ՌՈՒՍԻԱ ԿԸ ՊԱՀԱՆՋԷ ՅԱՐԳԵԼ ԺԸՆԵՒԻ ՄԷՋ ԳՈՅԱՑԱԾ ՀԱՄԱՁԱՅՆՈՒԹԻՒՆԸ

0
115

ՄԱԿ-ի Ապահովութեան Խորհուրդի  մնայուն անդամ պետութիւնները դռնփակ նիստ  մը գումարեցին երէկ եւ  քննարկեցին Սուրիոյ իրավիճակը: Միացեալ Նահանգներ  կը  փորձէ   խիստ   բանաձեւ մը   քուէարկել Սուրիոյ դէմ: Ռուսիա կը  մերժէ: ՄԱԿ-ի մօտ Ռուսիոյ դեսպան Վիթալի Չուրքին  յայտարարեց, թէ  քիմիական զէնքի կիրառման միջադէպը,  իշխանութիւններուն վրայ  ճնշում բանեցնելու եւ արտաքին  միջամտութիւն  հրահրելու  սադրանք մըն  էր: «Վկայութիւնները անհրաժեշտ է ամենամանրամասնօրէն  քննարկել».  ըսաւ Չուրքին: Չինաստան հաւանութիւն տուաւ  Ապահովութեան  Խորհուրդին մէջ  քննարկելու Սուրիոյ հակամարտութիւնը, սակայն առանց որեւէ   բանաձեւի քուէարկութեան:

  Սուրիոյ մէջ   քիմիական զէնքի  կիրառման  հետաքննութիւնները վարող   յանձնախումբի   ղեկավար  Աքի Սիլսթորմ  յայտարարեց, թէ բաւական  դժուար պիտի  ըլլայ  յայտնաբերել  բոլոր   քիմիական զէնքերը եւ   քանդել զանոնք:  Սիլսթրոմ   ընդգծեց,թէ  աշխատանքներուն  յաջողութեան համար շատ  մեծ նշանակութիւն  պիտի ունենայ    իշխանութիւններուն եւ  ընդդիմութեան միջեւ  երկխօսութիւնը:  Մասնագէտը    նշեց, թէ  սարին  կազով  յարձակումը  կատարուած  էր   հրթիռի միջոցաւ: Քիմիական  զէնքի  հետաքննութիւնները վարող  յանձնախումբը   մօտ օրէն պիտի  վերադառնայ Սուրիա:

Միացեալ Նահանգներու նախագահ Պարաք Օպամա քննադատեց  Ռուսիոյ  հետ Ժընեւի մէջ գոյացած համաձայնութիւնը.«  որովհետեւ անիկա  չընդգրկեր նախագահ Ասատի դէմ ուղղակի  պատժամիջոցներ». ըսաւ  ան:  Օպամայի  կարծիքով, հակամարտութեան  լուծումը  անհնար պիտի   ըլլայ, այնքան  ժամանակ որ   նախագահ Ասատ կը գտնուի  իշխանութեան վրայ:

Ամերիկացի չորս ծերակուտականներ նախագահ Պարաք  Օպամայի վարչակազմին կոչ ուղղեցին պատժամիջոցներ սահմանելու ռուսական այն   դրամատուներուն դէմ, որոնք կը   հովանաւորեն   Պաշշար Ասատի  վարչակարգը: Ելեւմտական   նախարար  Ճէյքոպ  Լուիսին ուղղուած  նամակը ստորագրած են  հանրապետական ծերակուտականներ  Ճոն  Գորնին,  Քելլի Այոթը եւ դեմոկրատներ  Ռիչարտ Պլիումենտալը եւ  Ճէյն  Շահինը:

Որքան ալ   փորձեն քիմիական զէնքի  կիրառումը  քաղաքականացնել, իրականութիւնը  այլ բան  կ’ըսէ: Բրիտանացի  փորձագէտներ  յայտարարեցին, թէ  ՄԱԿ-ի հետաքննիչներուն   ներկայացուցած  տեղեկագիրը  զերծ է Սուրիոյ վարչակարգը  ամբաստանելու ապացոյցներէ:

Ռուսիոյ  փոխարտաքին գործոց նախարար Սերկէյ    Ռիպաքով  Դամասկոսի մէջ հանդիպում մը  ունեցաւ  նախագահ Պաշշար Ասատի  հետ: Ան նաեւ հանդիպեցաւ արտաքին գործոց  նախարար Ուալիտ Մոալլէմի հետ:  Ռիպաքով  մերժեց   զէնքի ընտրանքը:

Յորդանանի  Ապտալլա Բ.  Վեհապետը  Չինաստանէն  պահանջեց աւելի գործօն դերակատարութիւն մը  ունենալ  Սուրիոյ   հակամարտութեան  լուծման  ուղղութեամբ:

Հռոմի Ֆրանսիսկոս Ա. Պապը իր շաբթական   ընդհանուր   նիստին  ընթացքին,  երկխօսութեան  ճանապարհը ընտրելու  եւ պատերազմին  վերջ  դնելու կոչ մը ուղղեց Սուրիոյ հակամարտութեան  կողմերուն:

LEAVE A REPLY

Please enter your comment!
Please enter your name here