ՅԱՋՈՐԴԱԿԱՆ ՊԱՏԱՐԱԳՆԵՐ ԱՂԹԱՄԱՐԻ ԵՒ Ս. ԿԻՐԱԿՈՍ ԵԿԵՂԵՑԻՆԵՐՈՒՆ ՄԷՋ

0
127

Վանի Աղթամար կղզիի Սուրբ Խաչ եկեղեցւոյ ու Տիարպեքիրի Սուրբ Կիրակոս եկեղեցւոյ մէջ իրականացուելիք պատարագները այս տարի առաջին անգամ ըլլալով իրարու պիտի յաջորդեն, որովհետեւ առաջինը տեղի պիտի ունենայ Կիրակի,  8 Սեպտեմբերին, իսկ երկրորդը՝  10 Սեպտեմբերին:
Վանի Աղթամար կղզիի Ս. Խաչ եկեղեցիին պատարագը պիտի կայանայ այնպէս, ինչպէս նախատեսուած է՝ Սեպտեմբերի առաջին Կիրակի օրը: Նկատի առնելով այն հանգամանքը, որ մեծ թիւով ուխտաւորներ Վան պիտի այցելեն այս առիթով, որոշուած է Սուրբ Կիրակոսի մէջ կայանալիք պատարագը իրականացնել Սուրբ Խաչի պատարագէն 2 օր ետք՝ հնարաւորութիւն ստեղծելով Ս. Խաչի պատարագին մասնակցող ուխտաւորներուն, որ մասնակցին Ս. Կիրակոսի պատարագին եւս:
Նախորդ քանի մը տարիներուն Աղթամարի պատարագը տեղի ունեցած է Սեպտեմբերի առաջին Կիրակին, իսկ Ս. Կիրակոսի պատարագը՝ Հոկտեմբերին կամ Նոյեմբերին:
Թուրքիոյ Ճամբորդական գործակալութիւններու միութեան Վանայ շրջանի գործադիր մարմինի նախագահ Ապտուլլա Թունչտեմիր դիտել տուած է, որ Աղթամար կղզիի եկեղեցւոյ ուխտագնացութեան մասին հետաքրքրութիւնը տարուէ տարի կը նուազի։ «Այս մէկը չորրորդ տարին է եւ մինչ կը սպասուէր, որ աշխարհի ամէն կողմէն հայերու հետաքրքրութիւնը հետզհետէ պիտի աւելնայ, հակառակը կը պատահի, եւ հիմա պէտք է փնտռել այս նահանջին պատճառները», ըսած է ան։ Թունչտեմիր յիշեցուցած է, թէ առաջին տարին մեծ խանդավառութիւն ստեղծուած էր, սակայն հիմա այդ նոյն խանդավառութիւնը չկայ։
«Արդեօք մե՞նք չկրցանք անհրաժեշտ ծանօթացումը ընել», հարց տուած է Թունչտեմիր եւ աւելցուցած, որ անպայման քայլեր պէտք է առնուին, որպէսզի զբօսաշրջիկներուն թիւը ամէն տարի աւելի բարձրանայ։ «Վանի մէջ ամէն մարդ իրեն վիճակուած պարտականութիւնը պէտք է կատարէ։ Մենք աշխարհի բոլոր հայերուն հրաւէր կ՛ուղղենք: Ահաւասիկ եկեղեցին վերանորոգեցինք. խաչ ըսին՝ խաչն ալ դրինք. մենք մեր պարտականութիւնը կատարեցինք։ Հիմա կը սպասենք, որ անոնք աւելի մեծ թիւով գան հոս։ Մեր միակ պակասը անոնց բացակայութիւնն է», ըսած է ան։

 

LEAVE A REPLY

Please enter your comment!
Please enter your name here