ՔԵՐՐԻ ՀԵՌԱՁԱՅՆԱՅԻՆ ՀԱՂՈՐԴԱԿՑՈՒԹԻՒՆ ՄԸ ՈՒՆԵՑԱՒ ՍԸԼԷՅՄԱՆԻ ՀԵՏ

0
108

Հանրապետութեան նախագահ Միշէլ Սըլէյման հեռաձայնային հաղորդակցութիւն  մը ունեցաւ Միացեալ Նահանգներու  պետական քարտուղար  Ճոն Քերրիի հետ:  Հեռախօսազրյոցը կեդրոնացաւ  եկկողմ յարաբերութիւններու եւ   շրջանային զարգացումներու վրայ:  Սըլէյման  շեշտեց  Սուրիոյ  մէջ քիմիական   զէնք կիրառողները պատասխանատուութեան հրաւիրելու անհրաժեշտութիւնը  եւ մերժեց  Սուրիոյ վրայ  արտաքին  ռազմական միջամտութիւնները:  Սըլէյման մաղթեց  քաղաքական  լուծում  գտնել Սուրիոյ հակամարտութեան:

Այլ գետնի վրայ, հանրապետութեան նախագահը կ’աճապարէ լուծելու կառավարութեան  կազմութեան առջեւ յամեցող արգելքները: Հարապետութեան նախագահը իր այցելուներուն  յայտնեց, թէ կառավարութիւնը պիտի ունենայ ազգային տարազ եւ պիտի  ընդգրկէ բոլոր   հոսանքները:  Ան նշեց, թէ  ոչ մէկ հատուած պիտի  վայելէ  արգելակող մէկ երրորդի  մենաշնորհը եւ բոլորը՝ անխտիր կառչած պիտի  ըլլան Պաապտայի Յայտարարութեան: Ան նաեւ  պաշտօնապէս   ընդգծեց, թէ Սէուտական Արաբիա ոչ մէկ առարկութիւն  ունի կառավարութեան կազմին մէջ Հըզպալլայի մասնակցութեան դէմ:  Կառավարութեան կազմութենէն առկախ,  նախագահ Սըլէյման  փարատեց   իր պաշտօնավարութիւնը   երկարաձգելու մասին  խօսակցութիւնները, յայտնելով  թէ անմիջապէս  վիճարկման հայց պիտի  ներկայացնէ նման   որոշումի մը  պարագային: Նախագահ Սըլէյման  երէկ ընդունեց  ներքին գործոց նախարարի պաշտօնակատար Մարուան Շարպէլը,  նախկին նախարարներ  Նեժի Պուսթանին,  Զիատ Պարուտը, դատաւոր  Մարուան Ապուտը եւ  ուրիշներ:

Խորհրդարանի նախագահ Նեպիհ Պըրրի յայտնեց, թէ  որեւէ նորութիւն չկայ կառավարութեան  կազմութեան  վերաբերեալ: Ան  շեշտեց, թէ քաղաքական բոլոր հոսանքները անխտիր՝  մաս պիտի կազմեն  կառավարութեան: Պըրրի  ընդունեց  Ազէզի մէջ առեւանգուած  լիբանանցիերու հարազատները ներկայացնող պատուիրակութիւն մը:

LEAVE A REPLY

Please enter your comment!
Please enter your name here