ՆԱԽԱԳԱՀ ՍԸԼԷՅՄԱՆ ԿԸ ՊԱՏՐԱՍՏՈՒԻ ՆԻՒ ԵՈՐՔԻ ԽՈՐՀՐԴԱԺՈՂՈՎԻՆ

0
128

Հանրապետութեան նախագահ  Միշէլ Սըլէյման  Պաապտայի պալատին մէջ ընդունեց  նախկին նախարար Ատնան Քասարը եւ անոր հետ  քննարկեց  երկրին տնտեսական, ընկերային իրավիճակը, ինչպէս նաեւ  Լիբանանի օժանդակութեան նպատակով, Նիւ Եորքի մէջ, 25 Սեպտեմբերին տեղի ունենալիք  միջազգային խորհրդաժողովին նախապատրաստական աշխատանքները:

Սըլէյման նաեւ ընդունեց պետական անվտանգութեան  ընդհանուր  տնօրէն Ճորճ Քարաան, Միջազգային Դրամատան Միջին Արեւելքի  բաժնի  տնօրէն Ֆարիտ Պելհաճը եւ անոր հետ քննարկեց  Լիբանանի  համար նախատեսուած   օժանդակութիւնները: Նախագահ Սըլէյման  ընդունեց  Լիբանանի մօտ հարաւային Քորէայի  դեսպան Քիմ Պի Եունկը, երեսփոխան Պահիա  Հարիրին եւ Ֆատի Հըպէշը:  Միւս կողմէ, հանրապետութեան նախագահը ստորագրեց  օրինագիծ մը, որուն հիման վրայ  հացահատիկներու եւ արմտիքներու  ընդհանուր տնօրէնութեան  պիտի կատարուի 18  միլիառ լիբանանեան ոսկիի յատկացում մը՝  ցորեն եւ հացահատիկ  գնելու  նպատակով:  

Լիբանանեան մամուլին համաձայն,  Նախագահ Միշէլ Սըլէյման  Նիւ Եորքի մէջ   հանդիպումներ  պիտի ունենայ   նախագահներ  Պարաք Օպամայի եւ Ֆրանսուա Հոլանտի հետ: Սըլէյման  իր պաշտօնակիցներուն հետ պիտի քննարկէ   շրջանային զարգացումները եւ Սուրիոյ  հակամարտութեան անդրադարձը  Լիբանանի վրայ: Հանրապետութեան նախագահի ելեւմտական հարցերու խորհրդատու Շատի Քարամ դիտել տուաւ, թէ  Նիւ Եորքի   խորհրդաժողովը  անմիջական  օժանդակութիւններ պիտի չխոստանայ Լիբանանին, այլ՝  պիտի ուսումնասիրէ   օժանդակութեան կարելիութիւնները:

LEAVE A REPLY

Please enter your comment!
Please enter your name here