ՕՊԱՄԱ՝ ԻՐԱՆԻ ՆՈՐ ՆԱԽԱԳԱՀԸ ՇԱՀԱԳՐԳՌՈՒԱԾ Է ՈՒԱՇԻՆԿԹԸՆ Ի ՀԵՏ ԵՐԿԽՕՍՈՒԹԵԱՆ ԿԱՐԳԱՒՈՐՄԱՄԲ

0
126

Ուաշինկթըն պէտք է  օգտուի՝  Միացեալ Նահանգներու հետ   երկխօսութիւն հաստատելու  Իրանի նոր նախագահ Հասան Ռոհանիի  մօտեցումէն:  Սոյն  յայտարարութիւնը  կատարեց նախագահ Պարաք Օպամա՝  սպանալեզու «Թելեմունտօ»  հեռատեսիլի ընկերութեան տուած  հարցազրոյցին ընթացքին: «Իրանի նոր նախագահը կը ձգտի իսկական  երկխօսութեան սկսիլ Արեւմուտքի  եւ Միացեալ Նահանգներու հետ:  Անհրաժեշտ է  ստուգել այդ կարելիութիւնը». յայտնեց Օպամա:  Միացեալ Նահանգներու նախագահին կարծիքով, նպաստաւոր   կարելիութիւն  ստեղծուած  է   դիւանագիտութեան  համար:

Նշենք, թէ նախագահներ Օպամա եւ Ռոհանի պիտի մասնակցին  Նիւ Եորքի   մէջ  մեկնարկած  ՄԱԿ-ի   68-րդ  ընդհանուր  խորհրդաժողովի նիստերուն:  Սակայն առայժմ տեղեկութիւններ  չկան անոնց  հանդիպման վերաբերեալ:

Միւս կողմէ,  Չինաստանի արտաքին գործոց նախարարութիւնը Թեհրանէն  պահանջեց աւելի  ճկուն  քաղաքականութիւն վարել  իր միջուկային  ծրագիրներուն  վերաբերեալ՝   Արեւմուտքի հետ  վարած  բանակցութիւններուն ընթացքին:

Իրանի ուժանիւթային հարցերու  ղեկավար  Ալի Աքպար Սալեհի ակնկալեց, որ  մեծ յառաջընթաց մը արձանագրուի   յառաջիկայ   քանի մը ամիսներուն  ընթացքին: Ան ըսաւ, թէ Իրանի եւ Վեցնեակի  հերթական հանդիպումը  տեղի պիտի ունենայ  27  Սեպտեմբերին:

LEAVE A REPLY

Please enter your comment!
Please enter your name here