ՃՈՆ ՔԵՐՐԻ ՍՈՒՐԻՈՅ ԴԷՄ ԴԱՇՆԱԿԻՑՆԵՐ ԿԸ ՓՆՏՌԷ ԵՒՐՈՊԱՅԻ ՄԷՋ

0
129

Միացեալ Նահանգներու  պետական քարտուղար Ճոն Քերրի   եւրոպական ցամաքամասի մէջ դաշնակիցներ կը փնտռէ՝ Սուրիոյ վրայ յարձակելու համար:  Քերրի երէկ մասնակցեցաւ Վիլնիուսի մէջ  տեղի ունեցող  Եւրոպական Միութեան արտաքին գործոց նախարարներու նիստին: Նախքան Ուաշինկթըն  վերադարձը,  Քերրի պիտի  այցելէ Փարիզ եւ  Լոնտոն: Սկզբունքով,  Քերրի Կիրակի օր, Լոնտոնի  մէջ հանդիպում մը պիտի  ունենայ Պաղեստինեան Իշխանութեան  նախագահ Մահմուտ Ապպասին  հետ:

Սուրիոյ   ծայրայեղականները  սկսած են  բացայայտօրէն սպառնալ  ՄԱԿ-ի  աշխատակիցներուն: Մանաւանդ, անոնց՝ որոնք  օգնութիւն  կը ցուցաբերեն   ժողովուրդին: Ծայրայեղականները  կը սպառնան ՄԱԿ-ի  ծառայողներուն կեանքին:

ՄԱԿ-ի  մօտ  Սուրիոյ   ներկայացուցիչ Պաշշար  Ճաաֆարի  ՄԱԿ-ի ընդհանուր քարտուղար Պան Քի Մունին եւ ՄԱԿ- Անվտանգութեան Խորհուրդին  յղուած  երկու  տարբեր նամակներու մէջ դատապարտեց  զինեալներ  հովանաւորելուեւ  վարչակարգին դէմ պայքարելու  Սէուտական Արաբիոյ  ընթացքը: Մեքսիքոյի նախագահ  Էնրիքէ  Պենիա Նիթօ  ըսաւ, թէ  միայն  ՄԱԿ-ի   որոշումը  ընդունելի պիտի   ըլլայ իր երկրին համար:  Ան դատապարտեց  առանց ՄԱԿ-ի հաւանութեան՝  Ուաշինկթընի արշաւը:

Անթաքիոյ եւ Արեւելքի  յոյն  կաթողիկէ   համայնքի Կրեկորիոս  Գ. Լահամ պատրիարքը  ցաւով  յայտարարեց, թէ Մաալուլա   քաղաքի   բնակչութեան  ութսուն առ  հարիւրը  հեռացած  է  բնակարաններէն:  Քրիստոնեայ այս գիւղին մէջ մնացած են միայն  ծերերը եւ  անկարները:  Լահամ պատրիարքը աշխարհի բոլոր ժողովուրդներէն  խնդրեց աղօթել Սուրիոյ համար:

 Միացեալ Նահանգներու Գոնկրէսի   Հայաստանի աջակցութեան խումբի  համանախագահ, Մայքըլ Կրիմ յայտարարեց, թէ  հրաժարած է պաշտպանելէ  Սուրիոյ   նկատմամբ  ամերիկեան արշաւը: Կրիմ յայտնեց, թէ  ինք եւ բազմաթիւ  գոնկրէսականներ դէմ են Սուրիոյ վրայ   միակողմանի  գործողութիւններուն:

Միացեալ Նահանգներու Ծերակոյտը  Չորեքշաբթի 11  Սեպտեմբերին պիտի  քննարկէ Սուրիոյ վրայ  յարձակելու բանաձեւը: Քաղաքական մեկնաբաններու կարծիքով՛ Ծերակոյտի անդամներուն  մէկ երրորդը  տակաւին չէ կողմնորոշուած Սուրիոյ հարցով:  Միւս կողմէ,  Ներկայացուցիչներու Տունը առնուազն երկու շաբաթ ետք որոշում պիտի  ընդունի Սուրիոյ հարցով: Ամերիկեան կարգ մը  օրաթերթեր կը գրեն, թէ  նախագահ Պարաք Օպամա կրնայ  ջնջել  Գոնկրէսի մէջ  Սու րիոյ թղթածրարին   քուէարկութիւնը եւ հրաժարիլ արշաւէնղ

Արժանթինի նախագահ  Քրիսթինա  Տէ  Քիրշնէր, յարձակում կազմակերպելու  փոխարէն,  մարդասիրական առաքելութեամբ  Սուրիա ուղարկել  առաջարկեց ՄԱԿ-ի Ապահովութեան Խորհուրդի մնայուն  հինգ անդամ պետութիւններու արտաքին  գործոց նախարարները:  

ՄԱԿ-ի եւ Արաբական  Լիկայի պատուիրակ Լախտար Իպրահիմի  յայտարարեց, թէ ոչ մէկ  պետութիւն կրնայ յարձակիլ Սուրիոյ վրայ, առանց ՄԱԿ-ի հաւանութեան:

LEAVE A REPLY

Please enter your comment!
Please enter your name here