ՆԱԽԱԳԱՀ ՍԸԼԷՅՄԱՆ ՊԱԱՊՏԱՅԻ ՅԱՅՏԱՐԱՐՈՒԹԵԱՆ ԿԷՏԵՐԸ ՅԱՐԳԵԼՈՒ ԿՈՉ Կ’ՈՒՂՂԷ ՔԱՂԱՔԱԿԱՆ ԿՈՂՄԵՐՈՒՆ

0
120

 Հանրապետութեան նախագահ  Միշէլ Սըլէյման   Պաապտայի պալատին մէջ ընդունեց  տնտեսական տարբեր յանձնախումբեր ներկայացնող   պատուիրակութիւններ եւ  քննարկեց  երկրին դիմագրաւած ընկերային, տնտեսական եւ  կենցաղային  դժուարութիւնները: Նախագահը ընդունեց  նախկին նախարար  Ատնան  Քասարը եւ անոր հետ քննարկեց երկիրը տնեսական ճգնաժամէն դուրս բերելու  կարելիութիւնները:  Սըլէյման նաեւ ընդունեց նախկին  փոխվարչապետ Սամիր Մուքպէլը, կենսոլորտի հրաժարեալ  նախարար Նազէմ Խուրին,բանակի ընդհանուր հրամանատար զօրավար Ժան Քահուաճին,  ընդհանուր անվտանգութեան ընդհանուր տնօրէն, հազարապետ Ապպաս Իպրահիմը եւ այլ անձնաւորութիւններ:

Սըլէյման  դիտել տուաւ, թէ  միջազգային  զարգացումները  լիբանանցիներուն կը թելադրեն կառչած մնալ Պաապտայի  Յայտարարութեան եւ  չէզոք դիրք որդեգրել շրջանային զարգացումներուն  նկատմամբ:

Նոր կառավարութեան կազմութեան ուղղութեամբ, հաւաստի աղբիւրներ դրական տեղաշարժեր  նկատել կու տան  Մարտ 8-ի եւ 14-ի ուժերուն մէջ: Նախագահ Սըլէյման  իր այցելուներուն կը փոխանցէ, թէ  Սէուտական Արաբիա հրաժարած  է նոր   կառավարութեան մէջ Հըզպալլայի մասնակցութեան  դէմ վեթոյէն:  Սակայն այլ աղբիւրներ կը յայտնեն,թէ  Հըզպալլա  կը շարունակէ  պնդել  արգելակող  մէկ երրորդի լիազօրութեան  մասին իր  ծանօթ  պայմանը: Մարտ 14-ի աղբիւր մը  Թամամ Սալամին  փոխանցած է , թէ առարկութիւն չի տեսներ  բոլոր կողմերու մասնակցութեամբ կառավարութեան մը դէմ, պայմանաւ որ  մասնակից կողմերը յանձնառու մնան Պաապտայի Յայտարարութեան:

Ապահովական գետնի վրայ,  հանրապետութեան նախագահ Միշէլ Սըլէյման՝  Լիբանանը շրջանային զարգացումներէն  հեռու պահելու լուրջ երաշխիքներ ստացած է   միջազգային ընտանիքի ներկայացուցիչներէն: Անոնք շեշտած են Լիբանանի  ապահովական եւ քաղաքական կայունութեան  նախանձախնդիր  մնալու իրենց յանձնառութիւնը:  Այս առիթով,  Պաապտայի պալատէն հաղորդուեցաւ, թէ Նիւ Եորքի մէջ, Լիբանանի  զօրակցութեան  համար միջազգային խորհրդաժողովին  օրակարգերը պիտի  ըլլան՝  Լիբանանի կայունութիւնը, անոր սահմանադրական, ապահովական կառոյցնեու պահպանութիւնը, սուրիացի  գաղթականներուն առաջնային  օգնութեան եւ տարբեր տեսակի օժանդակութիւններու յատկացումը:  Նշենք, թէ նախագահ Սըլէյման պիտի գլխաւորէ Նիսի մէջ  կայանալիք Ֆրանքոֆոնեան  խաղերու լիբանանեան պատուիրակութիւնը:  Այս  ծիրին մէջ  Սըլէյման  հանդիպում մը  նախատեսուած է, որ ունենայ Ֆրանսայի իր պաշտօնակիցին  Ֆրանսուա Հոլանտի հետ:

LEAVE A REPLY

Please enter your comment!
Please enter your name here