ՆԱԽԱԳԱՀ ՍԸԼԷՅՄԱՆ ՓՈԽԶԻՋՈՒՄՆԵՐ ԿԸ ՊԱՀԱՆՋԷ ԿՈՂՄԵՐԷՆ

0
130

 Հանրապետութեան նախագահ Միշէլ Սըլէյման  իր այցելուներուն   յայտնեց, թէ  նոր կառավարութեան կազմութիւնը դարձաւ հրատապ անհրաժեշտութիւն: Ան  աւելցուց, թէ  կրթական նոր տարեշրջանի սեմին  ցաւալի է մնալ առանց   կառավարութեան: Սըլէյման  նշեց, թէ նոր կառավարութիւնը  փոփոխութեան  պիտի  չենթարկէ ստեղծուած  քաղաքական  հաւասարակշռութիւնները: Ան   խիստ կարեւոր նկատեց, որ  քաղաքական   հոսանքներու  ներկայացուցիչները  նախազգան կացութեան լրջութիւնը եւ  հրաժարին իրենց  նախապայմաններէն կամ նուազեցնեն զանոնք: Սըլէյման Պաապտայի պալատին մէջ ընդունեց  կենսոլորտի նախարարի  պաշտօնակատար  Նազէմ Խուրին, նախկին  երեսփոխաններու  միութիւնը ներկայացնող պատուիրակութիւն մը,  հարաւային Լիբանանի մէջ տեղակայուած ՖԻՒՆԻԼ-ի խաղաղապահ ուժերու ընդհանուր  պատասխանատու  զօրավար  Փաուլօ Սերան եւ այլ անձնաւորութիւններ:

Հանրապետութեան նախագահը այսօր՝  Չորեքշաբթի   ընդլայնուած նիստ մը պիտի գումարէ  Նիւ Եորք կատարելիք  այցելութեան առիթով իրեն ընկերակցող պատուիրակութեան  անդամներուն հետ:  Սկզբունքով  պատուիրակութեան մաս պիտի կազմեն հրաժարեալ նախարարներ Ատնան Մանսուրը, Ուայէլ Ապու Ֆաուրը եւ այլ անձնաւորութիւններ:

Նոր  կառավարութեան կազմութեան վերաբերեալ,   հրաժարեալ վարչապետ  Նեժիպ Միքաթի կը նախընտրէ  սպասել  հանրապետութեան նախագահին եւ  Խորհրդարանի նախագահին   նախաձեռնութիւններուն  արդիւնքին,  որուն լոյսին տակ պիտի  ներկայացնէ ազգային  համերաշխութեան եւ  կառավարութիւն  կազմելու իր տարբերակը:  Քաղաքական կողմերը առ այսօր կը  մերժեն Երեք- Ութերու ծանօթ  տարազը եւ կը մնան  իրենց նախապայմաններուն վրայ: Այս կը նշանակէ, թէ  կառավարութեան   կազմութիւնը յետաձգուած է   մինչեւ հանրապետութեան նախագահին  Նիւ Եորքէն  վերադարձը:  Ընկերվար Յառաջդիմական Կուսակցութեան պետ Ուալիտ Ճոմպլաթ իր հաւանութիւնը տուաւ Նեպիհ Պըրրիի նախաձեռնութեան,  դիտել տալով, որ   երկխօսութիւնը շատ աւելի նախընտրելի է, քան՝  պոյքոթը:   Ճոմպլաթ ընդունեց խորհրդարանական Ազատագրում եւ Բարգաւաճում խմբաւորումը ներկայացնող պատուիրակութիւն մը:

Քաղաքական  գետնի վրայ,  Մուսթաքպալ Հոսանքի պետ Ֆուատ Սինիորա  «կարեւոր» նկատեց Մուսթաքպալ Հոսանքին եւ  Փոփոխութիւն եւ Բարեկարգում խորհրդարանական խմբաւորումներուն  հետ Նեպիհ Պըրրին ներկայացնող պատուիրակութեան  մը հանդիպումները:

LEAVE A REPLY

Please enter your comment!
Please enter your name here