ԵԱՀԿ ԱՄԵՐԻԿԱՑԻ ՆՈՐ ՀԱՄԱՆԱԽԱԳԱՀԸ ԱՐՑԱԽ ՊԻՏԻ ԱՅՑԵԼԷ

0
116

ԵԱՀԿ Մինսքի խմբակի ամերիկացի նոր համանախագահ Ճէյմզ Ուորլիք մօտ  ապագային Արցախի հիմնահարցի գծով տարածաշրջան պիտի այցելէ. այս մասին տեղեկացուցած է դիւանագէտը իր «Թուիթըր»ի էջին վրայ: Ան կը պատրաստուի այցելելու Հայաստան, Ատրպէյճան եւ Լեռնային Ղարաբաղ: «Այցելութեանս նպատակն է սկսիլ Լեռնային Ղարաբաղի հարցի կարգաւորման գործին մէջ ջանքերս ներդնելու գործընթացին», գրած է ան:
 6 Օգոստոսին, Միացեալ Նահանգներու պետական քարտուղար Ճոն Քերրի ԵԱՀԿ Մինսքի խմբակի ամերիկացի նոր համանախագահ նշանակեց Ուորլիքը, որ նախապէս եղած էր Աֆղանիստանի եւ Փաքիստանի մօտ Միացեալ Նահանգներու յատուկ ներկայացուցիչ եւ Աֆղանիստանի հետ ապահովական պայմանագիրի գլխաւոր բանակցող:
2009-2012ին, Ուորլիք եղած է Պուլկարիոյ մօտ Միացեալ Նահանգներու դեսպան, իսկ 2006-2009ին՝ Միջազգային կազմակերպութիւններու հարցերով գրասենեակին մէջ արտաքին պետական քարտուղարի առաջին փոխտեղակալ: 2005-2006ին եղած է Եւրոպական Ապահովութեան եւ Քաղաքական Հարցերու գրասենեակի տնօրէն:

 

LEAVE A REPLY

Please enter your comment!
Please enter your name here