ՆԱԽԱԳԱՀ ՕՊԱՄԱ ՆԵՐԿԱՅԱՑՈՒՑԻՉՆԵՐՈՒ ՏԱՆ ԿԱՆԱՉ ԼՈՅՍԻՆ ԿԸ ՍՊԱՍԷ

0
133

 Միացեալ Նահանգներու  նախագահ Պարաք Օպամա լծուած է Ներկայացուցիչներու Տան մէջ, Սուրիոյ վրայ յարձակելու  մեծամասնութիւն ապահովելու աշխատանքին:  Օպամա դիմած է Հանրապետական  Ճոն Մաքքէյնի  օժանդակութեան: Վերջինս  քաջածանօթ է    Սուրիոյ դէմ իր կեցուածքներով:  Մաքքէյն կը նախընտրէ,  առանց  Ներկայացուցիչներու Տան հաւանութեան  ծանր հարուածներ հասցնել Սուրիոյ կառավարութեան, որպէսզի փոփոխութեան ենթարկուի  գետնի վրայ ուժերու  հաւասարկշռութիւնը:  Ան  նաեւ զգուշացուց,  թէ  Ներկայացուցիչներու Տան կողմէ  Սուրիոյ վրայ յարձակումը  մերժելը աղիտալի պիտի  ըլլայ  Միացեալ Նահանգներու համար:

Միւս կողմէ,  կարգ մը  Ծերակուտականներ, նախագահ Օպամայի  թելադրութեամբ  սկսած են  խմբագրել բանաձեւ: Միացեալ Նահանգներու պետական քարտուղար Ճոն Քերրի    հեռաձայնային հաղորդակցութիւն  մը ունեցաւ Իսրայէլի վարչապետ   Պենիամին Նեթանիահուի   հետ:  Քերրի, իր զրուցակիցին յայտնեց, թէ Սէուտական  Արաբիա, Արաբական Միացեալ Էմիրութիւններ եւ Թուրքիա պատրաստ են մասնակցելու Սուրիոյ դէմ զինուորական գործողութիւններուն:

Սուրիոյ  խորհրդարանի անդամ Խալէտ Ապուտ յայտարարեց, թէ  նախագահ Պարաք Օպամա,  Իրանի եւ  Ռուսիոյ հետ  բանակցութիւններ  սկսած է վարել, որովհետեւ կը նախազգայ Իսրայէլի անվտանգութեան  եւ  նաւթի  համաշխարհային սակին  վրայ յարձակումին ունենալիք հետեւանքները՝  :  

Ֆրանսայի  վարչապետ Ժան Մարք  Այրօ դիտել տուաւ, որ   քիմիական  զէնքի  գործածութեան համար Ասատի վարչակարգը պատժելու  քայլը, չի նշանակեր  զինք հեռացնել իշխանութենէն:  

ՄԱԿ-ի նախկին  ընդհանուր քարտուղար   Քոֆի Անան   մերժեց  ուժի ճանապարհով  Սուրիոյ հակամարտութեան  լուծումը:  Անան  նշեց, թէ  միջազգային ընտանիքը  ամէն բանէ առաջ պէտք է կասեցնէ արիւնահոսութիւնը՝ հասնելու   քաղաքական համաձայնութեան:

Գերմանիոյ հետախուզական ծառայութիւնը իր   համամտութիւնը յայտնեց  Ֆրանսայի եւ  Միացեալ Նահանգներու  գիտնականներուն այն տեսակէտին, թէ  Դամասկոսի արուարձաններուն  մէջ կիրառուած քիմիական զէնքին աղբիւրը   իշխանութիւնն է:   Հետախուզական ծառայութեան  ղեկավար  Կերհարտ  Շինտլէր  ըսաւ, թէ  միանշանակ ապացոյցներ չունի, որ կառավարական զօրքերը կիրառած են քիմիական զէնք, սակայն  իր կարծիքով,  աւելի ճշմարտանման կը նկատէ  այդ վարկածը:

 Պի.Պ.Սի.ն  հաղորդեց, թէ Իրանի նախկին նախագահ  Հաշեմի Ռաֆսանճանի  յայտարաած է, թէ  կը հաւատայ որ  նախագահ Պաշշար Ասատ կրնայ  քիմիական զէնք կիրառել   իր  երկրին քաղաքացիներուն դէմ:  Պի.Պի.Սի.  աւելցուց,թէ  վերոյիշեալ յայտարարութիւնը առաջին դէպքն է, ուր  Իրանի քաղաքական  գործիչներու տեսակէտները  չեն համընկնիր  նախագահ Պաշշար Ասատին աջակցելու վերաբերեալ:

Սուրիոյ  մօտ ՄԱԿ-ի   յատուկ   բանագնացի    գրասենեակի   ղեկավար  Մուխթար Լամանի զգուշացուց, որ երկրին մէջ բռնութեան աճը  պիտի յանգեցնէ   ցեղասպանութեան: Լամանիի  խօսքերով, աւելի խոցելի դարձած է ալաուի  փոքրամասնութեան վիճակը,իսկ քրիստոնեաները յաճախ կը դառնան յարձակումներու թիրախ: Ան  խիստ մտահոգիչ գտաւ սիւննիներու, ալաուիներու եւ  քրիստոնեաներու միջեւ կրօնական հիմքի  վրայ բռնութեան աճը եւ ցաւ յայտնեց որ  տարբեր  դաւանանքի սուրիացիներ դարեր  շարունակ ապրած են խաղաղ,սակայն այս վերջին երկու տարիներուն շարունակուող հակամարտութիւնը թշնամանք սերմանած է անոնց միջեւ:

Ռազմական գետնի վրայ,  Դամասկոսի ծայրամասերուն եւ   երկրի տարբեր  շրջաններու մէջ  տեղի ունեցող բախումներուն հետեւանքով  սպաննուեցան  340  ծայրայեղականներ:

LEAVE A REPLY

Please enter your comment!
Please enter your name here