ՃՈՆ ՔԵՐՐԻ ՔԻՄԻԱԿԱՆ ԶԷՆՔԵՐԸ ՅԱՆՁՆԵԼՈՒ ՊԱՅՄԱՆԱԺԱՄ ԿՈՒ ՏԱՅ ԴԱՄԱՍԿՈՍԻՆ…

0
127

Միացեալ Նահանգներու պետական  քարտուղար  Ճոն Քերրի   Լոնտոնի մէջ  հանդիպում մը ունեցաւ Բրիտանիոյ արտաքին գործոց նախարար   Ուիլիյըմ Հէյկի հետ եւ  քննարկեց Սուրիոյ   իրավիճակը: Հանդիպումէն ետք,  երկու նախարարները կնքեցին միացեալ մամլոյ ասուլիս  մը, որուն ընթացքին  Հէյկ  յայտնեց, թէ  Բրիտանիա պիտի շարունակէ զէնք մատակարարել Սուրիոյ ընդդիմութեան: Ան ընդգծեց,թէ  դիւանագիտական  լուծումը  կը մնայ հակամարտութեան  վերջ դնելու լաւագոյն   ճանապարհը: Բրիտանացի նախարարը աւելցուց, թէ Ռուսիոյ հետ  համագործակցելով  քաղաքական  լուծում մը պիտի  գտնեն հակամարտութեան: Իր կարգին, Քերրի   յայտնեց, թէ  Բրիտանիոյ հետ   փոխյարաբերութիւնները աւելի   խորունկ են, քան՝  քուէարկութիւն մը, կամ՝ որեւէ  հարց :  Քերրի  եւս նշեց, թէ  նախագահ  Պարաք Օպամա,ինք՝ եւ  շատ շատեր    քաղաքական լուծումի մէջ կը տեսնեն  տագնապին  ելքը:  Պետական  քարտուղարը   շեշտեց, թէ պէտք  չէ   առիթ  ընծայել  նախագահ Ասատին, կրկին  օգտագործելու  քիմիական զէնք: Այս առիթով, Քերրի կատարեց  տարօրինակ առաջարկ մը: Ան նախագահ Ասատին  մէկ  շաբաթ պայմանաժամ տուաւ յանձնելու  անոր մօտ գտնուող  քիմիական զէնքերը՝  զինուորական յարձակումը խնայելու  նպատակով:

Մոսկուայի մէջ Ռուսիոյ արտքին գործոց  նախարար  Սերկէյ Լաւրով ընդունեց  Սուրիոյ իր պաշտօնակիցին՝  Ուալիտ Մոալլէմին:  Լաւրով  դիտել տուաւ, թէ Սուրիոյ վրայ որեւէ յարձակում պատճառ պիտի  դառնայ  շրջանին մէջ ահաբեկչութեան տարածումին: Լաւրով  յայտնեց, թէ  Սուրիա  յանձնառու կը մնայ «Ժընեւ -2» խորհրդաժողովին  մասնակցելու իր խոստումին: Ռուսիոյ արտաքին գործոց նախարարը արեւմտեան  պետութիւններէն  պահանջեց ճնշում  բանեցնել Սուրիոյ ընդդիմութեան վրայ, որպէսզի  առանց որեւէ նախապայմաններու  մասնակցի  «Ժընեւ  -2» խորհրդաժողովին:

ՄԱԿ-ի կից մարդու իրաւունքներու  պաշտպանութեան պաշտօնակատար  Նաւի Փիլայ  դիտել տուաւ,  որ միայն    երկխօսութեան  ճանապարհով կարելի պիտի  ըլլայ  լուծել  Սուրիոյ   հակամարտութիւնը: Ան զգուշացուց Սուրիան հարուածելու հետեւանքներէն,  նշելով որ  յարձակումի պարագային շրջանային  պատերազմ  մը կրնայ ծագիլ Միջին Արեւելքի մէջ:

Իրանի խորհրդարանի արտաքին  յարաբերութիւններու  յանձնախումբի  պետ Ալլէ Էլտտին Պրուժարտի  յայտարարեց, թէ  իր երկիրը  ձեռնածալ պիտի չմնայ Սուրիոյ դէմ  ապօրէն եւ անտրամաբանական  յարձակումի մը պարագային:

Հալէպի    քաղաքի ընդհանուր միւֆթի  շէյխ  Մահմուտ Աքքամ  հարցուց, թէ ո՞վ  Միացեալ Նահանգներուն  շնորհած է  ֆաշական դաստիարակչական   հովանաւորչութիւն, որպէսզի  քմահաճօրէն յարձակումներ կատարէ  աջ ու ձախ:  Աքքամ դատապարտեց  Սուրիոյ  հակամարտութեան արտաքին միջամտութիւնները: Սուրիոյ   տեղեկատուութեան նախարար Օմրան   Զըղպի  յայտարարեց, թէ սուրիական հողերու վրայ կռուող  ահաբեկչական կազմակերպութիւնները կը  ներկայացնեն ամերիկեան ցամաքային  զօրքերը:

LEAVE A REPLY

Please enter your comment!
Please enter your name here