ՔԵՐՐԻ ՎԱՂԸ ՊԻՏԻ ՀԱՆԴԻՊԻ ԲՐԻՏԱՆԻՈՅ, ՖՐԱՆՍԱՅԻ, ՍԷՈՒՏԱԿԱՆ ԱՐԱԲԻՈՅ ԻՐ ՊԱՇՏՕՆԱԿԻՑՆԵՐՈՒՆ ՀԵՏ

0
124

Սուրիոյ հակամարտութեան    լուծում  գտնելու  նպատակով, Ռուսիոյ  արտաքին գործոց նախարար Սերկէյ Լաւրով եւ  Միացեալ Նահանգներու պետական քարտուղար Ճոն Քերրի  Շաբաթ  օր  շարունակեցին  իրենց   խորհրդակցութիւնները: Այս ծիրին  մէջ,  եռակողմ հանդիպում մը   տեղի ունեցաւ  ՄԱԿ-ի նախկին ընդհանուր քարտուղար  Քոֆի Անանի մասնակցութեամբ:

 ՄԱԿ-ի  ընդհանուր քարտուղար Պան Քի Մուն  Սուրիոյ  հակամարտութիւնը  լուծելու նպատակով միջազգային  խորհրդաժողով  մը առաջարկեց  յառաջիկայ ամսուան ընթացքին:   Քի Մուն ըսաւ, թէ  այս  մասին որոշ խորհրդակցութիւններ ունեցած է  ՄԱԿ-ի եւ Արաբական Լիկայի  պատուիրակ Լախտար Իպրահիմիի  հետ:  Խորհրդաժողովը կը նախատեսուի Հոկտեմբերի  սկիզբը:  ՄԱԿ-ի ընդհանուր  քարտուղարը նկատել տուաւ, որ   նման խորհրդաժողով  մը  կը բախի լուրջ  դժուարութիւններու հետ: Ան  հաւաստեց, թէ  հետաքննիչներու    ներկայացնելիք տեղեկագիրը  պիտի հաստատէ Սուրիոյ մէջ քիմիական զէնք  կիրառելու իրողութիւնը: Քի Մուն  ակնկալեց, որ  տեղեկագիրը Անվտանգութեան Խորհուրդին յանձնուի  Երկուշաբթի  կէսօրին:

«Ռոյթըրզ» լրատուական  գործակալութիւնը հաղորդեց, թէ  Միացեալ Նահանգներու  կարծիքով,  Սուրիոյ   վերաբերեալ  ՄԱԿ-ի տեղեկագիրը  պիտի  չընգրկէ  ռազմական գործողութեան դիմելու որեւէ  առաջարկ:

Ռուսիոյ խորհրդարանի  միջազգային յարաբերութիւններու պետ  Ալեքսէյ  Պոշքով  թեքնիքապէս անհնար նկատեց  երկու կամ երեք շաբթուան  ընթացքին   Սուրիոյ քիմիական զէնքները  միջազգային քննիչներու տրամադրութեան տակ դնելու  Ոաշինկթընի  պայմանը:  Պոշքով  նշեց, թէ Սուրիոյ  մէջ  կը  գտնուի առնուազն  42   քիմիական զէնքի կեդրոն եւ   գրեթէ անհնար  է կարճ  ժամանակամիջոցի մէջ  վերահսկողութիւն  հաստատել  այդ բոլորին վրայ:

 Ռուս-ամերիկեան բանակցութիւններէն անկախ,  Ֆրանսա լծուած է   նախագիծի մը պատրաստութեան:  ՄԱԿ-ին ներկայացուելիք  ֆրանսական  նախագիծը Սուրիայէն անյապաղ կը պահանջէ   միջազգային հանրութեան  յանձնել  քիմիական զէնքերը:  Փաստաթուղթը կը պահանջէ Սուրիոյ դէմ  ուժ գործածել, եթէ   կրկին  օգտագործէ քիմիական զէնք:  Բանաձեւը նաեւ  քաղաքական  բոլոր կողմերէն կը պահանջէ  անցումային կառավարութին կազմել՝ յառաջիկայ   90  օրերուն ընթացքին:

Միւս կողմէ,  պետական քարտուղար   Ճոն  Քերրի վաղը՝ Երկուշաբթի, Փարիզի մէջ հանդիպումներ պիտի  ունենայ  Ֆրանսայի, Բրիտանիոյ եւ Սէուտական Արաբիոյ արտաքին գործոց նախարարներ  Լորան Ֆապիւսի,  Ուիլիյըմ Հէյկի եւ  Սաուտ Ալ Ֆայսալի հետ:

Նորերս ազատագրուած ֆրանսացի լրագրող  Ճոնաթան  Ալպիրի, հեռատեսիլային   հարցազրոյցի մը  ընթացքին  յայտնեց, թէ  Ալ Քայիտայի  հետեւորդ  զինեալները  օգտագործած են քիմիական զէնքը, որպէսզի ապահովեն Արեւեմուտքի   միջամտութիւնը:

ՄԱԿ՝ յիսուն  միլիոն  տոլարի   օժանդակութիւն մը յատկացուց Սուրիոյ գաղթականներուն   օգնութեան  ծրագիրներուն:

Իսրայէլեան «Հաարէց»  օրաթերթը կը գրէ, թէ  նախագահ Ասատը փոխարինողը  լրջօրէն  կը մտահոգէ Իսրայէլը:

Սուրիոյ   չափաւորական  ընդդիմութիւնը   իշխանութիւնները զգուշացուց, թէ  ծայրայեղականները կը  ծրագրեն պայթեցնել երկրին հիւսիսը  գտնուող  «Սաուրա»  եւ «Պաաս»  ամբարտակները:

LEAVE A REPLY

Please enter your comment!
Please enter your name here