ՆԻՒ ԵՈՐՔԻ ԽՈՐՀՐԴԱԺՈՂՈՎԻՆ ՆԱԽՕՐԷԻՆ ՆԱԽԱՊԱՏՐԱՍՏԱԿԱՆ ՀԱՆԴԻՊՈՒՄ ՊԱԱՊՏԱՅԻ ՄԷՋ

0
118

Մինչ հանրապետութեան նախագահ Միշէլ Սըլէյման  կը պատրաստուի  մեկնելու Նիւ Եորք, ուր  Լիբանանը  պիտի ներկայացնէ ՄԱԿ-ի   68-րդ   ընդհանուր  խորհրդաժողովի  նիստերուն,  Ֆրանսա նախապատրաստութիւններ կը կատարէ առաւելագոյն չափով արդիւնաւէտ  դարձնելու Լիբանանի օժանդակութեան համար   նախատեսուած միջազգային խորհրդաժողովը: Պաապտայի պալատին մօտիկ աղբիւրներ  հաղորդեցին, թէ Նիւ Եորքի մէջ,   նախագահ Սըլէյման պիտի  կեդրոնանայ  իսրայէլեան օդային եւ ցամաքային  ոտնձգութիւններուն, ինչպէս նաեւ  սուրիացի գաղթականներուն  հայթայթուելիք  մարդասիրական   օժանդակութիւններուն  վրայ:

Սըլէյման, Պաապտայի պալատին մէջ գլխաւորեց  նախապատրաստական նիստի  մը,  հրաժարեալ վարչապետ  Նեժիպ Միքաթիի, ընկերային հարցերու հրաժարեալ նախարար  Ուայէլ Ապու Ֆաուրի, այլ  նախարարներու,  ապահովական կառոյցներու  ներկայացուցիչներու  մասնակցութեամբ: Նախքան նիստը,   հանրապետութեան նախագահը եւ հրաժարեալ վարչապետը  ունեցան կարճ  խորհրդակցութիւն մը:   Նիստը քննարկեց ՄԱԿ-ի 68-րդ  ընդհանուր խորհրդաժողովի ընթացքին Լիբանանի կողմէ   ներկայացուելիք օրակարգերը, ինչպէս նաեւ Լիբանանի  օժանդակութեան  համար, 25  Սեպտեմբերին,  Նիւ Եորքի մէջ   տեղի ունենալիք   միջազգային խորհրդաժողովէն   Լիբանանի ակնկալութիւնները: Լիբանան միաժամանակ կ’ակնկալէ, որ Միջազգային  Դրամատունը    յատուկ  տեղեկագիր մը ներկայացնէ սուրիացի  գաղթականներուն  իրավիճակին  վերաբերեալ: Այս նիստէն ետք, նախագահ Սըլէյման գլխաւորեց  ապահովական նիստի մը, ուր քննարկեց երկրին ապահովական իրավիճակը եւ  Լիբանան ապաստանող  սուրիացի  փախստականներու   փաստաթուղթերը օրինականացնելու    հետ  առնչուած հարցեր:

  Սըլէյման Պաապտայի  պալատին մէջ ընդունեց  Լիբանանի մօտ Եւրոպական Միութեան դեսպան Անճելինա Էխորհըրսթը:

LEAVE A REPLY

Please enter your comment!
Please enter your name here