ՆԱԽԱԳԱՀ ՍԸԼԷՅՄԱՆ ԵՒ ՍԱԼԱՄ ՔՆՆԱՐԿԵՑԻՆ ԿԱՌԱՎԱՐՈՒԹԵԱՆ ԿԱԶՄՈՒԹԵԱՆ ԵՒ ԱՅԼ ՀՐԱՏԱՊՈՒԹԻՒՆ ՆԵՐԿԱՅԱՑՆՈՂ ՀԱՐՑԵՐ

0
105

Նորանաշանակ վարչապետ Թամամ Սալամ երէկ առաւօտեան այցելեց Պաապտայի  պալատ եւ   հանդիպում մը  ունեցաւ   նախագահ Միշէլ Սըլէյմանի հետ: Հանրապետութեան նախագահը Սալամի հետ  քննարկեց երկրին ապահովական իրավիճակը եւ  նոր կառավարութիւն կազմելու կարելիութիւնները:  Սըլէյման ընդգծեց, թէ  տնտեսական յանձնախումբերու   նշած նկատողութիւնները մեծամասնութեամբ արդար են  եւ անոնց բողոքը կը ներկայացնէ  երկիրը  անդունդէն  փրկելու իսկական  ճիչ մը, որ  միաժամանակ կը հաստատէ  կառավարութիւնը շուտափոյթ կազմելու անհրաժեշտութիւնը:

Հանդիպումէն ետք, Սալամ  յայտնեց, թէ  հինգ ամիսներ անցած են իր նշանակումէն, սակայն  որոշ կողմեր, իրենց քաղաքական ախորժակներուն  պատճառով   չեն դիւրացներ կառավարութիւն կազմելու  աշխատանքները: Սալամ  հաստատելով հանդերձ, որ կացութիւնը ծանր է, ընդգծեց թէ պիտի  չյուսահատի եւ  շարունակէ կառավարութիւն կազմելու  իր  պարտականութիւնը:  Սալամ յատուկ  շնորհակալութիւն յայտնեց Նեպիհ Պըրրիին եւ Ուալիտ Ճոմպլաթին՝ կառավարութիւն կազմելու  ուղղութեամբ իրեն ցուցաբերած օգնութեան համար:

Սալամ  հեռախօսազրոց մը ունեցաւ նախկին վարչապետ  Սաատ Հարիրիի հետ: Վերջինս Սալամին  փոխանցեց, թէ նախարար Ուայէլ Ապու Ֆաուրի հետ  խորհդակցութիւնները չեն հասած դրական եզրակացութեան: Հարիրի նաեւ  փոխանցեց, թէ Ռիատի  մթնոլորտը  չի հաստատեր  մօտակայ  օրերուն  նոր կառավարութիւն մը  կազմելու  նախանշաններ:

Նախագահ Սըլէյման   Պաապտայի  պալատին մէջ   ընդունեց արդարադատութեան նախարարի  պաշտօնակատար Շեքիպ Ղըրթպաուին,  երեսփոխան Ահմէտ Ֆաթֆաթը, նախկին նախարար Ֆարես Պուէյզը, արտաքին առեւտուրի խորհրդականներու ֆրանսական պատուիրակութիւն մը, Լիբանանի մօտ Ֆրանսայի դեսպան  Փաթրիս Փաուլիի ընկերակցութեամբ:

Լոնտոնի մէջ լոյս տեսնող «Ալ Հայեաթ» օրաթերթը կը գրէ, թէ  Սալամի եւ  Մարտ14-ի ուժերուն միջեւ  որոշ  տարակարծութիւններ ծագած են, կառավարութեան կազմին մէջ նախատեսուած  անձնաւորութիւններու անուններուն  վերաբերեալ:

LEAVE A REPLY

Please enter your comment!
Please enter your name here