ԼԱՒՐՈՎ – ՔԵՐՐԻ – ԻՊՐԱՀԻՄԻ Կ’ԱՒԵՏԵՆ ՅԱՋՈՂ ՀԱՆԴԻՊՈՒՄԻ ՄԸ ԱՒԱՐՏԸ – ՅԱՋՈՐԴ ՀԱՆԴԻՊՈՒՄԸ ՆԻՒ ԵՈՐՔԻ ՄԷՋ

0
113

Սուրիոյ   հակամարտութեան  վերաբերեալ Ժընեւի մէջ տեղի ունեցող բանակցութիւններուն երկրորդ օրը, Ռուսիոյ  արտաքին   գործոց նախարար Սերկէյ Լաւրով եւ  Միացեալ Նահանգներու պետական քարտուղար  Ճոն Քերրի եռակողմ  հանդիպում մը ունեցան Սուրիոյ հարցով Արաբական Լիկայի եւ ՄԱԿ-ի բանագնաց  Լախտար Իպրահիմիի հետ:  Սոյն հանդիպումը աւարտելէ ետք,  երեք  դիւանագէտները  կնքեցին  միացեալ մամլոյ ասուլիս մը:  Ռուսիոյ արտաքին գործոց  նախարար Սերկէյ Լաւրով յայտնեց, թէ երկօրեայ  խորհրդաժողովին   հիմնական  օրակարգը Սուրիոյ   քիմիական զէնքն էր, ինչպէս նաեւ Քիմիական  Զէնքի Կանխման  Միջազգային կազմակերպութեան Սուրիոյ անդամակցութեան հարցը:  Լաւրով   նշեց, թէ  աշխատանային քարտէսի մը հիման  վրայ   տեղի պիտի ունենան  յառաջիկայ քայլերը:  Լաւրով  բաւական  կարեւոր  քայլ մը նկատեց խորհրդակցութիւններուն  Լախտար  Իպրահիմիի մասնակցութիւնը:   Ռուսիոյ  արտաքին գործոց նախարարը ցաւ  յայտնեց,որ հանդիպման ընթացքին  կարելիութիւն չէր ստեղծուած քննարկելու «Ժընեւ-2» խորհրդաժողովի նախապատրաստութիւններուն  մասին:  Լաւրով   նշեց, թէ յաջորդ հանդիպումը  տեղի պիտի ունենայ  Սեպտեմբերին, Նիւ Եորքի մէջ:  Իր կարգին, Իպրահիմի յայտնեց, թէ անհրաժեշտ է միջոցներ ստեղծել «Ժընեւ -2» խորհրդաժողովին համար:  Իպրահիմ    ընդգծեց, թէ  եռեակի հանդիպումը  յաջողութիւն մըն էր, իսկ մթնոլորտը դրական էր: Լաւրով եւ  Քերրի նոյնպէս հաստատեցին, թէ  հանդիպումը «յաջողութիւն» մըն էր:

Պետական քարտուղար  Ճոն Քերրի շեշտեց,թէ  բոլոր  կողմերը նախանձախնդիր են  լուծում գտնելու   Սուրիոյ քիմիական զէնքերուն: Ան շեշտեց,թէ Միացեալ Նահանգներ ամէն գնով կը  փափաքի  յաջողութիւն արձանագրել Սուրիոյ քիմիական զէնքերուն շուրջ:   Քերրի   շեշտեց, թէ  երկամեայ աւերն ու քանդումը  որքան ալ մտահոգիչ ըլլան,  նախաքայլը  պարտի ըլլալ  քիմիական  օրակարգը:

  Միացեալ Նահանգներու  պետական քարտուղար  Ճոն  Քերրի  յայտարարեց, թէ   մտադրած է  լուրջ եւ  առարկայական  բանակցութիւններ վարել Մոսկուայի հետ՝ Սուրիոյ հարցով:  Քերրի   ըսաւ,թէ  Ուաշինկթըն  նախանձախնդիր  կը մնայ Սուրիոյ քիմիական զէնքերու անվտանգութեան եւ այս ուղղութեամբ  մանրամասնօրէն պիտի  հետապնդէ  Դամասկոսի  քայլերը:  Քերրի  ըսաւ,թէ  դիւանագիտական լուծումը  շատ աւելի նախըտրելի է քան՝ ռազմականը: Պետական քարտուղարը   մերժեց  քիմիական զէնքերուն վերաբերեալ նախագահ Պաշշար Ասատի  նախապայանը: Ասատ  պահանջած էր  նախքան  քիմիական զէնքերու չէզոքացումը՝ դադրեցնել   Սուրիոյ ծայրայեղականներուն  ռազմական  օժանակութիւնները:

Իրանի արտաքին  գործոց  նախարար  Մուհամմէտ Ճաուատ Զարիֆ  դատապարտեց  Սուրիոյ դէմ  Միացեալ Նահանգներու ռազմական  նկրտումները: «Սպառնալիքը եւ   ուժի գործածութիւնը բռնկումի պիտի  մղէ շրջանը». զգուշացուց ան:

Միւս կողմէ,  ՄԱԿ-ի ընդհանուր  քարտուղար Պան Քի Մուն  ողջունեց  Քիմիական Զէնքի Կանխման  Միջազգային կազմակերպութեան Սուրիոյ անդամակցութիւնը:  ՄԱԿ-ի  մօտ Սուրիոյ  դեսպան Պաշշար Ճաաֆարի յայտարարեց, թէ  Սուրիա արդէն իսկ դարձած է  վերոյիշեալ  կազմակերպութեան անդամ: Ռուսիոյ նախագահ Վլատիմիր Փութին նոյնպէս ողջունեց Սուրիոյ  քայլը:   

ՄԱԿ-ի ընդհանուր քարտուղարի  տեղակալ  Ճեֆրի Ֆելթման յայտնեց, թէ Սուրիական հակամարտութեան կարգաւորումը  չափազանց դժուար պիտի  ըլլայ  առանց Իրանի մասնակցութեան:

LEAVE A REPLY

Please enter your comment!
Please enter your name here