ՎԱՆ ՌՈՄՊԷՅ ՝ ՀԱՅԱՍՏԱՆ ՊԷՏՔ Է ՅՍՏԱԿԱՑՆԷ ԻՐ ԴԻՐՔԸ

0
120

Եւրոմիութեան համար կարեւորութիւն ներկայացնող Հայաստանը, Մոլտովիան եւ Ուքրանիան պէտք է յստակացնեն իրենց սեփական ուղին: «Ռեգնում» լրատուական գործակալութեան համաձայն, Սան Փեթերսպուրկի մէջ տուած  դասախօսութեան ընթացքին այս տեսակէտը արտայայտած է Եւրոպական խորհուրդի նախագահ Հերման Վան Ռոմպէյը:
«Մենք ունինք ընդհանուր սահմաններ եւ ընդհանուր դրացիներ: Ուքրանիան, Հայաստանը, Մոլտովիան, որոնք երկուքիս համար ալ կարեւորութիւն ունին, պէտք է յստակացնեն իրենց սեփական ուղին: Սակայն մեր տեսանկիւնէն, Ուքրանիոյ համար Եւրամիութեան հետ համարկման համաձայնագիրը վնաս չի հասցներ Ռուսիոյ հետ վաղեմի յարաբերութիւններուն: Ինչո՞ւ պէտք է առաջադրել «կա՛մ-կա՛մ»ի խնդիր», հարց տուած է Ռոմպէյ:
Ան ընդգծած է, որ եւրոպական մայր ցամաքին վրայ կարելի չէ հասնիլ կայուն անվտանգութեան, եթէ Ռուսիան ու Եւրամիութիւնը սերտօրէն չհամագործակցին:
«Մենք արդէն իսկ շատ բան ըրած ենք «պաղ պատերազմի» աւարտէն ետք եւ կրնանք հպարտանալ ատով: Միասին մենք պէտք է ընենք աւելին եւ փորձենք լուծել այսպէս կոչուած «ձգձգուող» հակամարտութիւնները, որոնք դեռ առկայ են մեր ընդհանուր դրացիներուն մօտ, ինչպիսին է Մոլտովիոյ մէջ մերձտնեսթրեան հակամարտութիւնը», յայտարարած է Եւրոպական խորհուրդի ղեկավարը:
Աղբիւրը հետաքրքրական նկատած է այն, որ Ռոմպէյ չէ յիշատակած Վրաստանն ու Ատրպէյճանը շարքին այն երկիրներուն, որոնք նոյնպէս մասնակից են Եւրոպական Միութեան «Արեւելեան գործընկերութեան» ծրագիրին:

 

LEAVE A REPLY

Please enter your comment!
Please enter your name here