ԼԱՒՐՈՎ՝ ՊԷՏՔ Է ՕԳՏՈՒԻԼ ՍՈՒՐԻՈՅ ԽԱՂԱՂՈՒԹԵԱՆ ՀԱՄԱՐ ԸՆՁԵՌՈՒԱԾ ԱՌԻԹԷՆ

0
133

Ժընեւի մէջ    կայացաւ  Սուրիոյ հակամարտութեան  վերաբերեալ Ռուսիոյ արտաքին գործոց նախարար  Սերկէյ Լաւրովի եւ Միացեալ Նահանգներու  պետական քարտուղար Ճոն Քերիի  հերթական հանդիպումը:  Հանդիպման  միաժամանակ մաս կազմեցին զոյգ երկիրներէն  ժամանած  քիմիական մասնագէտներ:Լաւրով իր  ամերիկացի   պաշտօնակիցին   յայտնեց, թէ  պէտք է  օգտուիլ Սուրիոյ խաղաղութեան  համար ներկայացած առիթէն:

 Հանդիպման նախօրէին, այսպէս կոչուած Սուրիոյ  ազատ  բանակը մերժեց  երկրին քիմիական  զէնքերը միջազգային  հովանաւորութեան  տակ  առնելու  Ռուսիոյ  նախաձեռնութիւնը:  Նախագահ Վլատիմիր Փութին յայտարարեց, թէ Սուրիոյ ծայրայեղականները  միտումնաւոր կերպով   օգտագործած են քիմիական զէնք՝ ամերիկեան  հաւանական միջամտութիւն մը  ակնկալելու միտումով:  Փութին   մերժեց  սուրիական բանակին դէմ ամբաստանութիւնները, զանոնք որակելով  արեւմտեան քարոզչութիւն:  Ռուսիոյ նախագահը դատապարտեց եւ  մերժեց Սուրիոյ հակամարտութեան արտաքին որեւէ միջամտութիւն, զայն նկատելով  միջազգային  օրէնսդրութեան խախտում:  Ան ըսաւ, թէ Սուրիան հարուածելը, պիտի  բարձրացնէ ահաբեկչութեան նոր ալիք:

 Գահիրէի մէջ   համախմբուած Արաբական Լիկայի անդամ պետութիւններու արտաքին  գործոց նախարարները  ողջունեցին  Սուրիոյ քիմիական զէնքերուն վերաբերեալ  Ռուսիոյ նախաձեռնութիւնը:

Ֆրանսայի արտաքին գործոց նախարար Լորան Ֆապիւս յայտարարեց, թէ  Սուրիոյ մէջ քիմիական զէնքի կիրառման  վերաբերեալ ՄԱԿ-ի հետաքննիչներու  տեղեկագիրը ամենաուշը պիտի  հրապարակուի Երկուշաբթի օր:

Լատին ամերիկեան երկիրներու Պոլիվարիան Դաշինքի  անդամ պետութիւնները մարդասիրական  օժանդակութիւն եւ սննդամթերք  առաքեցին Սուրիա:

LEAVE A REPLY

Please enter your comment!
Please enter your name here