ԼԻԲԱՆԱՆ ՊԻՏԻ ԲՈԼՈՐԷ ՆԻՒ ԵՈՐՔԵԱՆ ՇԱԲԱԹ ՄԸ : ՍԸԼԷՅՄԱՆ – ՕՊԱՄԱ ՀԱՆԴԻՊՈՒՄ ԱՅՍՕՐ

0
123

Հանրապետութեան նախագահ, կառավարական, խորհրդատուական պատուիրակութեան մը գլխաւորութեամբ  ժամանեց  Նիւ Եորք, մասնակցելու ՄԱԿ-ի Ապահովութեան Խորհուրդի  68-րդ  ընդհանուր խորհրդաժողովներու նիստերուն:  Հանրապետութեան  նախագահը ՄԱԿ-ի ամպիոնէն  պիտի փոխանցէ   Լիբանանի խօսքը,  որուն հիմնական  կէտերը  պիտի  ըլլան, Լիբանանի  հողային  տարածութիւններէն ներս   իսրայէլեան ոտնձգութիւնները, Սուրիոյ անդրադարձը  Լիբանանի վրայ եւ  սուրիացի գաղթականներուն նեկայութեան պատճառով  Լիբանանի  դիմագրաւած  տնտեսական, ընկերային  դժուարութիւնները:  Նախագահ Սըլէյման սկզբունքով այսօր, Երեքշաբթի՝  կէս գիշեր, պիտի արտասանէ Լիբանանի խօսքը:  Կարգ մը տեղեկութիւններու համաձայն, նախագահ Սըլէյման  այսօր   հանդիպում մը  պիտի ունենայ  Միացեալ Նահանգներու նախագահ  Պարաք Օպամայի հետ:  Հանդիպումներ նախատեսուած են նաեւ ՄԱԿ-ի ընդհանուր քարտուղար  Պան Քի Մունի,  Իրանի նախագահ Հասան Ռոհանիի,  Յորդանանի Ապտալլա  Բ.  Վեհապետին,  Քաթարի  իշխան  շէյխ Թամիմ Պըն Համատ Ալ Թանիի եւ այլ հեղինակութիւններու  հետ:

Նախագահ Միշէլ  Սըլէյմանի պատուիրակութեան  մաս կը կազմեն փոխվարչապետ Սամիր Մուքպէլ, արտաքին գործոց  նախարար Ատնան Մանսուր,  ընկերային հարցերու նախարար Ուայէլ ապու Ֆաուր, ինչպէս նաեւ ապահովական եւ  վարչական  պատասխանատուներ:   Հանդիպումներուն զուգահեռ,  վաղը՝  Չորեքշաբթի, նախագահ Սըլէյման պիտի մասնակցի Լիբանանի   օժանդակութեան եւ   զօրակցութեան միջազգային խորհրդաժողովին, ուր պիտի  քննարկուին  Լիբանանին քաղաքական, ապահովական, տնտեսական, մարդասիրական  օժանդակութիւններ հայթայթելու կարելիութիւնները:   Արտաքին գործոց նախարարի պաշտօնակատար  Ատնան Մանսուր երէկ   մասնակցեցաւ Նիւ Եորքի մէջ  կայացող արաբ արտաքին գործոց նախարարներու տարեկան նիստին:

Նորանշանակ վարչապետ Թամամ Սալամ   անգամ մը եւս ընդգծեց, թէ  կառավարութիւն կազմելու  որոշումը   իր լիազօրութեան  սահմաններուն մէջ ինկող  քայլ մը  ըլլալով, հանրապետութեան նախագահին հետ համախորհուրդ, որեւէ մէկ պահուն  կրնայ  կազմել ու յայտարարել: Սալամ  շեշտեց, թէ  հանրապետութեան նախագահին  յղած  երկխօսութեան հրաւէրին հիմքը պիտի  ըլլայ  Պաապտայի  Յայտարարութեան կէտերը յարգելու յանձնառութիւնը:

LEAVE A REPLY

Please enter your comment!
Please enter your name here