ՄԱՐԶԱԿԱՆ – ՄԵՍԻԻ ԵՐԱԶԱՆՔԸ

0
127

Արժանթինի հաւաքականի եւ Պարչելոնայի յարձակող Լիոնէլ Մեսի կ’երազէ  Մոնտիալի բաժակակիր դառնալ .« Կ’երազեմ  աշխարհի ախոյեանութիւնը շահիլ:  Սակայն   երկար  աշխատանք   կայ  մեր առջեւ». խոստովանեցաւ ան:  26-ամեայ  ֆութպոլիստը Արժանթինի  հաւաքականին հետ նշանակած կոլերուն թիւը  բարձրացուց 37-ի՝  դառնալով  հաւաքականի պատմութեան երկրորդ լաւագոյն   ռմբարկուն: Սոյն  մրցանիշը կը պատկանի Կապրիէլ Պաթիսթութային՝ 56 կոլ:

Լիոնէլ Մեսի   ներկայիս   տարեկան 10.5  միլիոն եուրօ աշխատավարձ կը ստանայ Պարչելոնայէն՝ գումարած երեք միլիոն   կողմնակի յատկացումներ:  Սակայն արժանթինցի ֆութպոլիստը  աշխատավարձի  յաւելում կը պահանջէ գաթալոնական ակումբէն:  Մեսիի փաստաբանները տարեկան առնուազն   քսան միլիոն եուրօ գումար մը կը պահանջեն արժանթինցի ֆութպոլիտին համար:

ՌԱՅՔՈՆԷՆ  ՆՈՐ ՊԱՅՄԱՆԱԳՐՈՒԹԻՒՆ ԿՆՔԵՑ ՖԵՌԱՐԻԻ  ՀԵՏ

Ֆորմիւլա  1  ինքնաշարներու Լոթիւս  խումբի վարորդ՝  Քիմի Ռայքոնէն  իր ասպարէզը պիտի շարունակէ Ֆեռարիի հետ:  33-ամեայ  վարորդը,  երկու տարուան  պայմանագրութիւն մը կնքեց  Ֆեռարիի հետ:  Ան նախապէս՝ 2007-2009 տարիներուն ներկայացուցած է Ֆեռարին եւ  2007-ին դարձած է աշխարհի ախոյեան:  Ռայքոնէն, Ֆեռարիի մէջ պիտի  փոխարինէ Ֆելիփէ Մասան:

Միւս կողմէ, Ֆեռարի ընկերութեան վարորդ  Ֆեռնանտօ Ալոնզօ կը մնայ  Ֆորմիւլա – 1  ինքնաշարժներու  ամենաշատ  վարձատրուող վարորդը:  Ալոնզօ,  տարեկան  30 միլիոն տոլար գումար մը կը ստանայ  Ֆեռարիէն:  Լուիս Հեմիլթըն կը ստանայ՝  27.5  միլիոն:

ԵԹԷ ՊԷՅԼԿ’ԱՐԺԷ 100 ՄԻԼԻՈՆ՝   ՀԱՄՇԻԿԸ   ԱՆԳԻՆ Է…

 Թոթենհամի   24-ամեայ միջնապահ Կարէթ Պէյի  հարիւր  միլիոն եուրօ արժողութեամբ փոխանցումը  կը շարունակէ   քննադատութեան  նիւթ  ծառայել ֆութպոլային  շրջանակներու  մօտ:

Նափոլիի մարզիչ  Ռաֆայէլ Պենիթէզ, այն  անձնաւորութիւններէն է, որոնք  չափազանցուած կը  գտնեն   Ռէալ Մատրիտի  կողմէ  վճարուած   100  միլիոն եուրօ գումարը:  Մեկնաբանելով  Պէյլի  փոխանցումը Ռէալ Մատրիտին, Պենիթէզ   ըսաւ .« Եթէ Կարէթ Պէյլ իսկապէս կ’արժէ 100 միլիոն եուրօ, ուրեմն Նափոլիի միջնապահ  Մարէք  Համշիկը անգին է…»:

ՔՐՈՅՖ ԿԸ ՄԵՐԺԷ  ՎԵՐԴԱՌՆԱԼ ՊԱՐՉԵԼՈՆԱ

Պարչելոնայի նախկին  մարզիչ  հոլանտացի Եոհան Քրոյֆ  մերժեց   գաթալոնական ակումբ  վերադառնալու հրաւէր մը: Քրոյֆ  յայտարարեց, թէ այնքան ժամանակ, որ Սանտրօ Ռոսէլն է Պարչելոնայի նախագահը, ինք   գործ չունի գաթալոնական ակումբէն ներս:

Նշենք, թէ Եւրոպական Ակումբներու Ախոյեանութեան «Չեմփիընզ Լիկ» մրցաշարքի  գծով, 18 Սեպտեմբերին  Պարչելոնայի մրցակիցը պիտի  ըլլայ Այաքս  Ամսթերտամը: Քրոյֆ  նշեց, թէ  պիտի բացակայի այդ մրցումէն, եւ մաղթելով  որ  Այաքս պարտութեան մատնէ Պարչելոնան:

ՄԱՆՉԵՍԹԸՐԻ ՄԷՋ ՓՈՂՈՑ  ՖԵՐԿԸՍԸՆԻ ԱՆՈՒՆՈՎ

 Մանչեսթըր քաղաքի  փողոցներէն մէկը պիտի  կոչուի Մանչեսթըր Եունայթըտ  խումբի   մարզիչ Սըր Ալեքս Ֆերկըսընի անունով: « Հիացած եմ, որ  կ’արժանանամ նման պատուի: Երբ 1986-ին եկայ Օլտ Թրեֆորտ, նոյնիսկ պատկերացում չունէի, թէ  ինչկը սպասէր ինծի». ըսաւ Ֆերկըսըն: Սկովտիացի մարզիչը   1986-էն 2013-ի միջեւ ինկած ժամանակամիջոցին,   նուաճեց 38 տիտղոս:  Յիշեցնենք, որ  Նոյեմբեր 2012-ին,  Օլտ Թրեֆորտ մարզադաշտին առջեւ  տեղադրուեցաւ Ֆերկըսընի արձանը, ինչպէս նաեւ  անոր կոչուեցաւ մարզադաշտին  թրիւպիւններէն  մին:

ՊՐԱՅԸՆԹ ԿՐՆԱՅ ԲԱՑԱԿԱՅԻԼ ԴԱՇՏԵՐԷՆ

Լոս Անճելըս Լէյքըրզի աստղ Քոպի Պրայընթ  կրնայ բացակայիլ  Էն.Պի.Էյ-ի ախոյեանութեան նոր  մրցաշրջանէն: 35-ամեայ   աստղը անցնող  13 Ապրիլէն ի վեր,  վնասուածքի հետեւանքով հեռու կը մնայ  հրապարակէն: Միւս կողմէ, Լէյքըրզ,  2013-14  տարեշրջանի առաջին մրցումը պիտի կատարէ  Լոս Անճելըս Գլիփըրզի դէմ,  29  Հոկտեմբերին:

LEAVE A REPLY

Please enter your comment!
Please enter your name here