Դամասկոս. Հայ Կաթողիկէ Առաջնորդարանը` Հրասանդի Հրթիռի Թիրախ

0
114

Դամասկոսի մէջ «Ազդակ»-ի թղթակիցը Հալէպի հետ կապ հաստատելով կը հաղորդէ, որ Հալէպի մէջ հայ գաղութի կեանքը որոշ չափով բնական կ՛ընթանայ, այդ բնականոնութիւնը կ՛արտայայտուի մէկ կողմէ միութենական կեանքին, միւս կողմէ` մկրտութեան եւ հարսանիքի արարողութիւններուն ընդմէջէն:

Քաղաքին մէջ երթեւեկը բնական է, եւ հակառակ անգործութեան, բնակիչները օրական կ՛ուղղուին իրենց վաճառատուներն ու խանութները:

Անակնկալ հրասանդի հրթիռներու եւ առեւանգումի երեւոյթները կը մնան դիմագրաւելիք վտանգը:

Իսկ Դամասկոսի մէջ գետնի վրայ բախումներու զարգացումը կը մնայ անփոփոխ: Պաշտօնական աղբիւրները կը հաստատեն, որ սուրիական կառավարական բանակը վերատիրացած է Արեւելեան Ղութա արուարձանին մօտ գտնուող Շապաա շրջանին, եւ զինեալ խմբակներու հետ բախումներ արձանագրուած են Պարզէի եւ Քապունի շրջաններուն մէջ:

«Ազդակ»-ի թղթակիցը կը տեղեկացնէ, որ երէկ Դամասկոսի, Հալէպի եւ այլ նահանգներու մէջ հայկական բոլոր վարժարանները վերամուտը նշեցին. հակառակ տիրող իրավիճակին, հարիւրաւոր հայ աշակերտներ ուղղուեցան իրենց վարժարանները` վերսկսելու համար ուսումնական նոր տարեշրջան մը:

Երէկ երեկոյեան մայրաքաղաքի Պապ Թումա, Քասա, Ամարա եւ Ապպասիին թաղամասերը կրկին դարձան հրասանդի հրթիռներու թիրախ:

Պապ Թումա թաղամասին մէջ գտնուող Դամասկոսի Հայ կաթողիկէ առաջնորդարանը նոյնպէս ենթարկուեցաւ հրասանդի հրթիռի հարուածի, որ նիւթական ծանր վնասներ պատճառեց 3-րդ յարկին ու յարակից «Լոյս» եւ «Փարոս» վարժարաններուն: Մարդկային վնաս չկայ:

LEAVE A REPLY

Please enter your comment!
Please enter your name here