ՄԱՐԶԱԿԱՆ – ՄԵՍԻԻ ԵՐԵՔ ԿՈԼԵՐԸ – ՉԵԼՍԻ ՊԱՐՏՈՒԵՑԱՒ ԻՐ ԴԱՇՏԻՆ ՄԷՋ

0
128

Եւրոպայի Ախոյեան Ակումբներու Ախոյեանութեան «Չեմփիընզ Լիկ»  մրցաշարքի խմբային հանգրուանի  երթի մրցումներուն գծով, Ը. Խմբակին մէջ,  Պարչելոնա   4-0 արդիւնքով  տպաւորիչ  յաղթանակ մը տարաւ  Այաքս Ամսթերտամի դէմ:  Լիոնէլ Մեսի  նշանակեց «Հեթ-թրիք» մը:   Ճեռար   Փիքէ  նշանակեց գաթալոնական խումբին  չորրորդ կոլը:  Մեսի  միաժամանակ   մրցանիշային  62-ի բարձրացուց  «Չեմփիընզ Լիկ» մրցաշարքին մէջ  նշանակած  կոլերուն թիւը, որոնց մէջ՝ չորս «հեթ-թրիք»ներ:

Ա.Սէ. Միլան  նոյնպէս  ապահովեց  երեք կէտ, երբ 2-0 արդիւնքով պարտութեան մատնեց  Սելթիքը:   Էմիլիօ  Իզակուիր (սեփական բերդին մէջ) եւ  Սուլէյ Մոնթարի նշանակեցին  իտալական  խումբին կոլերը:

Լոնտոնի Սթեմֆորտ  Պրիճ  մարզադաշտին մէջ,   Ժոզէ Մուրինիոյի Չելսին,  2-1 արդիւնքով պարտութիւն մը  կրեց  Զուիցերիոյ ախոյեան  Պասէլէն:  Օսքար  յառաջ  մղեց «Կապոյտներ»ը , սակայն Մուհամմէտ Սալեհ եւ  Մարքօ Սթրելըր  յեղաշրջեցին մրցումին արդիւնքը: Սեփական դաշտի  մէջ սոյն  պարտութիւնը, 2003-էն ի վեր  Չելսիի առաջինն էր՝ խմբային հանգրուանի մրցումներուն:

Շալքէ  04՝  3-0 արդիւնքով պարտութեան մատնեց Սթեուա Պուքարեսթը:  Նափոլի՝  2-1 արդիւնքով  արժանի յաղթանակ մը տարաւ  Պորուսիա Տորթմունտի դէմ,որուն  մարզիչը Եուրկէն Քլոփ մրցումէն ետք  ընդունեց, թէ ինք կը կրէր  իր խումբին պարտութեան պատասխանատուութիւնը: Կոնզալօ Հիկուային եւ Լորենզօ  Ինսինէ  նշանակեցին իտալական խումբին կոլերը:

Արսենալ  2-1 արդիւնքով   տպաւորիչ յաղթանակ մը տարաւ  Մարսէյի դէմ, այս վերջնոյն  դաշտին մէջ:  Թէօ Ուոլքոթ եւ  Աարոն Ռամզի նշանակեցին  «Կանըրզ»ներուն կոլերը:

Ստորեւ, մրցումներուն  թեքնիք արդիւնքները:

Շալքէ 04 –  Սթեուա Պուքարեսթ՝  3-0  Ե. Խմբակ

Չելսի – Պասէլ՝ 1-2 Ե.Խմբակ

Նափոլի – Պորուսիա Տորթմունտ՝ 2-1  Զ.Խմբակ

Մարսէյ – Արսենալ՝ 1-2  Զ.Խմբակ

Աթլեթիքօ  Մատրիտ – Զենիթ՝   3-1  Է. Խմբակ

Փորթօ – Աւստրիա  Վիեննա՝ 1-0  Է. Խմբակ

Պարչելոնա   – Այաքս Ամսթերտամ՝ 4-0  Ը. Խմբակ

Ա.Սէ. Միլան –   Սելթիք՝ 2-0  Ը.Խմբակ

ՔԷՆ ՆՈՐԹԸՆ ՄԱՀԱՑԱՒ

Ամերիկացի բռնցքամարտիկ Քէն Նորթըն մահացաւ: Ան  70 տարեկան էր:  Նորթըն մահացաւ սրտի տագնապի հետեւանքով:  Նորթըն, բռնցքամարտի աշխարհին մէջ հռչակ ստացաւ, երբ  1973-ին պարտութեան մատնեց  Մուհամմէտ Ալի Գլէյը: Վեց ամիս ետք, Գլէյ լուծեց իր վրէժը:  Երկու մրցակիցները 1976-ին դարձեալ հանդիպեցան   ռինկի վրայ:  Այս մէկը նոյնպէս  վերջ գտաւ  Գլէյի  յաղթանակով:  Նորթըն  1981-ին հեռացաւ  ասպարէզէն, որուն ընթացքին արձանագրած էր   42  յաղթանակ՛   7 պարտութիւն եւ մէկ հաւասարութիւն:

 

LEAVE A REPLY

Please enter your comment!
Please enter your name here