ԱՐԵՒՄՏԵԱՆ ՊԵՏՈՒԹԻՒՆՆԵՐԸ ԿԸ ՁԳՏԻՆ « ԺԸՆԵՒ-2 »ԻՆ ԵՒ ՀԱԿԱՄԱՐՏՈՒԹԵԱՆ ՔԱՂԱՔԱԿԱՆ ԼՈՒԾՈՒՄԻՆ

0
113

 ՄԱԿ-ի ընդհանուր քարտուղար Պան Քի Մուն  երէկ  առաւօտեան ստացաւ  Սուրիոյ մէջ քիմիական  զէնքի   գործածութեան վերաբերեալ ՄԱԿ-ի հետաքննիչներուն տեղեկագիրը  եւ անմիջապէս դռնփակ նիստի հրաւիրեց Ապահովութեան Խորհուրդի  մնայուն անդամները: ՄԱԿ-ի հետաքննիչները  յայտարարեցին, թէ  ծայրայեղական կազմակերպութիւններ Սուրիոյ  հիւսիսային շրջաններուն մէջ  կը կատարեն զանգուածային  ոճիրներ: Հետաքննիչները    միաժամանակ  յայտնեցին, թէ կը քննարկեն  քիմիական զէնքի  կիրառման  14 դէպք:

Փարիզի  մէջ նախագահ Ֆրանսուա Հոլանտ,  Միացեալ Նահանգներու պետական քարտուղար Քոն Քերրի եւ Բրիտանիոյ վարչապետ  Ուիլիյըմ Հէյկ  շեշտեցին, թէ անհրաժեշտ է  կարեւոր եւ  պարտադիր  որոշում մը   քուէարկել ՄԱԿ-ի մօտ:  Հանդիպումին նաեւ  մասնակցեցաւ  Ֆրանսայի արտաքին գործոց  նախարար  Լորան Ֆապիւսը: Խորհրդակցական հանդիպումի աւարտին, երեք  նախարարները կնքեցին միացեալ մամլոյ ասուլիս մը:   Ֆապիւս  յայտնեց, թէ  Նիւ  Եորքի մէջ  համաշխարհային    ընդլայնուած հանդիպում մը  տեղի պիտի ունենայ  Սուրիոյ ընդդիմութեան մասնակցութեամբ:  Հէյկ  յայտնեց, թէ   բոլոր  մեծ պետութիւնները կը ձգտին   «Ժընեւ -2» խորհրդաժողովին,  ինչպէս նաեւ  հակամարտութեան  քաղաքական  լուծումի մը:

Ռուսիոյ արտաքին գործոց նախարար Սերկէյ  Լաւրով  ըսաւ, թէ Սուրիոյ ընդդիմութեան պէտք է ստիպել   մասնակցելու  «Ժընեւ -2» խորհրդաժողովին :   Եգիպտոսի  արտաքին գործոց նախարար Նեպիլ Ֆահմի  զօրակցութիւն յայտնեց  «Ժընեւ -2» խորհրդաժողովը  իրականացնելու  ճիգերուն:

Ապահովական գետնի վրայ, Սուրիոյ տարբեր  շրջաններու մէջ  ծանր բախումներ  տեղի կ’ունենան բանակին եւ  ծայրայեղականներուն  միջեւ:  Բանակը  Համայի մէջ սպաննեց   Սուրիոյ մէջ   կռուող ազերիական զօրագունդի   ղեկավար  Ապու  Եահիան:

LEAVE A REPLY

Please enter your comment!
Please enter your name here