաբական  Լիկայի  ընդհանուր քարտուղար  Նեպիլ Արապի յայտնեց, թէ  քիմիական զէնքի  գործածութեան  համար ՄԱԿ-ի հետաքննութիւնները պիտի չտան որեւէ արդիւնք: Ան նշեց, թէ  Արաբական Լիկան ՄԱԿ-ին փոխանցած է Սուրիոյ  թղթածրարը: Արապի  ըսաւ, թէ Արաբական Լիկայի անդամ 18  պետութիւններ  համոզուած են, թէ  սուրիական վարչակարգն է քիմիական զէնքերու  գործածութեան պատասխանաատուն:  Արաբական Լիկան ՄԱԿ-էն  պահանջեց խիստ միջոցներու դիմել Սուրիոյ դէմ: Կ’արժէ  նշել, որ Արաբական Լիկայի  նիստին ընթացքին,  Եգիպտոս, Իրաք, Լիբանան, Թունուզ եւ Ալճերիա դէմ կեցան Սուրիոյ վրայ  արտաքին միջամտութիւններուն:

 Ռուսիոյ արտաքին գործոց  նախարար Սերկէյ Լաւրով  դարձեալ շեշտեց, թէ քաղաքական լուծումը կը մնայ  հակամարտութեան միակ  ընտրանքը: Լաւրով  նշեց, թէ  Սուրիոյ մէջ   քիմիական  զէնք  օգտագործելու մասին ամերիկեան  տուեալները, որոնք նաեւ տրամադրուած են Ռուսիոյ,   ոչինչ կը  պարունակեն:  Լաւրովի խօսքով՝ արեւմտեան պետութիւնները կը հրաժարին  հերկայացնել  յստակ  ապացոյցներ: Ան ընդգծեց, թէ  Միացեալ Նահանգներ  երկակի   չափանիշներ կը  կիրառէ  Միջին Արեւելքի եւ հիւսիսային Ափրիկէի մէջ:  Լաւրով զգուշացուց, որ Սուրիոյ վրայ  զէնք օգտագործելու պարագային,  «Ժընեւ -2»ն կրնայ չկայանալ: Ան նաեւ  յատնեց, թէ Լիպիայէն 12  երկիրներու  ուղղութեամբ ապօրէն զէնք կը մատակարարուի, առ այսօր:  Նշենք, թէ  նախագահ Վլատիմիր  Փութին, Սուրիոյ մէջ քիմիական զէնքի կիրառման  միջադէպը   անուանեց սադրանք:

Ֆրանսա պաշտօնապէս յայտարարեց, թէ  առանձինը որեւէ յարձակում պիտի  չկատարէ Սուրիոյ   դէմ:

LEAVE A REPLY

Please enter your comment!
Please enter your name here