ՆԱԽԱԳԱՀԱԿԱՆ ՊԱԼԱՏԸ ԿԸ ԼՈՒՍԱԲԱՆԷ ՊԱԱՊՏԱՅԻ ՅԱՅՏԱՐԱՐՈՒԹԻՒՆԸ

0
117

Պաապտայի  մօտիկ աղբիւրներ հաղորդեցին, թէ Սուրիոյ  վրայ յարձակումէն ետդարձը  մեղմացուցած է ներլիբանանեան  բեմին   լարուածութիւնը:  Ոմանց կարծիքով,  յառաջիկայ  տասնհինգ օրերու  ընթացքին   Լիբանան պիտի  ունենայ  14-էն 18 անդամներէ  բաղկացած  կառավարութիւն մը:

Նախագահ  Սըլէյման արդէն իսկ սկսած  է Ուաշինկթըն կատարելիք այցելութեան նախապատրաստութիւններուն: Պաապտայի  պալատին մօտիկ աղբիւրներ կը հաւաստեն,թէ Սըլէյման  Նիւ Եորքի մէջ  հանդիպում մը պիտի  ունենայ  Միացեալ Նահանգներու նախագահ Պարաք Օպամայի հետ: Հանդիպումը առիթ պիտի  ընծայէ, որպէսզի նախագահ  Սըլէյման աւելի   մօտէն  բացատրէ Լիբանանի կացութիւնը:

Պաապտայի  պալատը  լոյս ընծայեց   հաղորդագրութիւն մը, որուն մէջ  դիտել կը տրուի, թէ  Պաապտայի Յայտարարութիւնը կը ներկայացնէ ազգային համախոհութեան,  Լիբանանի միասնականութեան եւ պաշտպանութեան  ռազմավարութիւնը քննարկելու եւ ամրապնդելու  կարեւոր   փաստաթուղթ մը: Հաղորդագրութիւնը  ոչինչ կ’ակնարկէ Դիմադրութեան զէնքին  մասին, սակայն   նախամուտք կը ծառայէ  զայն  քննարկելու՝  պաշտպանութեան ռազմավարութեան  օրակարգին տակ եւ  միաժամանակ կը  նշէ, թէ  Պաապտայի Յայտարարութիւնը մշակուած է  ազգային երկխօսութեան մասնակիցներուն  հաւանութեամբ  եւ  ներկայացուած  Արաբական  Լիկային, իբրեւ վաւերական հաստատագիր:

Հրաժարեալ   վարչապետ  Նեժիպ Միքաթի  յայտարարեց, թէ    նախաձեռնութիւն մը  պատրաստ է  արձակելու, զորս պիտի  գայ ամբողջացացնելու   Միշէլ Սըլէյմանի եւ  Նեպիհ Պըրրիի նախաձեռնութիւնները: Միքաթի  մաղթեց  չուշացնել նոր կառավարութեան կազմութիւնը: Ան   նաեւ յիշեցուց, թէ Պաապտայի  Յայտարարութիւնը  պատրաստուած  էր  քաղաքական բոլոր  կողմերուն հաւանութեամբ:

Մարտ  14-ի ուժերը  անմիջապէս  յայտարարեցին, թէ ամբողջութեամբ կը  զօրակցին  Պաապտայի Յայտարարութեան:

Քաղաքական կարգ մը  հոսանքներ, ինչպէս  Փաղանգաւոր  Կուսակցութինը,  Ընկերվար Յառաջդիմական Կուսակցութիւնը,  Ամալը, Հըզպալլան  համոզիչ կը գտնեն  նախքան նոր կառավարութեան կազմութիւնը,  ազգային  երկխօսութեան նիստերուն  վերսկսելու խորհրդարանի նախագահ   Նեպիհ Պըրրիի առաջարկը:  Մուսթաքպալ  Հոսանքը իբրեւ «դրական քայլ» կը գնահատէ  Պըրրիի նախաձենութիւնը, սակայն կը  սպասէ  Սաատ Հարիրիի հետ կատարուող   խորհրդակցութիւններուն  եզրակացութեան:

 Նախագահ Սըլէյման  Պաապտայի պալատին մէջ ընդունեց  կենսոլորտի  նախարարի պաշտօնակատար Նազէմ Խուրին   եւ անոր հետ քննարկեց ընթացիկ հարցեր:Նախագահը նաեւ ընդունեց նախկին նախարար Շառլ Ռըզքը, նախկին երեսփոխաններ Ճեմիլ Շամասը, Մուհամմէտ Իթանին  եւ այլ անձնաւորութիւններ:

LEAVE A REPLY

Please enter your comment!
Please enter your name here