ՄԱՐԶԱԿԱՆ – ԼԻՎԸՐՓՈՒԼ,ՏՈՐԹՄՈՒՆՏ, ՊԱՐՉԵԼՈՆԱ ,ՌԷԱԼ ԵՒ ԵՈՒՎԷ ԿԸ ՇԱՐՈՒՆԱԿԵՆ ԻՐԵՆՑ ՅԱՂԹԱՐՇԱՒԸ

0
154

Շաբաթավերջին, Անգլիոյ  Ֆութպոլի ախոյեանութեան երրորդ  հանգրուանի ամենասպասուած  հանդիպումը անկասկած Լիվըրփուլի եւ Մանչեսթըր Եունայթըտի  միջեւ՝  Էնֆիլտ  Ռոտ   մարզադաշտին մէջ  ճակատումն էր: Հանդիպումը կը զուգադիպէր Լիվըրփուլի  փառքի  օրերը կերտող մարզիչ՝ Պիլ Շենքլիի  ծննդեան հարիւր ամեակին,   ինչպէս նաեւ  յարձակող Տին Սթարիճի   ծննդեան  24-րդ տարեդարձին:  Մրցումը  միաժամանակ Եունայթըտի մարզիչ Տէյվիտ Մոյզի  համար, Էվըրթընը լքելէ ետք,  պաշտօնական  առաջին  վերադարձն էր  Լիվըրփուլ  քաղաքը՝ իբրեւ  Եունայթըտի մարզիչ: Հետաքրքրական այս   ճակատումին  4-րդ վայրկեանին,  Տին Սթարիճ  գլխու հարուածով   յառաջ մղեց «Կարմիրներ»ը:  Մրցումը վերջ գտաւ Լիվըրփուլի յաղթանակով՝ 1-0:  Սոյն  յաղթանակին շնորհիւ, Լիվըրփուլ  գրաւեց ընդհանուր  դասաւորման առաջին դիրքը եւ հարիւր առ  հարիւր ցուցանիշ պահպանող  միակ խումբը: Լիվըրփուլ, վերջին անգամ 1994-ի ախոյեանութեան  սկիզբը արձանագրած է նման  ցուցանիշ՝ արձանագրելով յաջորդական  երեք յաղթանակ:

Օրուան երկրորդ  հետաքրքրական մրցումը, փոխանցումներու սակարանին մէջ  մէկ դահեկան գումար  չծախսող Արսենալի եւ  130 միլիոն սթերլին արժողութեամբ  նոր մարզիկներով համալրուած  Թոթենհամի միջեւ  վերջ գտաւ Արսենալի  յաղթանակով՝  1-0:   Մրցումին միակ  կոլը նշանակեց  Արսենալի յառաջապահ  Օլիվիյէ Ժիրուն:

Միւս կողմէ, Մանչեսթըր Սիթի՝ 2-0 արդիւնքով  անհամոզիչ  յաղթանակ մը  տարաւ Հոլ Սիթիի դէմ:  Ալվարօ Նեկրետօ եւ  Եայիա Թուրէ  նշանակեցին Սիթիի կոլերը: Սիթի՝  երեք մրցումէ ետք  հաւաքած է  վեց կէտ:  Գրիսթալ  Փալաս արձանագրեց եղանակի առաջին  յաղթանակը, երբ  3-1 արդիւնքով պարտութեան մատնեց Սանտերլանտը: Կապիտոն,  Կէյլա եւ  Օքիֆ նշանակեցին լոնտոնեան կազմին կոլերը:  Շնորհիւ  Հաթեմ Պէն Արֆայի  կոլին, Նիուքասլ Եունայթըտ 1-0 արդիւնքով պարտութեան մատնեց Ֆուլամը:  Ուեսթ Համ Եունայթըտ սեփական դաշտին մէջ  1-0 արդիւնքով խոնարհեցաւ Սթոք Սիթիի առջեւ, իսկ Նորուիչ Սիթի՝ 1-0 արդիւնքով տպաւորիչ յաղթանակ մը արձանագրեց Սաութեմթընի դէմ:  Գարտիֆ –  Էվըրթըն հանդիպումը  վերջ գտաւ  0-0  հաւասարութեամբ:

Իտալիոյ ախոյեանութեան  երկրորդ    հանգրուանի մրցումներուն,  Եուվենթուս՝   4-1 արդիւնքով պարտութեան մատնեց  Լացիօն:  Արթուրօ Վիտալ(2), Թեվէզ եւ  Վուչինիչ նշանակեցին «Ծեր  Պառաւ»ին կոլերը,  Գլոզէ՝  Լացիոյի:  Նափոլի՝  4-2 արդիւնքով պարտութեան  մատնեց Վերոնան, այս  վերջնոյն դաշտին մէջ:  Մարէք Համսիք (2), Խոսէ  Գալյեխոն եւ  Կոնսալօ Հիկուային նշանակեցին  Նափոլիի կոլերը: Ռոմա՝  3-0 արդիւնքով պարտութեան մատնեց Վերոնան:  Միլան քաղաքի երկու խումբերը  նշանակեցին  երեքական կոլ: Ա.Սէ. Միլան  3-1 արդիւնքով պարտութեան մատնեց  Գալիարին, իսկ Ինթէր Միլան՝ 3-0 Գաթանիան:

Սպանիոյ  ախոյեանութեան երրորդ   հանգրուանի  մրցումներուն,  Պարչելոնա յաջողեցաւ   3-2 արդիւնքով պարտութեան մատնել Վալենսիան, այս  վերջնոյն դաշտին մէջ:  Գաթալոնական կազմին  կոլերը նշանակեց Լիոնէլ Մեսին:  Վալենսիայի դէմ նշանակած «Հեթ-թրիք»ին շնորհիւ, Լիոնէլ Մեսի  բարձրացաւ Սպանիոյ ֆութպոլի պատմութեան բոլոր  ժամանակներու ռմբարկուներուն ցուցակին  վերցերորդ դիրքը:  26-ամեայ  արժանթինցին նշանակած կոլերուն թիւը  բարձրացուց  220-ի:  Նշենք, թէ Սպանիոյ ֆութպոլի պատմութեան  ամենաշատ կոլ նշանակող մարզիկը եղած է  Աթլեթիք Պիլպաոյի  յարձակող  Թելմօ Սարան՝   251 կոլ:  Չելթա Վիկօ՝  1-1 արդիւնքով  հաւասարութիւն մը արձանագրեց Կրանատայի դէմ:  Վալատոլիտ՝ 1-0 արդիւնքով պարտութեան մատնեց  Կեթաֆէն: Վիլառէալ արձանագրեց երրորդ անընդմէջ  յաղթանակը, երբ  մրցակիցի դաշտի վրայ  3-0 արդիւնքով պարտութեան մատնեց   Օսասունան:   Փերպէ,  Աքինօ եւ  Ուչէ նշանակեցին Վիլառէալի կոլերը: Ռէալ Մատրիտ 3-1 արդիւնքով պարտութեան մատնեց Աթլեթիք Պիլպաօն:  Իսքօ (2)  եւ Քրիսթիանօ Ռոնալտօ  նշանակեցին մայրաքաղաքի  կազմին կոլերը:

Ֆրանսայի  ախոյեանութեան  չորրորդ  հանգրուանի մրցումներուն, Փարի Սէն  Ժերմէն   2-0 արդիւնքով պարտութեան մատնեց  Կենկանը:  Ռափիօ եւ  Իպրահիմովիչ մրցումի ՝ 91 եւ 92-րդ վայրկեաններուն  նշանակեցին մայրաքաղաքի կազմին կոլերը:  Լորան Պլանի կազմը ներկայիս ունի  ութ կէտ:   Օրուան ամենահետաքրքրական հանդիպումը կայացաւ Մարսէյլի մէջ, ուր տեղւոյն կազմը ընդունեց Մոնաքօն:  Հիւրերը՝ 2-1 արդիւնքով պարտութեան մատնեցին Մարսէյը եւ  գրաւեցին ընդհանուր դասաւորման առաջին դիրքը:  Ռատամէլ Ֆալքաօ եւ  Էմանուէլ  Ռավիյէ նշանակեցին Մոնաքոյի կոլերը:  Նանթ՝ սեփական դաշտին մէջ 0-0 արդիւնքով հաւասարութեամբ մը գոհացաւ  Ռիմի դէմ: Նշենք, թէ Նանթի մարզիչն է  հայազգի  Միշէլ Տէր Զաքարեանը: Նանթ ներկայիս հաւաքած է  չորս կէտ:  Ռէն –  Լիլ ճակատումը  նոյնպէս  վերջ գտաւ  0-0 հաւասարութեամբ:  Լիոն կրեց երկրորդ անընդմէջ  պարտութիւնը, երբ  2-1 արդիւնքով խոնարհեցաւ  Էվիանի առջեւ:

Գերմանիոյ ախոյեանութեան  չորրորդ  հանգրուանի մրցումներուն,  Շալքէ 04՝   երկու անպատասխան գնդակ  զետեղեց Պայեր Լեվերքուզենի բերդին մէջ, արձանագրելով եղանակի առաջին յաղթանակը:  Հեկէր եւ  Ֆարֆան նշանակեցին Շալքէի կոլերը:: Պայեր Լեվերքուզեն  երեք մրցումներէ ետք հաւաքած  է    ինը կէտ:  Համպուրկի կազմը   չորս անպատասխան գնդակ   զետեղեց Այթնթրախթ Պրունշուայքի  բերդին մէջ: Պորուսիա Մէօնշենկլատպախ՝  4-1 արդիւնքով պարտութեան մատնեց Վերտէր Պրեմէնը, իսկ  Հանովըր 96-ը, միեւնոյն՝  4-1 արդիւնքով յաղթեց  Մայնցին:  Շթութկարթ՝  6-2 արդիւնքով   պարտութեան մատնեց Հոֆենհայմը:

Օրուան ամենակարեւոր  յաղթանակը արձանացրեց  Պորուսիա Տորթմունտը, որ   շնորհիւ Հենրիխ Մխիթարեանի նշանակած երկու կոլերուն, 2-1 արդիւնքով պարտութեան մատնեց Այնթրախթ Ֆրանքֆորթը:  Չորս մրցումներէն ետք՝ 12 կէտով,  Տորթմունտ միակ խումբն է, որ   կը պահէ  հարիւր առ  հարիւր ցուցանիշ:

 Հայաստանի ֆութպոլի ախոյեանութեան չորրորդ  հանգրուանի մրցումներուն, Երեւանի Արարատը  3-2  արդիւնքով պարտութեան մատնեց Գանձասարը:  Անցեալ տարուան ախոյեան  Շիրակը՝  3-0 արդիւնքով պարտութեան մատնեց   Ուլիսը:  Բանանց –  Փիւնիկ ճակատումը վերջ գտաւ  2-2 հաւասարութեամբ:

ԵՈԻՐՈՓԱ  ԼԻԿ  ԲԱԺԱԿԻ  ԽՄԲԱԿԱՅԻՆ ՀԱՆԳՐՈՒԱՆԻ ՎԻՃԱԿԱՁԳՈՒԹԻՒՆԸ

Մոնաքոյի մէջ տեղի ունեցաւ  եւրոպական ակումբներու «Եուրոփա Գափ» բաժակի խմբային հանգրուանի մրցումներուն  վիճակաձգութիւնը: Ստորեւ վիճակաձգութեան արդիւնքները:

Ա. Խմբակ՝  Վալենսիա, Սուանսի Սիթի,   Գուպան,   Սանթ Կալեն:

Բ.Խմբակ՝  Փի. Էս. Վի. Այնտհովեն,  Տինամօ Խրուաթիա, Չերնոմորեց,  Լուտոկորեց:

Գ.Խմբակ՝ Սթանտարտ  Լիէժ,   Զալցպուրկ,  Էլֆեսպորկ,  Էսպերկ:

 Դ. Խմբակ՝  Ռուպին,  Ուիկան,  Մարիպոր,   Վարեկեմ:

Ե.Խմբակ՝  Ֆիորենթինա,  Տնեպր. Փաքոս  Ֆերէյրա,  Փանտուրի:

Զ.Խմբակ՝  Պորտօ,  Ապոյէլ Նիկոսիա,  Այնթրախթ Ֆրանքֆորթ,  Մաքապի  Թել Աւիւ:

 Է.Խմբակ՝  Տինամօ  Քիեւ, Կենք,  Ռափիտ Պուքարեստ,   Թուն:

 Ը.Խմբակ՝   Սեւիլիա,  Ֆրայպուրկ,  Ասթորիլ,  Լիպերեց:

Թ.Խմբակ՝  Լիոն,   Ռէալ Պեթիս, Կուիմարեշ,  Ռիյէքա Խրուաթիա:

Ժ.Խմբակ՝  Լեկիա Վարշաւա,  Տրապզոնսփոր,  Լացիօ Ռոմա, Ափոլոն Լիմասոլ:

   ԺԱ. Խմբակ՝  Թոթենհամ,  Անժի, Շերիֆ,  Թրոսմօ:

ԺԲ. Խմբակ՝  Ալքմաար,   ՓԱՕՔ Սալոնիք,  Մաքապի Թել Աւիւ, Շախտիոր:

ՄԱՐԶԱԿԱՆ ԿԱՐՃ  ԼՈՒՐԵՐ

-Եուվենթուսի յարձակող Ալեքսատրօ  Մաթրի  պաշտօնապէս  վերադարձաւ  Ա.Սէ. Միլան: Մաթրի իր ասպարէզը սկսած է Միլանէն, սակայն հիմնական կազմէն դուրս մնալու  պատճառով  միացած է  Եուվէին:  Մաթրի յայտնեց, թէ  ուրախ է, որ  ինը տարի ետք կը  վերամիանայ  Միլանին: Անոր փոխանցումը Միլանին արժեց  12  միլիոն եուրօ:

– Սպանիոյ ազգային խումբի մարզիչ  Վիչենթէ Տէլ Պոսքէ՝  Ֆեռնանտօ Թորէզը եւ Խուան Մաթան դուրս  ձգեց  Ուրբաթ, 6 Սեպտեմբերին,  Մոնտիալ 2014-ի զտման մրցումներու գծով Ֆինլանտայի  դէմ   մրցելիք  կազմէն:  Զոյգ ֆութպոլիստները նաեւ  մաս պիտի  չկազմեն Երեքշաբթի,  10 Սեպտեմբերին  Չիլիի դէմ Սպանիոյ հաւաքականին կատարելիք  բարեկամական մրցումին:

– Բռնցքամարտի  Համաշխարհային Ֆետերասիոնը  իր վերջին նիստին ուքրանացի  բռնցքամարտիկ  Վլատիմիր Քլիչքօն  ճանչցաւ իբրեւ տարուան լաւագոյն մարզիկը: Տարուան լաւագոյն կին բռնցքամարտիկը  ճանչցուեցաւ գերմանացի  Քրիսթինա  Համերը:

-Այաքսի եւ  Դանիոյ հաւաքականի    միջնապահ Քրիսթիան Էրիքսըն  միացաւ   Թոթենհամին:  Էրիքսըն Այաքսի կազմէն սկսած է խաղալ  2008-էն սկսեալ:  21-ամեայ ֆութպոլիստը  161 անգամ կրած է Այաքսի շապիկը, նշանակելով  33 կոլ:  Էրիքսընի փոխանցման սակը կը գնահատուի  12  միլիոն եուրօ:

– 2005  թուականին, լրագրողներուն առջեւ՝ «Աւելի լաւ է  գետնանոյշ վաճառեմ, քան միանամ Չելսիի նման  խեղճ խումբի մը» յայտարարող ֆութպոլիստ ՝ Սամուէլ Էթօ  միացաւ….Չելսիին: Անգլիական ակումբին համակիրները խոր հիասթափութեամբ ընդունեցին գամերոնցի մարզիկին  փոխանցումը:

– Արհեստավարժ բռնցքամարտի  երեք տարբեր  կարգերու աշխարհի նախկին ախոյեան՝ ֆիլիփինցի Նոնիտօ  Տոնըր (30 տարեկան) համաձայնեցաւ  փոխվրէժի մրցում մը  կատարել  Վախտանգ  Դարչինեանի դէմ:  37-ամեայ  Դարչինեան բազմիցս  առաջարկած է մրցիլ Տոնըրի դէմ եւ  միշտ  մերժուած:   Սակայն,  Տոնըր  ի վերջոյ ընդառաջեց Դարչինեանին:  Երկու  հսկաներուն  հանդիպումը  տեղի պիտի  ունենայ  Թեքսասի մէջ,  9 Նոյեմբերին:

– Մանչեսթըր Եունայթըտի յարձակող  Ուէյն Ռունի, վնասուածքի հետեւանքով պիտի բացակայի  Մոնտիալ  2014-ի  զտման  մրցումներու  գծով՝  Մոլտովայի (6 Սեպտեմբեր)  եւ  Ուքրանիոյ դէմ ( 10 Սեպտեմբեր) Անգլիոյ ազգային խումբին կատարելիք  մրցումներէն: 

– Ֆութպոլային փոխանցումներու սակարանին մէջ հաստատուեցաւ նոր մրցանիշ մը, երբ Թոթենհամի եւ  Ուէյլզի  միջնապահ Կարէթ Պէյլ պաշտօնապէս միացաւ Ռէալ Մատրիտին: Փոխանցման սակը կը գնահատուի  86  միլիոն  սթերլին: 24-ամեայ  Պէյլ վեց տարուան պայմանագրութիւն մը կնքեց սպանական ակումբին հետ:  Պէյլ՝ 2007-ին,Սաութեմթընէն  միացաւ Թոթենհամին փոխան  10  միլիոն սթերլին գումարի մը: Ան  142  մրցում կատարած է  լոնտոնեան կազմին շապիկով, նշանակելով  42 կոլ:

 

LEAVE A REPLY

Please enter your comment!
Please enter your name here