ՆԱԽԱԳԱՀ ՍԸԼԷՅՄԱՆ Կ’ՈՂՋՈՒՆԷ ԵՐԿՕՍՈՒԹԵԱՆ ՃԱՆԱՊԱՐՀԸ ԲԱՑՈՂ ԻՒՐԱՔԱՆՉԻՒՐ ԱՌԱՋԱՐԿ

0
127

 Հանրապետութեան նախագահ Միշէլ Սըլէյման  մերժեց  լիբանանեան կառավարութեան կազմութիւնը որեւէ  կերպով առնչել Սուրիոյ զարգացումներուն հետ:  Նախագահը կը  պահանջէ  քաղաքական հիմնական ուժերու մասնակցութեամբ ազգային   միասնականութեան կառավարութիւն մը:  Նախագահը կ’ակնկալէ, որ   նշանակեալ վարչապետը  յառաջիկայ քանի մը օրերուն  ընթացքին անուանացանկով մը ներկայանայ Պաապտայի  պալատ: Սըլէյմանի   մօտիկ աղբիւրներ  կը յայտնեն, թէ Պաապտայէն  լոյս տեսած Չորեքշաբթի օրուան յայտարարութիւնը  ոչ  ոքի դէմ կ’ուղղուէր, այլ՝ յստակացում մը:

Նախագահ Սըլէյման  ընդունեց   խորհրդարանական  Բարգաւաճում եւ Ազատագրութիւն  խմբաւորումը ներկայացնող պատուիրակութիւն մը: Վերջինս, նախագահին հետ քննարկեց  ազգային  համերաշխութիւնը վերականգնելու Նեպիհ Պըրրիի  նախաձեռնութիւնը: Սըլէյման   իր այցելուներուն յայտնեց,  թէ կ’ողջունէ   երկխօսութեան իւրաքանչիւր առաջարկ, այնքան ժամանակ որ լիբանանցիները կը համախմբուին անոր շուրջ:

Հրաժարեալ վարչապետ  Նեժիպ Միքաթի  վարչապետարանին մէջ ընդունեց Լիբանանի մօտ ՄԱԿ-ի ընդհանուր քարտուղարի  պաշտօնակատար Տերէք Փլամլին եւ անոր հետ քննարկեց  ընթացիկ  հարցեր:  Միքաթի  դիտել տուաւ, թէ  ազգային համախոհութիւնը  վերականգնելու աշխատանքները  չեն  հետապնդեր հրաժարեալ  կառավարութեան վերակենդանացումը: Միքաթի  շեշտեց, թէ նման   մտադրութիւն  գոյութիւն չունի  իր մօտ: Փլամլի շեշտեց Պաապտայի Յայտարարութիւնը  յարգելու եւ Լիբանանը  շրջանային  հակամարտութիւններէն  հեռու պահելու անհրաժեշտութիւնը:

Թրիփոլիի մէջ,Նեժիպ Միքաթիի  ի նպաստ զօրակցութեան  հաւաքներ տեղի ունեցան երէկ:

LEAVE A REPLY

Please enter your comment!
Please enter your name here