ՄԱՐԶԱԿԱՆ – ԿԱՐԷԹ ՊԷՅԼ ԿՈԼՈՎ ՆՇԵՑ ՌԷԱԼԻ ՇԱՊԻԿՈՎ ԱՌԱՋԻՆ ՄՐՑՈՒՄԸ

0
156

Եւրոպական ակումբային  ֆութպոլը արդէն իսկ   մտած է  իր հունին  մէջ:  Անգլիոյ  ֆութպոլի  ախոյեանութեան   4-րդ հանգրուանի  մրցումներուն,  Արսենալ    3-1 արդիւնքով պարտութեան   մատնեց   Սանտերլանտը, այս  վերջնոյն  դաշտին մէջ:    Օլիվիյէ  Ժիրու,   Արոն Ռամզի (2)   նշանակեցին  լոնտոնեան կազմին կոլերը: Նորերս  Ռէալէն  փոխան  42.5  միլիոն սթերլին գումարի   Արսենալի միացող Մեսուտ Օզիլ կատարեց իր առաջին մրցումը: Թոթենհամ սեփական  դաշտին մէջ 2-0 արդիւնքով պարտութեան մատնեց  Նորուիչ Սիթին:   Կիլֆի Սիկուրտսըն նշանակեց   Թոթենհամի զոյգ կոլերը:  Կուտիսըն  Փարք  մարզադաշտին մէջ, Էվըրթըն  1-0 արդիւնքով  պարտութեան մատնեց   Չելսին: Սոյն պարտութիւնը  Չելսիի առաջինն էր,  Ժոզէ  Մուրինիոյի  վերադարձէն ետք:  Մանչեսթըր Սիթի՝ 0-0 արդիւնքով հաւասարութեամբ մը գոհացաւ  Սթոք Սիթիի դէմ: Մանչեսթըր Եունայթըտ,  Օլտ Թրեֆորտի մէջ,  Ռոպին Վան Փըրսիի եւ  Ուէյն Ռունիի կոլերուն շնորհիւ,  2-0 արդիւնքով պարտութեան մատնեց  Գրիսթալ  Փալասը:

Սպանիոյ ֆութպոլի ախոյեանութեան  չորրորդ  հանգրուանի մրցումներուն,Պարչելոնա արձանագրեց   չորրորդ անընդմէջ  յաղթանակը, երբ  3-2 արդիւնքով պարտութեան  մատնեց Սեւիլիան: Տանի Ալվէզ,  36-րդ վայրկեանին  յառաջ   մղեց Պարչելոնան:  76-րդ վայրկեանին, Լիոնէլ Մեսի  կրկնապատկեց   հաշիւը:  Սակայն  Իվան  Ռաքիթիչ եւ  Քոքէ  հաւասարեցուցին  հաշիւը: Այն  պահուն, երբ կը թուէր, թէ  սեւիլիացիները  արժանիօրէն  մէկ կէտով պիտի  հեռանային  դաշտէն,  Ալեքսիս Սանչէս   նշանակեց Պարչելոնայի  յաղթանակի կոլը: 

Ուէյլզի  հաւաքականի  կիսապաշտպան  Կարէթ Պէյլ, Ռէալ Մատրիտի մէջ իր  նորամուտը   նշեց  կոլով մը: «Հպարտ  եմ, որ կոլի   հեղինակ  դարձայ  առաջին մրցումիս». ըսաւ 24-ամեայ Պէյլ:  Պէյլ,  39-րդ վայրկեանին գրաւեց Վիլառէալի բերդը:  Մրցումը  վերջ գտաւ  2-2  հաւասարութեամբ: Ռէալի երկրորդ կոլը նշանակեց  Քրիսթիանօ Ռոնալտօն:  Հակառակ այս   ցնծութեան, Պէյլի եւ  Ռոնալտոյի  կոլերը յաղթանակ  չպարգեւեցին  մայրաքաղաքի կազմին:  Ռէալ Մատրիտ եւ  Վիլառէալ՝  10-ական կէտով  կը գրաւեն ընդհանուր դասաւորման   3-րդ եւ 4-րդ դիրքերը:  Ընդհանուր  դասաւորումը  12-ական կէտով կը գլխաւորեն Պարչելոնան եւ   Աթլեթիքօ Մատրիտը: Վերջինս,  4-2 արդիւնքով պարտութեան մատնեց   Ալմերիան:  Տաւիտ Վիլա, Տիէկօ  Քոսթա,  Թիակօ եւ  Ռաուլ Կարսիա  նշանակեցին Աթլեթիքոյի կոլերը:  Վալենսիա արձանագրեց  յաջորդական երրորդ  յաղթանակը,  երբ  3-1 արդիւնքով պարտութեան մատնեց  Պեթիսը: Մոլինա  եւ  Սեւիլիա(2) նշանակեցին  Վալենսիայի կոլերը:  Մալակա   հինգ անպատասխան  գնդակ զետեղեց   Ռայօ  Վալեքանոյի    բերդին մէջ:

Սպանիոյ մէջ  մնալով,  Ռէալ Մատրիտի  փորթուգալացի յարձակող Քրիսթիանօ Ռոնալտօ մինչեւ  2018  վերանորոգեց իր պայմանագրութիւնը արքայական ակումբին հետ:

Իտալիոյ ախոյեանութեան  երրորդ  հանգրուանի կեդրոնական հանդիպումը տեղի ունեցաւ   Միլանի Սան Սիրօ  մարզադաշտոն  մէջ, ուր   Ինթէր Միլան ընդունեց  Եուվենթուսը: Մրցումի  73-րդ վայրկեանին  Մաուրօ  Իքարտի նշանակեց Ինթէրի եւ  մրցումին առաջին կոլը:   Միլանցիներուն ուրախութիւնը  ընդամէնը երկու վայրկեան տեւեց:  Արդարեւ , 75-րդ վայրկեանին, Արթուրօ  Վիտալ նշանակեց  Եուվէի  հաւասարութեան կոլը: Ճակատումը վերջ  գտաւ  1-1  հաւասարութեամբ:   Ներկայիս,  Ինթէր եւ  Եուվենթուս   ունին  եօթական  կէտ:   Մնացեալ  մրցումներուն,   Ա.Սէ. Միլան  բախտաւոր հաւասարութիւն մը   ձեռք բերաւ  Թորինոյի դէմ: Արդարեւ, մրցումին աւելցուած  ժամանակի  7-րդ վայրկեանին,  Մարիօ Պալոթելիի նշանակած  փենալթին, միլանցիները  փրկեց  պարտութենէն,այլապէս՝  Թորինօ՝  2-1 արդիւնքով  յաղթանակով պիտի  հեռանար  դաշտէն:  Միւս կողմէ, շնորհիւ  Կոնսալօ Հիկուայինի եւ  Խոսէ  Գալյէխոնի  նշանակած կոլերուն,  Նափոլի՝  2-0 արդիւնքով պարտութեան մատնեց   Աթալանթան:  Ֆիորենթինա – Գալիարի   ճակատումը վերջ գտաւ  1-1 հաւասարութեամբ:  Գարլիարիի  հաւասարութեան կոլը նշանակեց Մաուրիսիօ  Փինիլյիա՝  89-րդ վայրկեանին:

Ֆրանսայի ախոյեանութեան  5-րդ հանգրուանի մրցումներուն,  Ռատամէլ   Ֆալաքոյի  նշանակած կոլին շնորհիւ,  Մոնաքօ՝  1-0  արդիւնքով պարտութեան մատնեց  Լորիանը եւ  13  կէտով սկսաւ գլխաւորել   ախոյեանութեան  ընդհանուր դասաւորումը:  Միշէլ Տէր Զաքարեանի մարզած Նանթը  արձանագրեց  եղանակի  երկրորդ յաղթանակը, երբ  1-0 արդիւնքով պարտութեան մատնեց Սոշօն:  Մրցումին միակ կոլը  նշանակեց Նանթի սերպ յարձակող  Ֆիլիփ  Չորջեւիչը:  Ներկայիս, Նանթ,   եօթ կէտով  կը   գտնուի   ընդհանուր  դասաւորման   6-րդ դիրքին վրայ:  Սէն Թեթիէն,  մրցակիցի  դաշտին մէջ  3-1 արդիւնքով պարտութեան մատնեց Վալենսիէյնը:  Սէն Թեթիէն՝  12 կէտով կը գրաւէ երկրորդ  դիրքը, Փարի Սէն  Ժերմէն՝  11  կէտով՝  3-րդ:  Մարսէյ  խուսափեցաւ պարտութենէն, երբ  Թուլուզի դէմ մրցումին  87-րդ վայրկեանին,  Լուքաս  ջնջեց  Ուիսամ  Պըն  Զեթէրի  կողմէ  Թուլուզի   ունեցած  մէկ կոլի առաւելութիւնը:  Մարսէյի կազմը  ներկայիս   տասը կէտով  կը գրաւէ ընդհանուր  դասաւորման  երրորդ դիրքը:  Լիոն շարունակեց  կէտեր   կորսնցնել, երբ  0-0 արդիւնքով հաւասարութիւն մը արձանագրեց  Ռէնի   հետ:  Լիոն ներկայիս ունի  7 կէտ, Ռէն՝ 8:

Գերմանիոյ  ախոյեանութեան  5-րդ հանգրուանի մրցումներուն, Պորուսիա Տորթմունտ  6-2  արդիւնքով պարտութեան մատնեց Համպուրկը:   Փիէռ  Էմերիք Օպամէյանկ (2),  Հենրիխ Մխիթարեան,   Ռոպերթ Լեվանտոսվսքի (2),  Մարքօ Ռոյս նշանակեցին Տորթմունտի կոլերը:  Տորթմունտի կազմը  հինգ մրցումներէ ետք,  15 կէտով  կը  գլխաւորէ ընդհանուր աղիւսակը: Պայերն Միւնիխ  13  կէտով կը գտնուի երկրորդ  հորիզոնականին վրայ:   Համպուրկ՝  4 կէտով կը գրաւէ  15-րդ դիրքը:

Պայերն Միւնիխ երկու անպատասխան գնդակ  զետեղեց  Հանովըր 96-ի բերդին մէջ:   Մարիօ  Մանչուկիչ եւ  Ֆրանք Ռիպերի նշանակեցին  պաւարիական կազմին  կոլերը:  Պայեր Լեվերքուզեն   3-1 արդիւնքով պարտութեան մատնեց  Վոլֆսպուրկը:   Սոտնէյ  Սէմ եւ  Շթեֆան  Քիսլինկ(2)  նշանակեցին  Պայերի  կոլերը:   Հոֆենհայմ՝  2-1 արդիւնքով պարտութեան մատնեց  Պորուսիա Մէօնշենկլատպախը եւ  ութ կէտով բարձրացաւ դասաւորման   7-րդ դիրքը:  Մէօնշենկլատպախ՝   վեց կէտով կը գրաւէ  11-րդ դիրքը:

Ռուսիոյ ախոյեանութեան  8-րդ հանգրուանի մրցումներուն,  Մոսկուայի Սպարտակը  1-0  արդիւնքով պարտութեան մատնեց  Ուրալը:  Սպարտակի կոլը նշանակեց  Հայաստանի հաւաքականի յարձակող Եուրա Մովսիսեանը:  Ընթացիկ մարզաշրջանին, Մովսիսեան  չորս կոլ նշանակած է Սպարտակի շապիկով: Սան  Փեթերսպուրկի  Զենիթը  2-0 արդիւնքով պարտութեան  մատնեց   Թերեքը եւ  Սպարտակի նման՝ 17 կէտով  գրաւեց  ընդհանուր դասաւորման  երկրորդ դիրքը:  Ախոյեանութեան  ընդհանուր  դասաւորումը  20  կէտով կը գլխաւորեն Մոսկուայի Բանակայինները՝ ԲԿՄԱ:   Բանակայինները ՝  1-0 արդիւնքով պարտութեան  մատնեցին  Ռոստովը:

Հայաստանի ֆութպոլի ախոյեանութեան  5-րդ հանգրուանի մրցումներուն,  Փիւնիկ ընդունեց Ուլիսը:  Մրցումը վերջ գտաւ  3-3  հաւասարութեամբ: Երեւանի  Արարատը,  Կիւմրիի մէջ  1-1 արդիւնքով հաւասարութիւն մը արձանագրեց  Շիրակի  դէմ:  Ներկայիս,  Փիւնիկ եւ Միկա՝ 11-ական կէտով կը  գլխաւորեն ընդհանուր դասաւորումը: Արարատ եւ Շիրակ՝ 9-ական կէտով կը  գրաւեն   3-րդ եւ 4-րդ դիրքերը:

 

ՄԷՅՎԵԶԷՐ  ԴԱՐՁԵԱԼ  ՅԱՂԹԱՆԱԿՈՎ ՀԵՌԱՑԱՒ ՌԻՆԿԷՆ

 Աշխարհի   լաւագոյն  բռնցքամարտիկ Ֆլոյտ   Մէյվեզէր պարտութեան  մատնեց միջին  ծանրութեան կարգի  WBC   եւ  WBA  վարկածներով աշխարհի ախոյեան  Սաուլ  Ալվարէզը:  12 ռաունտերէ բաղկացած  մենամարտը  վերջ գտաւ   36-ամեայ  Մէյվեզէրի առաւելութեամբ:  Լոս Անճելըսի մէջ   կայացած  հետաքրքրական այս մրցումի աւարտին,  երեք իրաւարարները միաւորներու առաւելութեամբ՝ 114-114, 116-112, 117-111   յաղթական հռչակեցին  Մէյվեզէրը: Ամերիկացի   բռնցքամարտիկը  արհեստավարժ  ռինկի  վրայ  արձանագրեց իր   45-րդ յաղթանակը ( 26-ը՝ նոք-աութ):

ԱՐՈՆԵԱՆ  ՊԱՐՏՈՒԹԵԱՄԲ ԱՒԱՐՏԵՑ   ՄՐՑԱՇԱՐՔԸ

 Լեւոն Արոնեան   պարտութեամբ  աւարտեց Միացեալ Նահանգներու  Սենթ Լուիս    քաղաքին մէջ տեղի ունեցող ճատրակի  «Սինկֆիլտ Բաժակ»ի մրցաշարքը: Նախավերջին՝  5-րդ հանգրուանի  մրցումներուն,   Լեւոն Արոնեան  հաւասարութիւն մը արձանագրեց ամերիկացի Քաթա  Քամսքիի  դէմ: Արոնեան կը  մրցէր սպիտակ  քարերով:  Վերջին՝  6-րդ հանգրուանի մրցումներուն, Արոնեան  պարտուեցաւ  Մակնուս Գարլսընէն:  Վերջինս  նաեւ շահեցաւ  մրցաշարքին գլխաւոր տիտղոսը,  ստանալով  70  հազար  տոլարի  վճառագիր  մը:

ԱՇԽԱՐՀԻ ԿԱՆԱՆՑ ԱԽՈՅԵԱՆՈՒԹԻՒՆԸ  ՀՈՈՒ   ԻՖԱՆԻ ԱՌԱՒԵԼՈՒԹԵԱՄԲ

Չինաստանի  Տայչու   քաղաքին մէջ    կ’ընթանայ  ճատրակի աշխարհի  կանանց ախոյեանութիւնը:   Երեք  հանգրուան  ետք, չին Հոու  Իֆան՝ 2.5- 0.5  արդիւնքով  առաւելութիւն մը կը վայելէ այժմու ախոյեան,  ուքրանացի  Աննա Ուշենինայի նկատմամբ:    Ըստ գործող կանոնագրութեան, տասը  մրցումներու ընթացքին առաւելագոյն յաղթանակ արձանագրող մրցակիցը պիտի  հռչակուի աշխարհի ախոյեան:

 

ԱՅՍՕՐ ԵՐԵԿՈՅԵԱՆ «ՉԵՄՓԻԸՆԶ  ԼԻԿ»Ի   ԽՄԲԱՅԻՆ  ՀԱՆԳՐՈՒԱՆԻ ԱՌԱՋԻՆ  ՕՐՈԻԱՆ  ԵՐԹԻ ՄՐՑՈՒՄՆԵՐԸ

Այսօր՝ Երեքշաբթի  երեկոյեան պիտի  մեկնարկեն Եւրոպայի Ախոյեան Ակումբներու Ախոյեանութեան «Չեմփիընզ Լիկ»  մրցաշարքի խմբային  հանգրուանի   երթի գծով, առաջին  օրուան մրցումները:

Ստորեւ, մրցումներուն յայտագիրը:

Մանչեսթըր  Եունայթըտ  –  Պայեր  Լեվերքուզեն  ժամը՝  21.45  Ա. Խմբակ

Ռէալ Սոսիետատ  –  Շախտիոր Տոնեցք  ժամը՝ 21.45  Ա. Խմբակ

Գոփենհակեն –  Եուվենթուս  ժամը՝  21.45  Բ.խմբակ

Կալաթասարայ  –  Ռէալ Մատրիտ  ժամը՝ 21.45  Բ. Խմբակ

 Պենֆիքա  –  Անտերլեխթ  ժամը՝  21.45  Գ. Խմբակ

Օլիմփիաքոս  – Փարի Սէն Ժերմէն  ժամը՝  21.45  Գ. Խմբակ

Պայերն Միւնիւխ  –  ԲԿՄԱ  (Մոսկուայի Բանակայիններ)  ժամը՝  21.45   Դ. Խմբակ

 Վիթորիա  Փլզեն –  Մանչեսթըր Սիթի  ժամը՝  21.45  Դ. Խմբակ

 

LEAVE A REPLY

Please enter your comment!
Please enter your name here