ՍՈՒՐԻՈՅ ՀԱԿԱՄԱՐՏՈՒԹԻՒՆԸ ԴԻՒԱՆԱԳԻՏԱԿԱՆ ՃԱՆԱՊԱՐՀՈՎ ԼՈՒԾԵԼՈՒ ՔԱՅԼԵՐԸ ԳԵՏԻՆ ԿԸ ՇԱՀԻՆ

0
140

Սուրիոյ   հակամարտութեան  դիւանագիտական առիթ  ընծայելու նախագահ Պարաք  Օպամայի  ընտրանքը, աստիճանական   սառցահալ  մը  սկսած է  արձանագրել  միջազգային  քաղաքական բեմին վրայ:  Սուրիոյ վրայ   յարձակումի բանաձեւը  յետաձգելու՝  Ծերակոյտին եւ  Ներկայացուցիչներու  Տան  նախագահ  Պարաք Օպամայի    դիմումը,  երկխօսութեան նոր էջ մը  բացած է Մոսկուա-  Ուաշինկթըն փոխյարաբերութիւններուն  միջեւ:  Այս առիթով,  Ռուսիոյ նախագահ  Վլատիմիր Փութին,  Օպամայէն   պահանջեց  վերջնականապէս  հրաժարիլ  ռազմական ընտրանքէն՝   քիմիական  զէնքերու բանակցութիւններուն անցնելու  նպտակով: Նախագահ Օպամա  ընդգծեց, թէ  Սուրիոյ  մէջ  ստեղծուելիք  քաոսէն   օգտուողը  պիտի  ըլլայ  Ալ Քայիտան:

Պահրէյնի արտաքին գործոց նախարար շէյխ Խալէտ Պըն Ահմէտ Ալ Խալիֆա  շեշտեց, թէ Արաբական Ծոցի Համագործակցութեան անդամ պետութիւնները  կը մերժեն  Սուրիոյ դէմ  ռազմական ընտրանքը:  Միւս կողմէ,  ողջունելով  հանդերձ Ռուսիոյ նախաձեռնութիւնը, Արաբական Լիկան,  ընդհանուր  զինադադար  հաստատելու  բանաձեւ մը  պահանջեց ՄԱԿ-էն:

Այսօր՝  Հինգշաբթի,  Ժընեւի  մէջ   Միացեալ Նահանգներու պետական քարտուղար Ճոն Քերրի եւ  Ռուսիոյ արտաքին գործոց նախարար Սերկէյ Լաւրով հանդիպում մը պիտի ունենան եւ քննարկեն Սուրիոյ իրավիճակը:  Ռուսիոյ խորհրդարանի  միջազգային յարաբերութիւններու պետ  Ալեքսէյ   Փոշքով  յայտնեց, թէ Մոսկուա բաւարար ապացոյցներ  փոխանցած է ՄԱԿ-ին՝ փաստելու, թէ  Սուրիոյ  ընդդիմութիւնը օգտագործած էր  քիմիական զէնքը:

Քրեմլին հաղորդեց, թէ  նախագահ Վլատիմիր Փութին այսօր՝  Հինգշաբթի, Մոսկուայի մէջ  պիտի   ընդունի Ապու Տապիի  գահաժառանգ՝ շէյխ Մուհամմէտ Պըն  Զէյիտ Ալ Նիհիանը եւ քննարկէ Սուրիոյ իրավիճակը:

Սուրիոյ իրադրութեան վերաբերեալ ՄԱԿ-ի նոր տեղեկագիրը կը հաստատէ, թէ  հակամարտութեան երկու կողմերը  կը կատարեն  պատերազմական եւ  մարդկութեան  դէմ ուղղուած  յանցագործութիւններ: ՄԱԿ-ի խօսնակ մը  յայտարարեց, թէ Սուրիոյ հակամարտութիւնը անմիջական չորս միլիոն  քաղաքացիներու  պատճառած է վնաս: Տեղեկագիրը կը հաւաստէ, թէ երեսուներեք պետութիւններու զինեալներ  կը կռուին սուրիական իշխանութիւններուն դէմ:

 Ապահովական  գետնի վրայ յստակացաւ ծայրայեղականներու կողմէ ազատ արձակուած     հալէպահայ չորս երիտասարդներուն անունները.  Կարօ  Պապօղլեան,  Սարգիս Ասատուրեան,  Նարեկ Վարժապետեան,  Գարեգին Հացագործեան:  Իսկ  հայաշատ Սուլէյմանիէի մէջ ինկած   հրթիռին հետեւանքով զոհուած են  Ճորճ Գույումճեանը,  Հրայր  Թարախճեանը եւ Մհեր Էօրտեքեանը:

LEAVE A REPLY

Please enter your comment!
Please enter your name here