ՓԱՍԱՏԻՆԱՅԻ ՄԷՋ ՀԱՅՈՑ ԴԷՄ ՑԵՂԱՍՊԱՆՈՒԹԵԱՆ ՅՈՒՇԱՐՁԱՆԻ ՆԱԽԱԳԻԾԸ ՎԱՒԵՐԱՑՈՒԵՑԱՒ

0
129

Փասատինայի քաղաքապետական խորհուրդը  միաձայնութեամբ վաւերացուց Հայկական Ցեղասպանութեան մէկ ու կէս միլիոն զոհերու յիշատակին նուիրուած յուրշարձանի կառուցման նախագիծը: Յուշարձանը պիտի զետեղուի Փասատինայի «Մեմորիըլ» զբօսայգիին մէջ, Հայկական Ցեղասպանութեան հարիւրամեակէն առաջ:
Քուէարկութենէն առաջ այս հարցով ելոյթ ունենալու դիմում կատարած են 36 անձեր, որոնց գերակշռող մեծամասնութիւնը յուշարձանը կառուցելու ի նպաստ արտայայտուած է:
Նաեւ, 1093 հոգի խնդրագիր-դիմում ստորագրած է՝ աջակցելով Հայկական Ցեղասպանութեան հարիւրամեայ տարելիցին առիթով քաղաքին մէջ յուշարձան հաստատելու գաղափարին:
«Շատեր լաւապէս ծանօթ չեն  24 Ապրլի  հետեւանքներուն՝ Թուրքիոյ կառավարութեան վարած շարունակական ժխտողական քաղաքականութեան պատճռով: Այս յուշարձանը պէտք չէ միայն ոգեկոչէ անցեալի իրադարձութիւնները, այլ նաեւ պէտք է փարոս մը ըլլայ ապագայ սերունդներուն համար, որպէսզի անոնք չմոռնան ոչ միայն հայերը, այլ նաեւ բոլոր անոնք, որոնք անարդարութեան զոհ դարձած են», ըսած է Փասատինայի նախկին ոստիկանապետ Պարնի Մելիքեան, որ անդամ է Հայկական Ցեղասպանութեան յուշարձանը կառուցելու նպատակով կազմուած յանձնախումբին:
Մինչ որոշ վեթերաններ յայտնած են, թէ «Մեմորիըլ» զբօսայգիին մէջ պէտք է ըլլան միայն ամերիկացի զինուորական զոհերու նուիրուած յուշարձաններ, քննարկումներու աւարտին Հայկական Ցեղասպանութեան յուշարձանը կառուցելու որոշումին ի նպաստ քուէարկած են քաղաքապետական խորհուրդի բոլոր անդամները: Քննարկումին ընթացքին Հայկական Ցեղասպանութեան ի նպաստ արտայայտուած են նաեւ այլ վեթերաններ:
«Կը կարծեմ, որ Հայկական Ցեղասպանութեան յիշատակին նուիրուած յուշարձանը կենսական նշանակութիւն ունի համայնքին համար», ըսաւ քաղաքապետական խորհուրդի անդամներէն Թերի Թորնեք:
Հայկական Ցեղասպանութեան մասին համապատասխան արձանագրութեամբ նշեալ յուշարձանի նախագիծին հեղինակն է Քեթրին Մենարտ: Նախագիծին համաձայն՝ յուշարձանը պիտի ըլլայ 16 ոտք բարձրութեամբ եւ բոլորակաձեւ (28 ոտք տրամագիծով) յարդակով եռանկիւն ցայտաղբիւր մը, որմէ 21 երկվայրկեան անգամ մը մէկ կաթիլ ջուր պիտի ցայտի: Այդ արագութեամբ, մէկ տարուան ընթացքին աղբիւրին մէջ 1.5 միլիոն կաթիլ ջուր պիտի հաւաքուի՝ խորհրդանշելով Ցեղասպանութեան զոհերը:

 

LEAVE A REPLY

Please enter your comment!
Please enter your name here