ՍԻԹԻ ՅԱՂԹԵՑ ՄԱՆՉԵՍԹԸՐ ՔԱՂԱՔԻ 166-ՐԴ ՏԸՐՊԻՆ

0
159

Շաբաթավերջին եւրոպական  տարբեր  ոստաններու մէջ   տեղի ունեցան  ազգային ախոյեանութիւններու  հերթական  մրցումները: Արսենալ, Լոնտոնի մէջ  3-1 արդիւնքով  պարտութեան մատնեց  Սթոք Սիթին եւ  սկսաւ  գլխաւորել ընդհանուր դասաւորումը: Օրուան ամենահետաքրքրական  եւ սպասուած   հանդիպումը անկասկած տեղի ունեցաւ Մանչեսթըր քաղաքի  հսկաներուն՝ Եունայթըտի եւ Սիթիի  միջեւ: «Կարմիր Սատանաներ»ու կազմէն   վնասուածքի հետեւանքով կը բացակայէր  Ռոպին Վան Փըրսին:  Սիթի ցուցադրեց տպաւորիչ  խաղ մը եւ  4-1 արդիւնքով  արժանի  յաղթանակ մը տարաւ իր  մրցակիցին դէմ:   Սամիր   Նասրի,  Եայիա Թուրէ եւ Սերժիօ Ակուերօ (2) նշանակեցին Սիթիի կոլերը, Ուէյն Ռունի՝ Եունայթըտի: Ի դէպ, Ռունի՝  11 կոլով  դարձաւ,  երկու խումբերուն միջեւ  տեղի ունեցած  մրցումներուն ընթացքին ամենաշատ կոլ նշանակող    ֆութպոլիստը:  Ժոզէ Մուրինոյի Չելսին՝  2-0 արդիւնքով պարտութեան մատնեց  Ֆուլամը:  Օսքար եւ  Օպի Միքէլ նշանակեցին  «Կապոյտներ»ուն կոլերը:  Չելսի՝ 10  կէտով   հաւասարեցաւ  Լիվըրփուլին:  Վերջինս,  սեփական  դաշտին մէջ  1-0 արդիւնքով  անակնկալ պարտութիւն մը կրեց  Սաութեմթընէն:  Լիվըրփուլ քաղաքի  երկրորդ խումբը՝  Էվըրթըն  3-2 արդիւնքով պարտութեան մատնեց Ուեսթ Համ  Եունայթըտը, այս  վերջնոյն  դաշտին մէջ:  Լէյթըն Պէյնս (2) եւ Ռոմելու  Լուքաքու  նշանակեցին «Տը Թոֆիզ»ներուն  կոլերը:    Ուեսթ Պրոմուիչ Ալպիոն՝ 3-0 արդիւնքով յաղթեց Սանտերլանտին: Սանտերլանտ  կը գրաւէ դասաւորման  վերջին դիրքը: Վերջինիս  տնօրէնութիւնը պաշտօնէն արձակեց մարզիչ Փաուլօ Տի Գանիօն: Թոթենհամ՝  1-0 արդիւնքով  պարտութեան մատնեց Գարտիֆը, այս  վերջնոյն դաշտին  մէջ:

Սպանիոյ  ֆութպոլի ախոյեանութեան  5-րդ  հանգրուանի  մրցումներուն Աթլեթիքօ Մատրիտ  2-0 արդիւնքով պարտութեան  մատնեց Վալատոլիտը: Մատրիտցիներու կոլերը նշանակեցին Ռաուլ Կարսիան եւ Տիէկօ Քոսթան:  Այսպիսով,  Տիէկօ Սիմոնէի   խումբը տարաւ  5-րդ անընդմէջ յաղթանակը՝ 15 կէտով   հաւասարելով Պարչելոնային: Գաթալոնական խումբը  Փետրօ  Ռոտրիկէզի ( 3)  եւ  Սեսք Ֆապրեկասի   կոլերուն շնորհիւ՝  4-0 արդիւնքով պարտութեան մատնեց  Ռայօ Վալեքանօն:   Ռէալ Սոսիետատ –  Մալակա ճակատումը  վերջ գտաւ՝0-0  հաւասարութեամբ:  Ռէալ Մատրիտ՝   4-1 արդիւնքով պարտութեան մատնեց  Կեթաֆէն:  Փըեփէ,  Ռոնալտօ(2) եւ Իսկօ նշանակեցին   Ռէալի կոլերը:

Գերմանիոյ ախոյեանութեան  6-րդ հանգրուանի մրգումներուն, Պայերն Միւնիխ՝  4-0 արդիւնքով պարտութեան  մատնեց  Շալքէ 04-ին  եւ  16 կէտով հաւասարեցաւ  Պորուսիա Տորթմունտին:  Շուայնշթայկըր,   Մանչուկիչ, Ռիպերի եւ Փիզարօ նշանակեցին  պաւարիական կազմին կոլերը:  Պորուսիա Տորթմունտ, մրցակիցի դաշտի մէջ  1-1 արդիւնքով   հաւասարութիւն մը արձանագրեց  Նիւրենպերկի   դէմ:  Մարսէլ   Շմելցէր նշանակեց  Տորթմունտի կոլը:

Պայեր Լեվերքուզեն  4-1 արդիւնքով պարտութեան  մատնեց  Մայնցը:  Քրուզէ (2), Պենտէր եւ  Քիսլինկ նշանակեցին  Լեվերքուզենի կոլերը: Համպուրկ  պաշտօնէն արձակեց  մարզիչ  Թորսթէն  Ֆինքը: Յառաջիկայ  քանի մը   ժամերուն,  Հոլանտայի հաւաքականի նախկին մարզիչ Պերթ Վան  Մարվէյկ պաշտօնապէս պիտի   նշանակուի  Համպուրկի մարզիչ:

Ֆրանսայի  ախոյեանութեան   6-րդ հանգրունի մրցումներուն, Մարսէյ՝  սեփական  դաշտին մէջ  0-0 արդիւնքով   հաւասարութիւն մը արձանագրեց Պասթիայի դէմ:  Մարսէյ  հաւաքած է  11 կէտ:     Լիլի կազմը, 2-0 արդիւնքով պարտութեան մատնեց Սոշօն:  Մրցումին երկու կոլերը նշանակեց  Ֆրանսայի  հաւաքականի յարձակող  Նոլան  Ռուն: Օրուան սպասուած հանդիպումը տեղի ունեցաւ մայրաքաղաքին մէջ, ուր Փարի Սէն Ժերմէն ընդունեց Մոնաքօն: Ճակատումը վերջ գտաւ ՝1-1 հաւասարութեամբ: Զլաթան Իպրահիմովիչ, 5-րդ վայրկեանին յառաջ մղեց մայրաքաղաքի խումբը: 20-րդ վայրկեանին, Ռատամէլ Ֆալքաօ հաւասարեցուց հաշիւը: Մոնաքօ՝14 կէտով կը գլխաւորէ ընդհանուր դասաւորումը:Փարի Սէն Ժերմէն եւ Սէն Թեթիէն՝ 12-ական կէտով կը  գրաւեն  2-րդ եւ 3-րդ դիրքերը:  Լիոն՝ 3-1 արդիւնքով պարտութեան մատնեց  Նանթը:

Իտալիոյ  ախոյեանութեան   չորրորդ հանգրուանի մրցումներուն,  Գիեւօ՝  2-1 արդիւնքով  պարտութեան մատնեց Ուտինեզին:  Գալիարի  եւ  Սամփտորիա  ճակատումը  վերջ  գտաւ՝ 2-0  հաւասարութեամբ: Նափոլի՝ 2-1 արդիւնքով պարտութեան մատնեց  Ա.Սէ. Միլանը:   Միկէլ  Պրիթոս եւ  Կոնսալօ Հիկուային նշանակեցին  Նափոլիի կոլերը, Մարիօ Պալոթելի՝  Միլանի: Մրցումի  63-րդ  վայրկեանին,  Նափոլիի  բերդապահ Փեփէ Ռէյնա յաջողեցաւ  զսպել Մարիօ Պալոթելիի  փենալթի  հարուածը:  Պալոթելի առաջին անգամ ըլլալով  ձախողեցաւ  կոլի  վերածելու  փենալթի հարուած մը:  Ցարդ իւրացուցած էր  21 փենալթի:  Մրցումին աւարտէն ետք, իրաւարարին հետ վիճելու պատճառով, Պալոթելի  ստացաւ երկրորդ դեղին  քարթ մը… Չորս մրցումէ ետք, Նափոլի եւ Ռոմա 12-ական կէտով միասնաբար կը գլխաւորեն ախոյեանութեան ընդհանուր դասաւորումը: Ռոմա՝  2-0  արդիւնքով պարտութեան մատնեց Լացիօն:

Ռուսիոյ ախոյեանութեան  9-րդ  հանգրուանի  ամենահետաքրքրական հանդիպումը կայացաւ  Մոսկուայի  մէջ,  Սպարտակը ընդուեց  Մոսկուայի Բանակայինները եւ   երեք  անպատասխան  գնդակ զետեղեց անոր  բերդին  մէջ:  

Հայաստանի  ֆութպոլի ախոյեանութեան 6-րդ հանգրուանի մրցումներուն,  Երեւանի Արարատը հինգ անպատասխան գնդակ  զետեղեց  Ալաշկերտի բերդին մէջ: Արարատցիները  11  կէտով կը  գրաւեն ընդհանուր դասաւորման  երկրորդ  դիրքը: Յառաջատար Փիւնիկը հաւաքած է 12 կէտ:  Վերջինս, 2-0 արդիւնքով պարտութեան  մատնեց Շիրակը:

 ՉԻՍՕՐԱ ՆՈՒԱՃԵՑ ԵՒՐՈՊԱՅԻ  ԱԽՈՅԵԱՆԻ ՏԻՏՂՈՍԸ

 Բրիտանացի  գերծանր կարգի բռնցքամարտիկ Տերէք  Չիսորա  շահեցաւ  EBU  վարկածի   Եւրոպայի   ախոյեանի   տիտղոսը:

Լոնտոնի մէջ կայացած   մրցումին,  Չիսորա պարտութեան մատնեց գերմանացի  Էտմոնտ  Կերպէրը:  Մրցումի առաջին իսկ  վայրկեանէն, առաւելութիւնը Չիսորայի հետ էր:  Իրաւարարը  5-րդ  ռաունտին կասեցուց մենամարտը՝  Կերպէր ի վիճակի չէր շարունակելու պայքարը:

ԱՐԹՈՒՐ ԱԼԵՔՍԱՆԵԱՆ՝  ԱՐԾԱԹԷ ՄԵՏԱԼԱԿԻՐ

 Հունգարիոյ մայրաքաղաք  Պուտափեշտի մէջ կայացող յունահռոմէական  ոճի ըմբշամարտի  աշխարհի ախոյեանութեան  մրցումներուն,  Հայաստանը ներկայացնող Արթուր Ալեքսանեան դարձաւ արծաթէ  մետալակիր:

Արդարեւ,  96  քիլոկրամ ծանրութեան կարգի  եզրափակիչ մրցումին, Եւրոպայի   գործող ախոյեան Ալեքսանեանը  իր տիտղոսը  զիջեցաւ  ռուս Քիրիլ  Մելնիքովին: Միեւնոյն   ծիրին մէջ,  Արսէն Չուլֆալաքեան պարտութեան մատնեց  դանիացի  Մարք Մատսընը եւ  դարձաւ  պրոնզէ մետալակիր:

 ԷԼԻՆԱ ԴԱՆԻԷԼԵԱՆ   ՄԻԱՒՈՐ ԿԸ ԿՈՐՍՆՑՆԷ

Ուզպեքստանի  մայրաքաղաք Թաշկենթի մէջ կայացող  աղջկանց   ճատրակի  միջազգային Կրան Փրիի  չորրորդ հանգրուանին  Հայաստան’ը ներկայացնող  Էլինա Դանիէլեան  ճերմակ  քարերով հաւասարութիւն մը արձանագրեց  պուլկարացի  Անթոնեթա Սթեֆանովայի հետ:  Չորրորդ  հանգրուանէն  ետք Դանիէլեան հաւաքած  է մէկ միաւոր: Մրցաշարքը պիտի աւարտի 30 Սեպտեմբերին:

ԱՅՍՕՐ ԵՐԵՔՇԱԲԹԻ  ԵՐԵԿՈՅԵԱՆ ՏԵՂԻ ՈՒՆԵՆԱԼԻՔ  ՄՐՑՈՒՄՆԵՐ

ԱՆԳԼԻԱ

ԼԻԿԱՅԻ ԲԱԺԱԿ –  3ՐԴ  ՀԱՆԳՐՈՒԱՆ

Ասթոն Վիլա –  Թոթենհամ

Պըրնլի –  Նոթինկհամ Ֆորեսթ

 Հոլ Սիթի – Հատըրսֆիլտ Թաուն

 Լեսթըր Սիթի –  Տըրպի Գաունթի

Մաչեսթըր Սիթի – Ուիկան

 Սաութեմթըն –  Պրիսթոլ Սիթի

 Սանտերլանտ – Փիթիրպորօ

  Սուիտնըն  Թաուն –  Չելս

 Ուաթֆորտ – Նորուիչ Սիթի

 Ուեսթ Համ Եունյթըտ –  Գարտիֆ Սիթի

 Ֆուլամ –  Էվըրթըն

Վերոյիշեալ մրցումները պիտի սկսին Պէյրութի  ժամով՝ 21.45-ին

ՍՊԱՆԻԱ

 Պարչելոնա –  Ռէալ Սոսիետատ  ժամը 21.00

Աթլեթիքօ Մատրիտ – Օսասունա  ժամը՝  23.00

ԻՏԱԼԻԱ

 Ուտինեզէ – Ճենովա ժամը՝  21.45

ՖՐԱՆՍԱ

 Լիլ –  Էվիան ժամը՝  20.00

 Մարսէյ –  Սէն Թեթիէն ժամը՝  22.00

ՏԻՈՔՈՎԻՉ  ԵՒ ՍԵՐԵՆԱ ԱՌԱՋԻՆ ԴԻՐՔԵՐՈՒ ՎՐԱՅ

 Նովաք Տիոքովիչ եւ Սերենա Ուիլիյըմզ   համապատասխանաբար կը գլխաւորեն   տղոց  եւ աղջկանց  համաշխարհային  թենիսի  ընդհանուր  դասաւորումը:  Տղոց  պարագային,  սերպ Տիոքովիչապահոված է  11120  կէտ: Երկրորդ   դիրքի վրայ գտնուող Ռաֆայէլ Նատալ՝ 10860:  Արհեստավարժ  թենիսի  յաջորդ   մեծ մրցաշարքը պիտի մեկնարկէ  Իսթանպուլի մէջ՝ 21  Հոկտեմբերին:

ՖՐԱՆՍԱՅԻ ՊԱՏՔԵԹՊՈԼԻ ԽՈՒՄԲԸ  ԵՒՐՈՊԱՅԻ ԱԽՈՅԵԱՆ

Իր պատմութեան մէջ առաջին անգամ ըլլալով, Ֆրանսայի հաւաքանը նուաճեց պասքեթպոլի Եւրոպայի ախոյեանութեան տիտղոսը: Եզարափակիչ մրցումին, ֆրանսացիները ՝ 80-66 արդիւնքով պարտութեան մատնեցին Լիթվիան: Սպանիա երրորդ հանդիսացաւ՝:

ՎԵԹԷԼ   ՇԱՀԵՑԱՒ ՍԻՆԿԱՓՈՒԻ ԿՐԱՆ ՓՐԻՆ

 Ֆորմիւլա 1 ինքնաշարժներու Սինկափուրի Կրան Փրին  վերջ գտաւ աշխարհի ախոյեան Սեպասթիան Վեթէլի   յաղթանակով: Ֆեռնանտօ Ալոնզօ  երկրորդ   հանդիսացաւ,  Քիմի Ռայքոնեն՝  երրորդ:  Սեպասթիան  Վեթէլ՝  247  կէտով կը գլխաւորէ   ընդանուր դասաւորումը:  Ֆեռնանտօ Ալոնզօ՝ 187 կէտով կը  գրաւէ   2-րդ դիրքը: Ֆորմիւլա1 ինքնաշարժներու  յաջորդ Կրան Փրին տեղի պիտի ունենայ  հարաւային Քորէայի մէջ,  6  Հոկտեմբերին:

 

 

LEAVE A REPLY

Please enter your comment!
Please enter your name here